ପାଟଣା,୩।୧୦(ସ୍ବ.ପ୍ର.): କେନ୍ଦୁଝର ଜିଲା ପାଟଣା ବ୍ଲକ ଛକରେ ସୋମବାର ଓଡ଼ିଶା କୁଡୁମୀ ସେନା ପକ୍ଷରୁ କେନ୍ଦ୍ରମନ୍ତ୍ରୀ ବିଶ୍ୱେଶ୍ୱର ଟୁଡୁଙ୍କ କୁଶ ପୁତ୍ତଳିକା ଦାହ କରାଯାଇଛି।
ସୂଚନାଯୋଗ୍ୟ, କୁଡୁମୀ ଜାତିକୁ ଆଦିବାସୀ ତାଲିକାଭୁକ୍ତ କରିବା ଦାବିରେ ଓଡ଼ିଶା କୁଡୁମୀ ସେନା ପକ୍ଷରୁ ବିଭିନ୍ନ ସମୟରେ ଆନ୍ଦୋଳନ ଚାଲିଥିବା ବେଳେ କିଛିଦିନ ତଳେ ମନ୍ତ୍ରୀ ଟୁଡୁ କୁଡୁମୀ ସେନାକୁ ଆକ୍ଷେପକରି କୁଡୁମୀ ସେନା ଶହେ ବର୍ଷ ଏଭଳି ଆନ୍ଦୋଳନ କଲେ ବି କିଛି ଲାଭ ହେବ ନାହିଁ ବୋଲି କହିଥିଲେ।
ଏହାର ପ୍ରତିବାଦ କରି ଓଡ଼ିଶା କୁଡୁମୀ ସେନା ପକ୍ଷରୁ ସେନା ରାଜ୍ୟ ସଭାପତି ଦିବ୍ୟସିଂ ମହାନ୍ତ, ଉପସଭାପତି ମିତ୍ରଭାନୁ ମହାନ୍ତ, ନାରୀ ନେତ୍ରୀ ଧରିତ୍ରୀ ମହାନ୍ତ, ସଞ୍ଜୁ ଲତା ମହାନ୍ତ, ଦ୍ରୌପଦୀ ମହାନ୍ତ, ବିନତି ମହାନ୍ତ, ତ୍ରିନାଥ ମହାନ୍ତ ତ୍ରିଲୋଚନ ମହାନ୍ତ, ଗୋପାଳ ମହାନ୍ତ, ଭୁତ ମହାନ୍ତ, ରତ୍ନାକର ମହାନ୍ତ, ବସନ୍ତ ମହାନ୍ତଙ୍କ ସହ ମହିଳା ଓ ପୁରୁଷ କର୍ମକର୍ତ୍ତା ଆନନ୍ଦେଶ୍ୱର ଶିବଶ୍ମନ୍ଦିରରୁ ଏକ ବିଶାଳ ରାଲିରେ ବାହାରିଥିଲେ। ଏପରିକି ପାଟଣା ବଜାର ପରିକ୍ରମା ପରେ ବ୍ଲକ ଛକ ନିକଟରେ ମନ୍ତ୍ରୀ ଟୁଡୁଙ୍କ କୁଶ ପୁତ୍ତଳିକା ଦାହ କରିଥିଲେ।