ମଥୁରାନଗରୀ/ଗୋପପୁର,୬।୧(ପ୍ରେମାନନ୍ଦ ଖମାରୀ): ବୃହତ୍ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା ମହୋତ୍ସବରେ ସୋମବାର ଥିଲା ଚତୁର୍ଥ ଦିବସ। କୃଷ୍ଣଙ୍କ ବାଲ୍ୟଲୀଳା ଦୃଶ୍ୟାଭିନୟ ଦେଖିବା ପାଇଁ ମଥୁରା ନଗରୀ ଭଳି ଗୋପପୁରରେ ମଧ୍ୟ ପ୍ରବଳ ଭିଡ଼ ପରିଲକ୍ଷିତ ହୋଇଥିଲା। ନନ୍ଦରାଣୀ, ନନ୍ଦରାଜା ମେଳାଣି ଦେବା ପରେ ବେନିଭାଇ ଶ୍ରୀକୃଷ୍ଣ, ବଲରାମ ଗୋପାଳ ବାଳକଙ୍କ ଗହଣରେ ଗୋପଦାଣ୍ଡ ପରିକ୍ରମା କରିଥିଲେ। ପରିକ୍ରମାବେଳେ ଗୋପବାସୀ ବେନିଭାଇଙ୍କୁ ପୂଜାର୍ଚ୍ଚନା କରିଥିଲେ। ଏହାପରେ ଶ୍ରୀକୃଷ୍ଣ, ବଳରାମ ଗୋପଦାଣ୍ଡକୁ ପହଞ୍ଚି ଥିଲେ। ଶ୍ରୀକୃଷ୍ଣଙ୍କୁ ମାରିବା ପାଇଁ ସେଠାକୁ କଂସ ପ୍ରେରିତ ବକା, ଶକଟା, ତୃଣା, ଧେନୁ, ଷଣ୍ଢାସୁର ଆଦି ରାକ୍ଷସୀ, ରାକ୍ଷସ ପହଞ୍ଚିଥିଲେ। କିନ୍ତୁ ଶ୍ରୀକୃଷ୍ଣଙ୍କ ସ୍ପର୍ଶରେ ଜଣେ ପରେ ଜଣେ ରାକ୍ଷସୀ, ରାକ୍ଷସ ନିହତ ହୋଇଥିଲେ। ଅନ୍ୟପଟେ ପୂର୍ବଦିନ ଭଳି ମଥୁରାଧିପତି ମହାରାଜ କଂସ ରାଜମହଲରୁ ମଥୁରା ଭ୍ରମଣରେ ବାହାରିଥିଲେ। ସ୍ଥାନୀୟ ସେଲ୍ସଟ୍ୟାକ୍ସ ଅଫିସ ପରିସରରେ ଥିବା ମୁକ୍ତେଶ୍ୱର ମନ୍ଦିରକୁ ପହଞ୍ଚତ୍ ରୁଦ୍ରାଭିଷେକ କରିଥିଲେ। ଶୂନ୍ୟବାଣୀ ଶୁଣିବା ପରଠାରୁ ବିଚଳତ କଂସ ରଙ୍ଗମହଲକୁ ଯାଇ ବିଭିନ୍ନ ସାଂସ୍କୃତିକ ଦଳର ନୃତ୍ୟରେ ନିଜ ଅଶାନ୍ତ ମନକୁ ଶାନ୍ତ କରିଥିଲେ। ପରେ ରାଜ ଦରବାରକୁ ଯାଇ ମଥୁରା ନଗରୀ ଖବର ବୁଝିଥିଲେ। ତେବେ ଗୋପପୁରକୁ ତାଙ୍କ ପ୍ରେରିତ ରାକ୍ଷସୀ, ରାକ୍ଷସ ନିଧନ ଖବର ପାଇ କଂସ ମହାରାଜ ଆହୁରି ବିଚଳିତ ହୋଇ ପଡ଼ିଥିଲେ ଏବଂ ପୁଣି ସାଂସ୍କୃତିକ ଦଳର ନାଚଗୀତରେ ନିଜ ମନକୁ ଶାନ୍ତ କରିବାକୁ ପ୍ରୟାସ କରିଥିଲେ।
