ଚାନ୍ଦବାଲି,୨୯।୧୦(ଡି.ଏନ.ଏ.)-ମହାରାଷ୍ଟ୍ର ପୁଣେରେ ଅନୁଷ୍ଠିତ ମିସ୍ ଫ୍ୟାଶନିଷ୍ଟ-୨୦୨୧ରେ ବିଜୟୀ ହୋଇ ଭଦ୍ରକ ଜିଲା ଚାନ୍ଦବାଲି ବ୍ଲକ ଅଧୀନ ପାଞ୍ଚପଡ଼ା ଗ୍ରାମର ଝିଅ କ୍ରିଷ୍ଣା ସାହୁ ଓଡ଼ିଶା ପାଇଁ ଗୌରବ ଆଣିଛନ୍ତି। ଏହି ପ୍ରତିଯୋଗିତାରେ ସମସ୍ତଙ୍କୁ ପଛରେ ପକାଇ ବିଜୟୀ କ୍ରାଉନ ପିନ୍ଧିଛନ୍ତି କ୍ରିଷ୍ଣା।
ନିକଟରେ ପୁଣେର ସିଲଫିନା ମିଡିଆ ଦ୍ୱାରା ଆୟୋଜିତ ଏହି ପ୍ରତିଯୋଗିତାରେ ଦେଶର ବିଭିନ୍ନ ରାଜ୍ୟରୁ ବଛା ବଛା ୫୦ ପ୍ରତିଯୋଗୀ ଅଂଶଗ୍ରହଣ କରିଥିଲେ। ଏଥିରେ ଗ୍ରାଣ୍ଡ ଫିନାଲେରେ କ୍ରିଷ୍ଣା ମିସ୍ କାଟାଗୋରି ବିଜେତା ହୋଇଛନ୍ତି। ଅବସରପ୍ରାପ୍ତ ଆର୍ମି ସୁବେଦାର ମେଜର ଗଙ୍ଗାଧର ସାହୁ ଏବଂ ଅମିତା ସାହୁଙ୍କ ଝିଅ କ୍ରିଷ୍ଣା। ଚାନ୍ଦବାଲିର ପ୍ରତିଷ୍ଠିତ ବ୍ୟବସାୟୀ ତଥା ସାମାଜିକ କର୍ମୀ ହରିହର ସାହୁଙ୍କ ନାତୁଣୀ। ଛୋଟ ବେଳୁ ଚାନ୍ଦବାଲିରେ ନିଜ ଅଜା ଏବଂ ଆଈଙ୍କ ପାଖରେ ବଢ଼ିଥିବା ବେଳେ ସ୍କୁଲ ସମୟରୁ ସେ ପାଠପଢ଼ା ସହ ନାଚ ଗୀତ, ମଡେଲିଂ ଆଉ ଆଙ୍କରିଂ କରି ବହୁ ସ୍ଥାନରେ ପୁରସ୍କୃତ ହୋଇଥିଲେ। ସେ ଜଣେ ସଫ୍ଟଓ୍ବେର ଇଞ୍ଜିନିୟର। ୨୦୨୦ରେ କୋଭିଡ୍ ଲକ୍ଡାଉନ ସମୟରେ ଓଡ଼ିଶାରେ ସାର୍ଥକ ରଜ କୁଇନ ପ୍ରତିଯୋଗିତାରେ ବିଜୟୀ ହୋଇଥିଲେ। ଆଉ ଏବେ ପୁଣେରେ ମିସ୍ ଫ୍ୟାଶନିଷ୍ଟ ବିଜୟୀ ହେବା ପରେ ତାଙ୍କ ପାଖକୁ ଶୁଭେଚ୍ଛାର ସୁଅ ଛୁଟୁଛି। ତାଙ୍କ ଆଈ ଅଜାଙ୍କ ଆଶୀର୍ବାଦ ଏବଂ ଭଉଣୀ କାଜଲ ରାଣୀ ସାହୁଙ୍କ ସହଯୋଗ ପାଇଁ ସେ ଏହି ସଫଳତା ପାଇପାରିଥିବା କହିଛନ୍ତି।