ପୁଣେ,୨୪।୩: କର୍ନାଟକ ଯୁବ ଦ୍ରୁତ ବୋଲର ପ୍ରସିଦ୍ଧ କ୍ରିଷ୍ଣା ପଦାର୍ପଣ ମ୍ୟାଚ୍ରେ ଦମ୍ଦାର ପ୍ରଦର୍ଶନ କରିଛନ୍ତି। ଇଂଲଣ୍ଡ ବିପକ୍ଷ ପ୍ରଥମ ଦିନିକିଆରେ ସେ ୮.୧ ଓଭର ବୋଲିଂ କରି ୫୪ ରନ ବ୍ୟୟ କରିବା ସହ ମୂଲ୍ୟବାନ ୪ ଉଇକେଟ ଅକ୍ତିଆର କରି ବିଜୟରେ ପ୍ରମୁଖ ଭୂମିକା ଗ୍ରହଣ କରିଛନ୍ତି। ୨୫ ବର୍ଷୀୟ କ୍ରିଷ୍ଣା ଏଥିସହ ପ୍ରଥମ ଭାରତୀୟ ବୋଲର ଭାବେ ପଦାର୍ପଣରେ ୪ କିମ୍ବା ତାଠାରୁ ଅଧିକ ଉଇକେଟ ହାସଲ କରି ବିରଳ ସଫଳତା କରି ଓ ରାତାରାତି ପ୍ରସିଦ୍ଧ ହୋଇଛନ୍ତି। ତେବେ ପ୍ରଥମ ୩ ଓଭର ବୋଲିଂ କରି ସେ ୩୭ ରନ ଦେଇ ବୟବହୁଳ ସାବ୍ୟସ୍ତ ହୋଇଥିଲେ। ଦୁଇ ଓପନର ଜାସନ ରୟ ଓ ଓ ଜନି ବେୟାରଷ୍ଟୋ ଆରମ୍ଭରୁ ଆକ୍ରମଣ କରିଥିଲେ। ରୟଙ୍କୁ ଆଉଟ କରିବା ସହ ସେ ଭାରତକୁ ବ୍ରେକ୍ ଥ୍ରୁ ଦେଇଥିଲେ ଓ ଓପନିଂ ପାର୍ଟନରଶିପ୍କୁ ଭାଙ୍ଗିଥିଲେ।
ଆରମ୍ଭରୁ ବ୍ୟୟ ବହୁଳ ସାବ୍ୟସ୍ତ ହେବା କଥାକୁ ସେ ସ୍ବୀକାର କରିଛନ୍ତି। ରୟଙ୍କୁ ଆଉଟ କରିବା ପରେ ନିୟମିତ ଭାବେ ଉଇକେଟ ଅକ୍ତିଆର କରିବାରେ ଆମେ ସଫଳ ହୋଇଥିଲୁ ବୋଲି କ୍ରିଷ୍ଣା କହିଛନ୍ତି। ନିଜର ପ୍ରଥମ ୩ ଓଭର ପରେ ଫୁଲ୍ ଲେନ୍ଥ ବୋଲିଂ ନ କରିବାକୁ ଚିନ୍ତା କରିଥିଲା। ଗୁଡ୍ ଲେନ୍ଥ ଏରିଆରେ ବଲ୍ ମାଡ କରିଥିଲି ଓ ଏହା କାମ ଦେଇଥିଲା। କିଛିଦିନ ତଳେ ଅନୁଷ୍ଠିତ ହୋଇଥିବା ଦେଶର ସର୍ବବୃହତ୍ ଦିନିକିଆ ଟୁର୍ନାମେଣ୍ଟ ବିଜୟ ହଜାରେ ଟ୍ରଫିରେ କ୍ରିଷ୍ଣା ବେଶ୍ ଉଚ୍ଚକୋଟୀର ପ୍ରଦର୍ଶନ କରିଥିଲେ। ୭ଟି ମ୍ୟାଚ୍ ଖେଳି ସେ ୨୪.୫ ରନ ହାରରେ ୧୪ଟି ଉଇକେଟ ହାସଲ କରି ଚୟନକର୍ତ୍ତାଙ୍କ ଦୃଷ୍ଟି ଆକର୍ଷଣ କରିଥିଲେ। ସେହିପରି କୋଲକାତା ନାଇଟ ରାଇଡର୍ସ (କେକେଆର) ତରଫରୁ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଖେଳି ସଫଳ ହୋଇଛନ୍ତି। ଆଇପିଏଲ ମୋତେ ବହୁତ ସାହାଯ୍ୟ କରିଛି। ତେବେ ଦିନିକିଆରେ ପ୍ରଥମେ ବ୍ୟୟ ବହୁଳ ସାବ୍ୟସ୍ତ ହେବା ପରେ ପ୍ରତ୍ୟାବର୍ତ୍ତନ କରି ଉଇକେଟ ହାସଲ କରିବା ବଡ଼ କଥା ବୋଲି ସେ ମ୍ୟାଚ୍ ପରେ କହିଛନ୍ତି। ଗୁଡ୍ ଲେନ୍ଥ ଏରିଆରେ ବୋଲିଂ କରି ଟ୍ରାକ୍ରୁ ଅତିରିକ୍ତ ବାଉନ୍ସର ସୁବିଧା ମିଳିଥିଲା। ଆଗକୁ ବଡ଼ ବଡ଼ ପାର୍ଟନରଶିପ୍ ଭାଙ୍ଗିବାକୁ ସକ୍ଷମ ହୋଇପାରିବି ବୋଲି ଆଶା କରୁଛି। ଦଳ ମଧ୍ୟ ଏହା ଆବଶ୍ୟକ କରୁଛି ୬ ଫୁଟ ଉଚ୍ଚତା ବିଶିଷ୍ଟ କ୍ରିଷ୍ଣା କହିଛନ୍ତି। ସେ ପଦାର୍ପଣ କରିବା ପୂର୍ବରୁ ଅଧିନାୟକ ବିରାଟ କୋହଲିଙ୍କ ଦ୍ୱାରା ପ୍ରଶଂସିତ ହୋଇଥିଲେ। କ୍ରିଷ୍ଣାଙ୍କ ପାଖରେ ସ୍ବତନ୍ତ୍ର ପ୍ରତିଭା ରହିଛି ବୋଲି କୋହଲି କହିଥିଲେ।
