ଢେଙ୍କାନାଳ ଅଫିସ,୩୦।୧୨: ହାଇକୋର୍ଟଙ୍କ ନିର୍ଦ୍ଦେଶରେ ଢେଙ୍କାନାଳ ଜିଲାର ବିଶ୍ୱପ୍ରସିଦ୍ଧ ମହିମା ଧର୍ମପୀଠ ସ୍ଥଳୀ ଯୋରନ୍ଦା ମହିମା ଗାଦିର ବିବାଦୀୟ ତୃତୀୟ ବେଢ଼ାରୁ କୌପୀନଧାରୀ ମହିମା ସମାଜର ଉପାସନାସ୍ଥଳୀ ଉଚ୍ଛେଦକୁ ମାସେ ବିତିଗଲାଣି। ହେଲେ କୌପୀନଧାରୀଙ୍କ ଦାବିକୁ ଅଣଦେଖା କରାଯାଉଛି। ତେଣୁ ନୀତିକାନ୍ତି ଓ ଉପାସନାରେ ବ୍ୟାଘାତ ସୃଷ୍ଟି ହେଉଥିବା ସତ୍ୟ ଅଲେଖ ମହିମାଧର୍ମ କୌପୀନଧାରୀ ସମିତି ପକ୍ଷରୁ ଅଭିଯୋଗ ହୋଇଛି। ଏହାର ପ୍ରତିକାର କରିବାକୁ ଗୁରୁବାର ୫ ଦଫା ଦାବିରେ ଜିଲାପାଳଙ୍କୁ ଭେଟିଛନ୍ତି ସମାଜର ସାଧୁସନ୍ଥ। ୭ଦିନ ମଧ୍ୟରେ ଏହାର ସମାଧାନ ନ କଲେ ଜେଲଭରୋ ଆନ୍ଦୋଳନ କରାଯିବ ବୋଲି ଚେତାବନୀ ଦିଆଯାଇଛି। ଅନ୍ୟପଟେ ବକ୍କ୍ବଳଧାରୀ ଏବଂ କୌପୀନଧାରୀ ସାଧୁସନ୍ଥମାନେ ଆପୋସ ଆଲୋଚନା ମାଧ୍ୟମରେ ସମାଧାନ କରିବାକୁ ଜିଲାପାଳ ନିବେଦନ କରିଛନ୍ତି।
ଅଭିଯୋଗ ଅନୁଯାୟୀ, ହାଇକୋର୍ଟଙ୍କ ପକ୍ଷରୁ ଗାଦିମନ୍ଦିର ଓ ଶୂନ୍ୟ ମନ୍ଦିରରେ ପୂଜାନୀତି କରିବାକୁ ଉଭୟ ପକ୍ଷରୁ ସମାନ ଅଧିକାର ଦିଆଯାଇଛି। ସେହିପରି ଯୋରନ୍ଦା ଓ ନାଟିମା ମୌଜାରେ ମହିମା ସ୍ବାମୀଙ୍କ ନାମରେ ଥିବା ସମସ୍ତ ଭୂ-ସମ୍ପତ୍ତିରେ କୌପୀନଧାରୀ ମହିମା ସମାଜର ୫୦% ଅଧିକାର ଥିବା ହାଇକୋର୍ଟ କହିଛନ୍ତି। ଏହା ପାଳନ ହେବା ଜରୁରୀ। ଯୋରନ୍ଦାରେ ଥିବା ଖାତା ନଂ. ୪୪୯ର ସମସ୍ତ ଭୂ-ସମ୍ପତ୍ତି ମାଲିକାନାରେ ସଂଶୋଧନ କରି ବକ୍କ୍ବଳଧାରୀ ମହିମା ସମାଜ ନାମ ସହିତ ସଂଯୋଗ କରିବାକୁ ଢେଙ୍କାନାଳ ଉପଜିଲାପାଳଙ୍କ ପାଖରେ ଅପିଲ କରାଯାଇଛି। କିନ୍ତୁ ଏହି ବିବାଦର ଫଇସଲା ହେଉନାହିଁ। ଉଭୟ ପକ୍ଷର ସହମତି ଭିତ୍ତିରେ ଗାଦିମନ୍ଦିର ବେଢ଼ାରେ ଭଙ୍ଗାଯାଇଥିବା ୩ ମନ୍ଦିର ତିଆରି କରିବାକୁ ସ୍ଥାନ ଚିହ୍ନଟ, ଏଥିଲାଗି ଆବଶ୍ୟକ ସହାୟତା ଯୋଗାଇଦେବା, ଏଣିକି ପୀଠରେ କୌଣସି ନିର୍ମାଣ ପୂର୍ବରୁ ଉଭୟ ପକ୍ଷର ସ୍ବୀକୃତି ନେବା ଲାଗି ଦାବି କରାଯାଇଛି। ସମସ୍ୟା ସମାଧାନ ଲାଗି ଗତ ୯ ଏବଂ ୧୦ ତାରିଖରେ ଓଡ଼ିଶା, ଆନ୍ଧ୍ରପ୍ରଦେଶ, ତେଲଙ୍ଗାନା, ଛତିଶଗଡ଼, ଝାଡ଼ଖଣ୍ଡ, ଆସାମର କୌପୀନଧାରୀ ମହିମା ସାଧୁସନ୍ଥମାନେ ଓଡ଼ିଶାର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଥିଲେ। ତଥାପି ସରକାର କୌଣସି ପଦକ୍ଷେପ ନେଉ ନ ଥିବାରୁ ସେମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଆସନ୍ତା ଫେବୃୟାରୀରେ ବିଶ୍ୱ ପ୍ରସିଦ୍ଧ ମାଘମେଳା ରହିଛି। ଏହାପୂର୍ବରୁ ସମସ୍ୟାର ସମାଧାନ କରିବାକୁ ଜିଲାପାଳଙ୍କୁ ଅନୁରୋଧ କରାଯାଇଛି।