ସମ୍ବଲପୁର,୧୭ା୨(ବ୍ୟୁରୋ):କେବଳ ରାଜ୍ୟରେ ନୁହେଁ ଜାତୀୟ ବଜାରରେ ଉପଲବ୍ଧ ହେବ କୁଚିଣ୍ଡା ଲଙ୍କାଗୁଣ୍ଡ। ଏନେଇ ସମ୍ମିଳିତ ଉଦ୍ୟମ ଆରମ୍ଭ ହୋଇଛି। ସମ୍ବଲପୁର ଜିଲା କୁଚିଣ୍ଡା ଉପଖଣ୍ଡରେ ପ୍ରଚୁର ଲଙ୍କା ଚାଷ ହୋଇଥାଏ। ହେଲେ ବିଭିନ୍ନ କାରଣରୁ ସ୍ଥାନୀୟ ଚାଷୀମାନେ ଅଭାବୀ ବିକ୍ରିର ଶିକାର ହୋଇଥାନ୍ତି। ଏବେ ବାହାରେ ଯେପରି ଏହି ଲଙ୍କା ବିକ୍ରି କରାଯାଇପାରିବ ସେ ନେଇ ପ୍ରୟାସ ଆରମ୍ଭ ହୋଇଛି। କୁଚିଣ୍ଡା ଆର୍ଏମ୍ସି, ଆଇଟିଡିଏ, ଜିଲା କୃଷି ଓ ଉଦ୍ୟାନ ବିଭାଗ, ଓଏଲ୍ଏମ୍, ଓର୍ମାସ ମିଳିିତ ଭାବେ ପଦକ୍ଷେପ ନେଇଛନ୍ତି। କୁଲାଙ୍ଗଯୋର ଗ୍ରାମରେ ୨୦ ଲକ୍ଷ ଟଙ୍କା ବ୍ୟୟ ଅଟକଳରେ ଗୋଦାମ ଗୃହ, ପ୍ରୋସେସିଂ ୟୁନିଟ୍ ସ୍ଥାପନ କରାଯାଇଛି। ଏହା ସହ ଚାଷୀମାନଙ୍କୁ ତାଲିମ ଦିଆଯାଇ ପରୀକ୍ଷାମୂଳକ ଭାବେ ଲଙ୍କାଗୁଣ୍ଡ ତିଆରି ଆରମ୍ଭ ହୋଇଛି। ଏହାକୁ ପ୍ୟାକେଟ କରାଯାଇ ବିଭିନ୍ନ ମେଳା, ସ୍ଥାନୀୟ ବଜାରରେ ବିକ୍ରି କରାଯାଉଛି। ଜାତୀୟ ବଜାରରେ ମଧ୍ୟ ବିକ୍ରି ପାଇଁ ଇ-ନାମରେ ପଞ୍ଜୀକରଣ କରାଯାଇଛି। ଯେଭଳି ଅଧିକ ଚାଷୀ ସେମାନଙ୍କ ଉତ୍ପାଦିତ ଫସଲ ବିକ୍ରି କରି ଉପକୃତ ହୋଇପାରିବେ ସେ ନେଇ ଏକ ଘରୋଇ କମ୍ପାନୀ ସହ ଆଲୋଚନା କରାଯାଇଛି। କମ୍ପାନୀ ସହିତ ଏମ୍ଓୟୁ ହେବା ପରେ ଅଧିକ ପରିମାଣରେ ଲଙ୍କାଗୁଣ୍ଡ ତିଆରି କରି ବିକ୍ରି କରାଯିବ। ଏଥିପାଇଁ ଅଧିକ ୟୁନିଟ୍ ମଧ୍ୟ ସ୍ଥାପନ କରାଯିବ ବୋଲି ସୂଚନା ଦିଆଯାଇଛି।
ଅନ୍ୟପଟେ ପ୍ରକଳ୍ପ କାର୍ଯ୍ୟକାରୀ କରିବାକୁ ପ୍ରାଥମିକ ଭାବେ ୧୬୬ ହେକ୍ଟର ଜମି ଚାଷ କରିବା ଯୋଜନା ରହିଛି। ୨୧୦ ଜଣ ଏସ୍ଏଚ୍ଜି ସଦସ୍ୟଙ୍କୁ ଏଥିରେ ସାମିଲ କରାଯାଇଛି। ୟୁନିଟ୍ ପରିଚାଳନା ପାଇଁ ୧୦ ପ୍ରଡ୍ୟୁସର ଗ୍ରୁପ, ୫ ଏଫ୍ପିଓ ଗଠନ କରାଯାଇଛି ବୋଲି ଓର୍ମାସ ନିର୍ଦ୍ଦେଶକ ଶ୍ରୀମନ୍ତ ହୋତା କହିଛନ୍ତି। ଉଦ୍ୟାନ ବିଭାଗ ସହକାରୀ ନିର୍ଦ୍ଦେଶକ ରଞ୍ଜନ କୁମାର ଦାସ ମହାପାତ୍ର କହିଛନ୍ତି, କୁଚିଣ୍ଡା ଅଞ୍ଚଳରେ ୪୭୮୬ ହେକ୍ଟର ଜମିରେ ଲଙ୍କା ଚାଷ ହେଉଛି। ଚଳିତବର୍ଷ ୩୫ ହଜାର ଟନ୍ ଶୁଖିଲା ଲଙ୍କା ଉତ୍ପାଦନ ହେବା ଆଶା କରାଯାଉଛି। ଯେଭଳି ଅଧିକ ସଂଖ୍ୟାରେ ପ୍ରୋସେସିଂ ୟୁନିଟ୍ ସ୍ଥାପନ କରି ଲଙ୍କାଗୁଣ୍ଡ ବଜାରରେ ବିକ୍ରି କରାଯାଇପାରିବ ସେ ନେଇ ପଦକ୍ଷେପ ଗ୍ରହଣ କରାଯିବ।
