ମୁମ୍ବାଇ,୨୯।୪: ଚଳିତ ବର୍ଷ ଟି-୨୦ କ୍ରିକେଟର ସବୁଠାରୁ ବଡ଼ ଟୁର୍ନାମେଣ୍ଟ ‘ଆଇସିସି ଟି୨୦ ବିଶ୍ୱକପ୍’ର ଆୟୋଜନ ହେବାକୁ ଯାଉଛି। ଏବେ ଆଇପିଏଲ୍ ଚାଲିଥିବାରୁ ସମସ୍ତ ଦେଶର ନଜର ନିଜ ନିଜ ଖେଳାଳିଙ୍କ ଉପରେ ରହିଛି। ଏହି କ୍ରମରେ ଭାରତୀୟ କ୍ରିକେଟ ଟିମ୍ରେ ସ୍ଥାନ ପାଇବା ଲାଗି ପ୍ରତିଯୋଗିତା ତିବ୍ର ହୋଇଛି। ଏହି ଦୌଡ଼ରେ ସ୍ପିନର କୁଲଦୀପ ଯାଦବ ଏବଂ ୟୁଜବେନ୍ଦ୍ର ଚହଲଙ୍କ ଯୋଡ଼ି ନିଶ୍ଚିତ ଭାବେ ଦଳରେ ସାମିଲ ହେବେ ବୋଲି ଆଶା କରାଯାଉଛି।
ଏକ ସମୟ ଥିଲା କୁଲଦୀପ-ଚହଲଙ୍କ ଯୋଡ଼ି ଅନ୍ତରାଷ୍ଟ୍ରୀୟ ସ୍ତରରେ ଉଲ୍ଲେଖନୀୟ ପ୍ରଦର୍ଶନ କରିଥିଲା। ଏଥିନେଇ ଏହି ଯୋଡ଼ିକୁ ‘କୁଲ୍ଚା’ ନାମ ଦିଆଯାଇଥିଲା। ହେଲେ କ୍ରିକେଟ ଅନିଶ୍ଚିତତାର ଖେଳ ହୋଇଥିବା ଯୋଗୁ ଉଭୟଙ୍କ ପ୍ରଦର୍ଶନ ଧିରେ ଧିରେ ଖରାପ ହୋଇଥିଲା। ପରିଣାମ ସ୍ବରୂପ ସେମାନେ ଦଳରୁ ବାହାର ହୋଇଥିଲେ। ହେଲେ ନିଜର ନିଷ୍ଠା ବଳରେ ସେମାନେ ପୁଣିଥରେ ନିଜକୁ ପ୍ରମାଣିତ କରିଛନ୍ତି। ଆଇପିଏଲ୍-୨୦୨୨ରେ ଦୁଇ ଖେଳାଳି ଭଲ ପ୍ରଦର୍ଶନ କରୁଛନ୍ତି। ଏଯାବତ ଟୁର୍ନାମେଣ୍ଟରେ ସେମାନେ ସର୍ବାଧିକ ଉଇକେଟ ନେଇଥିବା ବୋଲର ତାଲିକା ଶୀର୍ଷରେ ଅଛନ୍ତି। ଚହଲ ୮ ମ୍ୟାଚ୍ରେ ୧୮ ଉଇକେଟ ନେଇ ପ୍ରଥମରେ ଥିବା ବେଳେ କୁଲଦୀପ ୮ ମ୍ୟାଚ୍ରେ ୧୭ ଉଇକେଟ ନେଇ ଦ୍ୱିତୀୟରେ ଅଛନ୍ତି।
ବାସ୍ତବରେ ଦେଖିଲେ ଚହଲ-କୁଲଦୀପ ପରସ୍ପରର ଭଲ ବନ୍ଧୁ। ଆଇପିଏଲ୍ରେ ସେମାନଙ୍କ ବନ୍ଧୁତ୍ୱର ଏକ ଝଲକ ଦେଖିବାକୁ ମିଳିଛି। ଗୁରୁବାର କୋଲକାତା ବିପକ୍ଷରେ ଦିିଲ୍ଲୀ ଜିତିଥିବା ବେଳେ କୁଲଦୀପଙ୍କୁ ମ୍ୟାନ୍ ଅଫ୍ ମ୍ୟାଚ୍ ପୁରସ୍କାର ମିଳିଥିଲା। ସେତେବେଳେ ‘ପର୍ପଲ କ୍ୟାପ୍’ର ଦୌଡ଼କୁ ନେଇ ତାଙ୍କୁ ପ୍ରଶ୍ନ କରାଯାଇଥିଲା। ଏହାର ଜବାବରେ କୁଲଦୀପ କହିଥିଲେ, ମୋର ଏବଂ ଚହଲଙ୍କ ମଧ୍ୟରେ କୌଣସି ପ୍ରତିସ୍ପର୍ଦ୍ଧା ନାହିଁ। ସେ ମୋତେ ଲଗାତାର ଭାବେ ପ୍ରୋତ୍ସାହିତ କରନ୍ତି। ସେ ମୋ’ ବଡ଼ ଭାଇ ପରି। ଯେତେବେଳେ ମୁଁ ଆହତ ହୋଇଥିଲି ସେ ମୋ ସହ ଥିଲେ। ମୁଁ ଚାହୁଁଛି ଚହଲ ହିଁ ପର୍ପଲ କ୍ୟାପ୍ ବିଜେତା ହୁଅନ୍ତୁ। କାରଣ ବିଗତ ୪ ବର୍ଷ ମଧ୍ୟରେ ସେ ଦମ୍ଦାର ବୋଲିଂ କରିଛନ୍ତି।