ଝରିଗାଁ,୯।୧୨(କିଶୋର ଚନ୍ଦ୍ର ମଣ୍ଡଳ) ମକା ମିଲିଂ ବେଳେ ମେଶିନରେ ଡାହାଣ ଗୋଡ଼ ପଶି ଗୁରୁତର ଥିବା ନାବାଳଙ୍କ ଚିକିତ୍ସାଧୀନ ଅବସ୍ଥାରେ ବିଶାଖାପାଟଣାରେ ମୃତ୍ୟୁ ହୋଇଛି। ପରିବାର ଲୋକେ ଗାଡ଼ି ଭଡ଼ାକରି ମୃତଦେହ ଗାଁକୁ ଆଣୁଥିବା ତାଙ୍କ ସମ୍ପର୍କୀୟ ଭାଇ ବିଶୁ ମାଳି ସୂଚନା ଦେଇଛନ୍ତି।
ମିଳିଥିବା ସୂଚନା ମୁତାବକ, ରବିବାର କୃଷ୍ଣ ନିଜ ସମ୍ପର୍କୀୟଙ୍କ ମକା ମିଲିଂ କରିବା ପାଇଁ କିଛି ଲୋକଙ୍କ ସହ ଯାଇଥିଲେ। ସେତିକିବେଳେ ଘର ଲୋକେ କୃଷ୍ଣଙ୍କୁ ଯିବା ପାଇଁ ମନା କରିବା ସତ୍ତ୍ୱେ ସେ ଯାଇଥିଲେ।
ମକା ମିଲିଂ ଗାଡ଼ିରେ ମକା ପକାଇବା ପରେ ପ୍ରଥମ ଥର ମେଶିନ ଜାମ ହୋଇ ଯାଇଥିଲା। ଏହା ଦେଖି କୃଷ୍ଣ ଡାହାଣ ଗୋଡ଼ରେ ମକାଗୁଡିକୁ ଚାପିବା ପରେ ପୁଣି ମେଶିନ ଚାଲିଥିଲା। ଦ୍ୱତୀୟ ଥର ପୁଣି ମେଶିନ ଜାମ ହେବାରୁ କୃଷ୍ଣ ପୁଣି ମକାଗୁଡିକୁ ଗୋଡ଼ରେ ଚାପି ଥିଲେ। ସେତିକିବେଳେ ମେଶିନରେ କୃଷ୍ଣଙ୍କ ଗୋଡ଼ ପଶି ଯାଇଥିଲା। ଫଳରେ ଡାହାଣ ଗୋଡ଼ ଆଣ୍ଠୁଠାରୁ ତଳେ ହାଡ଼ ଓ ମାଂସ ଅଲଗା ହୋଇଯାଇଥିଲା।
ପରିବାର ଲୋକେ ଗୁରୁତର ଅବସ୍ଥାରେ କୃଷ୍ଣଙ୍କୁ ଉଦ୍ଧାର କରି ୧୦୮ ଆମ୍ବୁଲାନ୍ସ ଯୋଗେ ଝରିଗାଁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନେଇଥିଲେ। ଅବସ୍ଥା ଗୁରୁତର ଥିବାରୁ ଡାକ୍ତର ଆମ୍ବୁଲାନ୍ସରେ ହିଁ ପ୍ରାଥମିକ ଚିକିତ୍ସା କରି ନବରଙ୍ଗପୁର ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଥିଲେ। ସେଠାରୁ ତାଙ୍କୁ ବିଶାଖାପାଟଣା ନିଆଯାଇଥିଲା। ସେଠାରେ ଚିକିତ୍ସାଧିନ ଅବସ୍ଥାରେ କୃଷ୍ଣଙ୍କ ମୃତ୍ୟୁ ଘଟିଥିବା ସମ୍ପର୍କୀୟ ପ୍ରକାଶ କରିଛନ୍ତି। କୃଷ୍ଣ ଝରିଗାଁ ହାଇସ୍କୁଲର ନବମ ଶ୍ରେଣୀରେ ପଢୁଥିଲେ। କୃଷ୍ଣଙ୍କ ମୃତ୍ୟୁ ଖବର ପାଇ ଗାଁରେ ଶୋକର ଛାୟା ଖେଳି ଯାଇଛି।
