ଛେଣ୍ଡିପଦା,୨୭।୪(ସ୍ବ.ପ୍ର.) – ଅନୁଗୋଳ ଜିଲା ଛେଣ୍ଡିପଦା ବ୍ଲକ କମ୍ପସଲା ଓ ଜେରେଙ୍ଗ ଦେହୁରୀସାହିଠାରେ ମଙ୍ଗଳବାର ଦୁଇଟି ସେତୁ ଉଦ୍ଘାଟିତ ହୋଇଛି। ଛେଣ୍ଡିପଦା ବିଧାୟକ ସୁଶାନ୍ତ କୁମାର ବେହେରା ଓ ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ ଯୋଗଦେଇ ଏହି ୨ ସେତୁର ଲୋକାର୍ପଣ କରିଥିଲେ। ଛେଣ୍ଡିପଦା ବ୍ଲକର କମ୍ପସଲା-କେନ୍ଦୁପଶି କୁମ୍ଭାରିଆ ନାଳ ଉପରେ ୩କୋଟି ୬୧ଲକ୍ଷ ୧୧ ହଜାର ୪୭୭ ଟଙ୍କା ବ୍ୟୟରେ କୁମ୍ଭାରିଆ ସେତୁ ନିର୍ମାଣ ହୋଇଛି। ପୂର୍ବରୁ ଏହି ନାଳ ଉପରେ ହୋମ୍ପାଇପ ପକାଯାଇ ଯାତାୟାତ କରାଯାଉଥିଲା। ହେଲେ ବର୍ଷାଦିନେ ପାଇପ୍ ଭାଙ୍ଗିବା ଏବଂ ପୋଲ ଦବି ଯାଉଥିବାରୁ ଜନସାଧାରଣ ଯାତାୟାତରେ ଅସୁବିଧାର ସମ୍ମୁଖୀନ ହେଉଥିଲେ। ଏହାକୁ ଦୃଷ୍ଟିରେ ରଖି ଜିଲା ଖଣିଜ ପାଣ୍ଠିରୁ ଏହି ସେତୁକୁ ଖୁବଶୀଘ୍ର ନିର୍ମାଣ କରାଯାଇଥିଲା। ସେହିପରି ଜେରେଙ୍ଗଦେହୁରୀସାହି ଠାରୁ ଯାଇଥିବା ସଉରିଆ ରାସ୍ତାର ବାଉରୀ ନାଳ ଉପରେ ହାଇଲେବୁଲ ଲୁହା ପୋଲ ନିର୍ମାଣ କରାଯାଇଛି। ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଜିଲା ଉନ୍ନୟନ ପ୍ରକଳ୍ପ ଅଧିକାରୀ ଦିଲୀପ କୁମାର ସାହୁ, ପଞ୍ଚାୟତ ସମିତି ଅଧ୍ୟକ୍ଷା ସୁମିତ୍ରା ସାହୁ, ଜିଲାପରିଷଦ ସଦସ୍ୟ ପ୍ରଦୀପ କୁମାର ସାହୁ, ଭାନୁପ୍ରିୟା ପ୍ରଧାନ, ଯଶୋବନ୍ତ ପ୍ରଶାଦ ବେହେରା, ଗୋଷ୍ଠୀ ଉନ୍ନୟନ ଅଧିକାରୀ ସଞ୍ଜୟ କୁମାର ଆଚାର୍ଯ୍ୟ, କମ୍ପସଲା ସରପଞ୍ଚ ବାବୁଲା ପ୍ରଧାନ ଓ ଜେରେଙ୍ଗଦେହୁରୀସାହିର ପୂର୍ବତନ ସରପଞ୍ଚ ବିଭୂତି ଭୂଷଣ ସାହୁ, ବାଲିପଟାର ପୂର୍ବତନ ସରପଞ୍ଚ ରାକେଶ ପ୍ରଧାନଙ୍କ ସମେତ ଆଖପାଖ ଅଞ୍ଚଳର ବହୁ ପଞ୍ଚାୟତପ୍ରତିନିଧି ଉପସ୍ଥିତ ଥିଲେ।