ପ୍ୟରିସ୍, ୧୪ା୭: ଅଷ୍ଟ୍ରିଆର ୨୯ ବର୍ଷୀୟ ପ୍ୟାଟ୍ରିକ୍ କୋନାର୍ଡ (ବୋରା-ହାନ୍ସଗ୍ରୋହେ) ଟୁର୍ ଡି’ ଫ୍ରାନ୍ସ ସାଇକେଲ ରେସ୍ର ୧୬ତମ ଷ୍ଟେଜ୍ ବିଜେତା ହୋଇଛନ୍ତି। ଜଣେ ପ୍ରଫେସନାଲ ରାଇଡର ହିସାବରେ ଏହା ହେଉଛି ତାଙ୍କର ପ୍ରଥମ ଷ୍ଟେଜ୍ ବିଜୟ। ପାସ୍ ଡି’ ଲା କାସେଠାରୁ ସେଣ୍ଟ୍ ଗଡେନ୍ସ ପର୍ଯ୍ୟନ୍ତ ୧୬୯ କିଲୋମିଟର ବିଶିଷ୍ଟ ରେସ୍କୁ ସେ ୪ଘଣ୍ଟା ୧ ମିନିଟ୍ ୫୯ ସେକେଣ୍ଡରେ ଶେଷ କରିଥିଲେ। ତାଙ୍କ ପଛକୁ ଯଥାକ୍ରମେ ଦ୍ୱିତୀୟ ଓ ତୃତୀୟ ସ୍ଥାନରେ ସୋନି କୋଲବ୍ରେଲି ଓ ମାଇକେଲ ମାଥ୍ୟୁସ୍ ରହିଥିଲେ। ପାଇରେନିଜ୍ (୨,୪୦୯ ମିଟର)ର ସର୍ବୋଚ୍ଚ ଗିରିପଥ ପୋର୍ଟ ଡି’ଏନଭାଲିରା ନିକଟବର୍ତ୍ତୀ ପାସ୍ ଡି’ ଲା କାସା ସାଇକେଲ ଚାଳକମାନଙ୍କର ବେଶ୍ ଜଣାଶୁଣା। ଏହି ଅଞ୍ଚଳରେ ୧୦ମ ଥର ଟୁର୍ ଡି ଫ୍ରାନ୍ସର ଏକ ଷ୍ଟେଜ୍ ଅନୁଷ୍ଠିତ ହୋଇଥିଲା। ଜେନେରାଲ କ୍ଲାସିଫିକେଶନ ଷ୍ଟାଣ୍ଡିଂରେ ସ୍ଲୋଭେନିଆର ଟାଡେଜ୍ ପୋଗାକାର (ଟିମ୍ ଏମିରେଟ୍ସ) ପ୍ରଥମ ସ୍ଥାନରେ ରହିଛନ୍ତି। ଦ୍ୱିତୀୟ ଓ ତୃତୀୟ ସ୍ଥାନରେ ଯଥାକ୍ରମେ କଲମ୍ବିଆର ରିଗୋବର୍ଟୋ ଉରାନ ଓ ଡେନମାର୍କର ଜୋନାସ ଭିଙ୍ଗେଗାର୍ଡ ରହିଥିଲେ।