କୋରାପୁଟ/ନନ୍ଦପୁର/ ଦଶମନ୍ତପୁର/ ଜୟପୁର, ୨୧ା୯(ଅମିତାଭ ବେହେରା/ ଶଙ୍କର ପୂଜାରୀ/ ଅରବିନ୍ଦ ନାୟକ/ ପବନ ପାଣିଗ୍ରାହୀ)
କୋରାପୁଟ ଜିଲାରେ ବୁଧବାର ୮୦୭.୪ ମି.ମି. ବର୍ଷା ହୋଇଥିବାବେଳେ ଜିଲାର କୋରାପୁଟ ବ୍ଲକରେ ସର୍ବାଧିକ ୧୬୮ ମି.ମି.ବର୍ଷା ହୋଇଥିବା ବେଳେ କୋଟପାଡ ବ୍ଲକରେ ସର୍ବନିମ୍ନ ୪ ମି.ମି. ବର୍ଷା ହୋଇଥିବା ଜିଲା ଜରୁରିକାଳୀନ ବିଭାଗ ପକ୍ଷରୁ କୁହାଯାଇଛି। ଏହି ବର୍ଷା ଯୋଗୁ ବୁଧବାର ସନ୍ଧ୍ୟା ସୁଦ୍ଧା ବ୍ଲକର ବିଭିନ୍ନ ସ୍ଥାନରେ ୧୪ଟି ଘର ଭାଙ୍ଗିଥିବା ଜଣାଯାଇଛି। କୋରାପୁଟ ସହର ଓ ବ୍ଳକ ଅଞ୍ଚଳରେ ପ୍ରବଳ ବର୍ଷା ଯୋଗୁ ୫ଟି ଘର ଭାଙ୍ଗିଥିବାବେଳେ ଅନ୍ୟାନ୍ୟ ସ୍ଥାନରେ ୯ଟି ଘର ଭାଙ୍ଗିଛି। ବିଭିନ୍ନ ସ୍ଥାନରେ ବର୍ଷାପାଣି ଜମି ରହିଛି। ବର୍ଷା ଯୋଗୁ କୋରାପୁଟ ସହର ଦେଇ ବିଶାଖାପାଟଣା ଯାଇଥିବା ୨୬ ନମ୍ବର ଜାତୀୟ ରାଜପଥର ରେଲୱେ ଓଭର ବ୍ରିଜ୍ ନିକଟରେ ୪ ଫୁଟ ପାଣି ପ୍ରବାହିତ ହେଉଛି। ଫଳରେ ଗାଡ଼ିମୋଟର ଚଳାଚଳରେ ଅସୁବିଧା ସୃଷ୍ଟି ହୋଇଥିବା ଦେଖିବାକୁ ମିଳିଛି। ଖବର ଲେଖାହେବାଯାଏ ଜିଲାର ସବିଶେଷ କ୍ଷୟକ୍ଷତି ରିପୋର୍ଟ ହସ୍ତଗତ ହୋଇ ନ ଥିବା ଜିଲା ଜରୁରୀ ବିଭାଗ ପକ୍ଷରୁ ଜଣାପଡିଛି। ଜିଲାର ନନ୍ଦପୁର ବ୍ଲକରେ ୧୩୭ ମି.ମି.ବର୍ଷା ହୋଇଥିବାବେଳେ ସେମିଳିଗୁଡ଼ା ବ୍ଲକରେ ୧୦୩ ମି.ମି., ଜୟପୁର ବ୍ଳକ ୧୦୦.୮ ମି.ମି., ଲମତାପୁଟ ୭୫.୨ ମି.ମି., ଦଶମନ୍ତପୁର ୭୧ ମି.ମି., ବୈପାରିଗୁଡ଼ା ୪୯ ମି.ମି., ବୋରିଗୁମ୍ମା ୩୫.୪ ମି.ମି., ପଟ୍ଟାଙ୍ଗି ୩୫.୨ ମି.ମି., ବନ୍ଧୁଗାଁ ୬ ମି.ମି., ଲକ୍ଷ୍ମୀପୁର ୫.୨ ମି.ମି. , କୁନ୍ଦୁରା ୧୩.୪ ମି.ମି., ନାରାୟଣପାଟଣା ୪.୨ ମି.ମି. ଓ କୋଟପାଡ ବ୍ଲକରେ ସର୍ବନିମ୍ନ ୪ ମି.ମି. ବର୍ଷା ହୋଇଛି।
ବର୍ଷା ପ୍ରଭାବରେ ନନ୍ଦପୁର ବ୍ଲକ ଦେଇ ଯାଇଥିବା ଜୟପୁର-ବିଶାଖାପାଟଣା ରାଜ୍ୟ ରାଜପଥର କାଣ୍ଟି ଗ୍ରାମ ପୋଲ ଉପରେ ବର୍ଷାଜଳ ପ୍ରବାହିତ ହେଉଥିବା ଦେଖିବାକୁ ମିଳିଛି। ଥୁବା,ସଗର, ଚାଟୁଆ-କୋନା, ହିକିମପୁଟ-ବିଶପୁର ଆର୍ଡି ରାସ୍ତା ସମେତ ଗୋଲୁର, କୁଲାରସିଂ ଆଦି ପଞ୍ଚାୟତର ବିଭିନ୍ନ ରାସ୍ତା ଉପରେ ବର୍ଷାଜଳ ପ୍ରବାହିତ ହୋଇ ଯାତାୟାତ ପ୍ରଭାବିତ ହୋଇଛି। ପ୍ରବଳ ବର୍ଷା ଯୋଗୁ ଧାନକ୍ଷେତରେ ବାଲି ଚରିଯିବା ଆଶଙ୍କା ପ୍ରକାଶ ପାଇଛି। ପାହାଡ ତଳ ଜମିରେ ଚାଷ ହୋଇଥିବା ମାଣ୍ଡିଆ, ଆଳୁ ଓ ଅଦା ଚାଷ କ୍ଷତିଗ୍ରସ୍ତ ହୋଇଛି। ଥୁବା, କୁଲାରସିଂ, ବାଇଲିଗୁଡା ଗ୍ରାମରେ ବର୍ଷାଜଳ କେତେଜଣ ଲୋକଙ୍କ ଘରେ ବର୍ଷାପାଣି ପଶିଥିବା ଜଣାପଡିଛି।
ଦଶମନ୍ତପୁର ବ୍ଲକରେ ଲଗାଣ ବର୍ଷା ଯୋଗୁ ଅନେକ ଲୋକଙ୍କ ଘର ଭିତରେ ପାଣି ପଶିଛି। ଫଳରେ ଗଚ୍ଛିତ ଥିବା ଖାଦ୍ୟଶସ୍ୟ ନଷ୍ଟ ହୋଇଛି। ଚଣାବାଡ଼ ପଞ୍ଚାୟତ ଏସ୍. ଡଣ୍ଡାବାଡ଼ ଗ୍ରାମର ଅରସି ଜାନି, କେଲୁ ମିଣିଆକା, କାଶୀ ମୁସକା, କଂସାରୀ ଦିଶାରି ଓ ଶିତ୍ରୁ ଦିଶାରିଙ୍କ ଘରେ ପାଣି ପଶି ଖାଦ୍ୟଶସ୍ୟ ନଷ୍ଟ କରିଥିବା ଜଣାପଡିଛି। ଦଶମନ୍ତପୁର ବ୍ଲକକୁ ସଂଯୋଗ କରୁଥିବା ପେଡିସିଲ ପୁରୁଣା ପୋଲ ଉପରେ ବର୍ଷା ପାଣି ପ୍ରବାହିତ ହେଉଛି। ବର୍ଷାରେ ଯଦି ପୋଲି ଭୁଶୁଡି ପଡେ ତେବେ ଦଶମନ୍ତପୁର ବ୍ଲକ ବାହ୍ୟଜଗତରୁ ବିଚ୍ଛିନ୍ନ ହୋଇପଡିବା ନେଇ ଆଶଙ୍କା ପ୍ରକାଶ ପାଇଛି।
ପ୍ରବଳ ବର୍ଷା ହେତୁ କୋରାପୁଟ ଜିଲାର ଜୟପୁର ଘାଟିରୁ ବୁଧବାର ପଥର ଖସିଛି। ତେବେ ପଥର ଖସିବା ସମୟରେ ଘାଟି ରାସ୍ତାରେ ଲୋକଙ୍କ ଯାତାୟାତ ନ ଥିବାରୁ କାହାର କିଛି କ୍ଷତି ହୋଇନାହିଁ। ଘାଟିରେ ସର୍ତକ ହୋଇ ଗାଡ଼ି ଚଲାଇବାକୁ ପ୍ରଶାସନ ପକ୍ଷରୁ ଅବଗତ କରାଯାଇଛି। ଜାତୀୟ ରାଜପଥ ବିଭାଗ ଓ ପ୍ରଶାସନ ପଦକ୍ଷେପ ନେଇ ପଥର ହଟାଇ ଘାଟିରେ ଯାତାୟାତ ସ୍ବାଭାବିକ କରିବାକୁ ମତ ପ୍ରକାଶ ପାଉଛି।