ଶ୍ରୀନଗର,୨।୫: ଜମ୍ମୁ-କଶ୍ମୀରର କୁଲଗାମରେ ଗୁରୁବାର ଜଣେ ବ୍ୟାଙ୍କ୍ କର୍ମଚାରୀଙ୍କୁ ହତ୍ୟା କରିଛନ୍ତି ଆତଙ୍କବାଦୀ। ଏହି ଘଟଣା ପାଇଁ ଆତଙ୍କବାଦୀ ସଂଗଠନ କଶ୍ମୀର ଫ୍ରିଡମ୍ ଫାଇଟର୍ସ(କେଏଫ୍ଏଫ୍) ନିଜକୁ ଦାୟୀ କରିଛି। କେବଳ ଏତିକି ନୁହେଁ, କେଏଫ୍ଏଫ୍ ଏକ ପତ୍ର ଜାରି କରି ଚେତାବନୀ ମଧ୍ୟ ଦେଇଛି। କେଏଫ୍ଏଫ୍ ପକ୍ଷରୁ କୁହାଯାଇଛି ଯେ, ଯେଉଁମାନେ କଶ୍ମୀରର ଡେଗୋଗ୍ରାଫିକ୍ ପରିବର୍ତ୍ତନରେ ସାମିଲ୍ ହେବେ ସେମାନଙ୍କର ଏପରି ଅବସ୍ଥା ହେବ। ଯେଉଁ ବାହାର ଲୋକ ଭାବୁଛନ୍ତି ମୋଦି ସରକାର ତାଙ୍କୁ ଏଠାରେ ସ୍ଥାୟୀ କରିଦେବେ, ସେମାନେ ଆଖି ଖୋଲନ୍ତୁ। ବାସ୍ତବତା କ’ଣ ସେମାନେ ବୁଝିଯିବା ଉଚିତ୍। ସେମାନଙ୍କୁ ନିଜ ଜୀବନ ହରାଇବାକୁ ପଡ଼ିବ,ଆଉ ବିଳମ୍ବ କରନ୍ତୁ ନାହିଁ।
ସୂଚନାଯୋଗ୍ୟ, ଗତ କିଛିଦିନ ହେବ କଶ୍ମୀରରେ ଟାର୍ଗେଟ୍ କିଲିଂ କରାଯାଉଛି। କିଛିଦିନ ପୂର୍ବରୁ ବଡ଼ଗାମରେ କଶ୍ମୀର ପଣ୍ଡିତ ରାହୁଲ ଭଟ୍ଟଙ୍କୁ ଆତଙ୍କବାଦୀମାନେ ହତ୍ୟା କରିଥିଲେ। ରାହୁଲ ଜଣେ ସରକାରୀ କର୍ମଚାରୀ ଥିତ୍ଲେ। ଏହାସହ ପୋଲିସକର୍ମୀ ରିୟାଜ୍ ଅହମ୍ମଦ ଠାକୋର ଏବଂ ଟିଭି ଅଭିନେତ୍ରୀ ଅମରିନ୍ ଭଟ୍ଟଙ୍କୁ ଗୁଳି ମାରି ହତ୍ୟା କରାଯାଇଥିଲା। ୨ ଦିନ ତଳେ ଜଣେ ହିନ୍ଦୁ ଶିକ୍ଷୟିତ୍ରୀଙ୍କୁ ହତ୍ୟା କରାଯାଇଥିଲା।