ଭଦୋଦରା, ୧ା୭ (ପି.ଟି.):କୋଭିଡ୍-୧୯ ମହାମାରୀ ଯୋଗୁ ୩ ମାସରୁ ଅଧିକ ଦିନ ଧରି ଘରର ଚାରି କାନ୍ଥ ଭିତରେ ରହିବା ପରେ ଭାରତ ଅଲ୍ରାଉଣ୍ଡର କ୍ରୁନାଲ ପାଣ୍ଡ୍ୟା ମଙ୍ଗଳବାରଠାରୁ ଆଉଟ୍ଡୋର୍ ଟ୍ରେନିଂ ଆରମ୍ଭ କରିଛନ୍ତି। ହାର୍ଦ୍ଦିକ ପାଣ୍ଡ୍ୟାଙ୍କ ବଡ଼ ଭାଇ ତଥା ବରୋଦାର ଏହି କ୍ରିକେଟର ଏପର୍ଯ୍ୟନ୍ତ ଭାରତର ତରଫରୁ ୮୧ ଅନ୍ତର୍ଜାତୀୟ ଟି୨୦ ଖେଳିସାରିଛନ୍ତି। ପଡ଼ିଆରେ ଦୌଡ଼ ଲଗାଇବା ସହ ସେ ତାଙ୍କ ଟ୍ରେନିଂ ଆରମ୍ଭ କରିଥିଲେ। ଅଭ୍ୟାସ ସମୟର ଏକ ଫଟୋ ସେ ତାଙ୍କ ଟୁଇଟର ପେଜ୍ରେ ପୋଷ୍ଟ କରିଛନ୍ତି। କୋଭିଡ୍-୧୯ ମହାମାରୀ ପରେ ସରକାର ଦେଶବ୍ୟାପୀ ଲକ୍ଡାଉନ୍ କାର୍ଯ୍ୟକାରୀ କରିବାରୁ ଅନ୍ୟ ସମସ୍ତ କ୍ରିକେଟରଙ୍କ ଭଳି କ୍ରୁନାଲ ମାର୍ଚ୍ଚ ୨୫ଠାରୁ ନିଜ ବାସଭବନରେ ଆବଦ୍ଧ ରହିଆସିଥିଲେ। ଭାରତୀୟ ପେସ୍ ବୋଲର ଶାର୍ଦ୍ଦୁଳ ଠାକୁର ବିସିସିଆଇ ସ୍ବୀକୃତିପ୍ରାପ୍ତ ପ୍ରଥମ ଖେଳାଳି ଭାବେ ଗତ ମାସରେ ଟ୍ରେନିଂ ଆରମ୍ଭ କରିଥିଲେ। ମହାରାଷ୍ଟ୍ରର ପାଲ୍ଘର ଜିଲା ଅନ୍ତର୍ଗତ ବୋଇସାରଠାରେ ସେ ନେଟ୍ସରେ ବୋଲିଂ ଅଭ୍ୟାସ କରିଥିଲେ। ନିକଟରେ ଭାରତର ଟେଷ୍ଟ ସ୍ପେଶାଲିଷ୍ଟ ଚେତେଶ୍ୱର ପୂଜାରା ତାଙ୍କ ଜନ୍ମସ୍ଥାନ ରାଜକୋଟ୍ରେ ନେଟ୍ସରେ ବ୍ୟାଟିଂ ଅଭ୍ୟାସ ଆରମ୍ଭ କରିଛନ୍ତି।
