ଅଭିନେତା କମଲ ରସିଦ ଖାନ ଓରଫ୍ କେଆରକେ ପ୍ରାୟତଃ ସୋସିଆଲ ମିଡିଆରେ କିଛି ପ୍ରସଙ୍ଗରେ ନିଜର ମତ ପ୍ରକାଶ କରି ଚର୍ଚ୍ଚାରେ ରହିଥାନ୍ତି। ସେ କେବଳ ବଲିଉଡ ତାରକାଙ୍କ ଗୋଡ ଟାଣନ୍ତି ନାହିଁ, ବେଳେବେଳେ ବିଭିନ୍ନ କ୍ଷେତ୍ରରେ ପରିଚିତ ଲୋକଙ୍କ ବିଷୟରେ ସେ ନିଜ ମତ ଦିଅନ୍ତି। ଆଜି ଭାରତ ଓ ପାକିସ୍ତାନ ମ୍ୟାଚ ପୂର୍ବରୁ କେଆରକେ ବିରାଟ କୋହଲିଙ୍କୁ ଟାର୍ଗେଟ କରିଛନ୍ତି। ଦଳରେ ବିରାଟ କୋହଲିଙ୍କ ଚୟନ ଉପରେ ମଧ୍ୟ ପ୍ରଶ୍ନ ଉଠାଇଛନ୍ତି।
କେଆରକେ ପ୍ରଥମେ ଅନୁଷ୍କା ଏବଂ ବିରାଟଙ୍କ ଉପରେ ଏକ ଟୁଇଟ୍ କରି କହିଛନ୍ତି, ‘ବିରାଟ କୋହଲି ହେଉଛନ୍ତି ଭାରତର ପ୍ରଥମ କ୍ରିକେଟର, ଯାହାର ଅବସାଦ ସମସ୍ୟା ରହିଛି। ଜଣେ ଅଭିନେତ୍ରୀଙ୍କୁ ବିବାହ କରିବାର ଏହା ହେଉଛି ଫଳାଫଳ। ଅନୁଷ୍କା ବର୍ତ୍ତମାନ ଏହି କଥାକୁ ତାଙ୍କ ମନରେ ନେବା ଉଚିତ୍ ଯେ ବିରାଟଙ୍କର ଡିପ୍ରେସନର ସମସ୍ୟା ଅଛି। ଯଦି ବିରାଟଙ୍କ ଡିପ୍ରେସନ ସମସ୍ୟା ଥିବା ସେ ନିଜେ କହୁଛନ୍ତି, ତେବେ ତାଙ୍କୁ କାହିଁକି ଏସିଆ କପ୍ ଦଳରେ ଚୟନ କରାଗଲା। କ’ଣ ଚୟନକର୍ତ୍ତା ବି ଡିପ୍ରେସନ୍ର ଶିକାର ଅଛନ୍ତି କି ବୋଲି ସେ ପ୍ରଶ୍ନ କରିଛନ୍ତି।
କେଆରକେ କେବଳ ଏତିକିରେ ଅଟକି ନ ଥିଲେ, ସେ ଆଉ ଏକ ଟୁଇଟ କରି ଲେଖିଥିଲେ- ଉତ୍ତର ଭାରତର ଜଣେ ଶକ୍ତିଶାଳୀ ବ୍ୟକ୍ତି (ବିରାଟ କୋହଲି) କିପରି ଡିପ୍ରେସନର ଶିକାର ହେଲେ। ତେବେ ସୋସିଆଲ ମିଡିଆରେ ବହୁ ସମାଲୋଚନା ପରେ କେଆରକେ ଏହି ଟୁଇଟ୍ ସବୁ ଡିଲିଟ କରିଦେଇଛନ୍ତି।
ସୂଚନାଯୋଗ୍ୟ, ଭାରତର ପୂର୍ବତନ ଅଧିନାୟକ ବିରାଟ କୋହଲି କିଛି ଦିନ ହେବ ଖରାପ ଫର୍ମ ଦେଇ ଗତି କରୁଛନ୍ତି। ଏଥିପାଇଁ ତାଙ୍କୁ ସମାଲୋଚନା କରାଯାଉଛି। ନଭେମ୍ବର ୨୦୧୯ ଠାରୁ କୋହଲି ଅନ୍ତର୍ଜାତୀୟ କ୍ରିକେଟରେ ଶତକ ହାସଲ କରିନାହାଁନ୍ତି। ଗତ ମାସରେ ଇଂଲଣ୍ଡ ବିପକ୍ଷ ସିରିଜ ପରେ ସେ ବିରତି ନେଇଥିଲେ। ଏବେ ବିରାଟ ଟିମ ଇଣ୍ଡିଆକୁ ଫେରିଛନ୍ତି। ସେ ଏସିଆ କପରେ ରନ ସ୍କୋର କରିବାକୁ ପ୍ରସ୍ତୁତ ଅଛନ୍ତି। ନିକଟରେ ବିରାଟ କୋହଲି ଏକ ସାକ୍ଷାତକାରରେ ନିଜ ଡିପ୍ରେସନକୁ ନେଇ କହିଥିଲେ।
