ଭୁବନେଶ୍ୱର,୧୮ା୫(ବ୍ୟୁରୋ): କୁଣ୍ଡା ଓ ନଡିଆ କତା ଭିତରେ ଚୋରାରେ ଚାଲାଣ ହେଉଥିଲା ଗଞ୍ଜେଇ। ପୋଲିସ ନଜରରୁ ହଟିବା ପାଇଁ ଏସ୍କର୍ଟ କରି ଗଞ୍ଜାମରୁ ପୁରୀ ନିଆଯାଉଥିଲା। ହେଲେ ଭୁବନେଶ୍ୱରରେ ପହଞ୍ଚତ୍ବା ପରେ ଧରିଦେଲା ମଞ୍ଚେଶ୍ୱର ଥାନା ପୋଲିସ। ଏହି ଘଟଣାରେ ସମ୍ପୃକ୍ତ ୨ ଚାଲାଣକାରୀଙ୍କୁ ପୋଲିସ ଗିରଫ କରିବା ସହ ୧ କୁଇଣ୍ଟାଲ କୁଇଣ୍ଟାଲ ୪୦ କେଜି ଗଞ୍ଜେଇ, ଏକ ଟ୍ରକ୍, ଗୋଟିଏ ବାଇକ୍ ଓ ୨ ମୋବାଇଲ ଫୋନ ଜବତ କରାଯାଇଛି। ଗିରଫ ଅଭିଯୁକ୍ତମାନେ ହେଲେ ଗଜପତି ଜିଲା ମୋହନା ଥାନା ଅଞ୍ଚଳର ପ୍ରମୋଦ କୁମାର ବେହେରା ଓ ଖୋର୍ଦ୍ଧା ଜିଲାର ପ୍ରଭାତ ମୁଦୁଲି। ଏନେଇ ପୋଲିସ ମାମଲା (ନଂ ୨୦୯/୨୩) ରୁଜୁ କରି ଅଭିଯୁକ୍ତଦ୍ୱୟଙ୍କୁ ବୁଧବାର କୋର୍ଟ ଚାଲାଣ କରିଥିଲା। ଜାମିନ ନ ମିଳିବାରୁ ଉଭୟଙ୍କୁ ଜେଲ ହାଜତକୁ ପଠାଇ ଦିଆଯାଇଛି। ଜବତ ଗଞ୍ଜେଇର ମୂଲ୍ୟ ୪୦ ଲକ୍ଷରୁ ଅଧିକ ହେବ। ଅଭିଯୁକ୍ତଦ୍ୱୟ ଗଞ୍ଜାମରୁ ପୁରୀକୁ ଗଞ୍ଜେଇ ଚୋରା ଚାଲାଣ କରୁଥିବାବେଳେ ଜାତୀୟ ରାଜପଥର ରସୁଲଗଡ଼ରୁ ହାଇଟେକ୍ ଛକ ମଧ୍ୟବର୍ତ୍ତୀ ଅଞ୍ଚଳରେ ପୋଲିସ ଗାଡିକୁ ଯାଞ୍ଚ କରିବା ପରେ ଘଟଣା ଜଣାପଡିଥିଲା। ପୁଣି ରାସ୍ତାରେ ପୋଲିସ ନଜରକୁ ହଟିବା ପାଇଁ ଅଭିଯୁକ୍ତ ପ୍ରଭାତ ପଲ୍ସର ବାଇକ୍ରେ ଏସ୍କର୍ଟ କରି ଗଞ୍ଜେଇ ଭର୍ତ୍ତି ଟ୍ରକ୍କୁ ନେଉଥିବାବେଳେ ଡ୍ରାଇଭର ପ୍ରମୋଦ ତାହା ଚଳାଉଥିଲେ। ଅନ୍ୟପକ୍ଷରେ ଜବତ ହୋଇଥିବା ଉକ୍ତ ପଲ୍ସର ଗାଡିରେ ବ୍ୟବହୃତ ନମ୍ବର ପ୍ଲେଟ୍ଟି ପ୍ରାଥମିକ ତଦନ୍ତରୁ ନକଲି ବୋଲି ଜଣାପଡିଛି। ତେବେ ତାହା ଚୋରା କି ନୁହେଁ, ତାହା ଜାଣିବା ଲାଗି ଆର୍ଟିଓକୁ ରିପୋର୍ଟ ମଗାଯାଇଛି। ଏହାସହ ଘଟଣାର ଅଧିକ ଖୋଳତାଡ଼ ଚାଲିଛି। ଅଭିଯୁକ୍ତଦ୍ୱୟ କୋରାପୁଟ, ରାୟଗଡା, ଗଜପତିରୁ ଗଞ୍ଜେଇ ସଂଗ୍ରହ କରି ଖୋର୍ଦ୍ଧା, ଭୁବନେଶ୍ୱର, ପୁରୀରେ ବିକ୍ରି କରିଥାନ୍ତେ ବୋଲି ଖବରଦାତା ସମ୍ମିଳନୀରେ ଡିସିପି ପ୍ରତୀକ ସିଂ କହିଛନ୍ତି।
ସୂଚନାନୁସାରେ, ହାଇଟେକ ଛକ ନିକଟରେ ମଙ୍ଗଳବାର ସାରେ ଓଡି୦୨ବିଏକ୍ସ-୩୨୮୯ ଆଇଚର ଗାଡିରେ କୁଣ୍ଡା-ନଡିଆ କତା ଭିତରେ ଗଞ୍ଜେଇ ରହିଥିବା ଖବର ପାଇ ପୋଲିସ ଟିମ୍ ଘଟଣାସ୍ଥଳକୁ ଯାଇଥିଲା। ସେଠାରେ ଏକ ଘଣ୍ଟାରୁ ଅଧିକ ସମୟ ଧରି ନଜର ରଖିବା ପରେ ପୋଲିସ ଟିମ୍ ଅତର୍କିତ ଚଢାଉ କରି ଉଭୟଙ୍କୁ କାବୁ କରିଥିଲା। କଥାବର୍ତ୍ତାରେ ସନ୍ଦେହ ହେବାରୁ ପୋଲିସ ଗାଡିକୁ ଯାଞ୍ଚ କରିଥିଲା। ସେଥିରେ ୩୦ରୁ ଅଧିକ କୁଣ୍ଡା ଓ ନଡ଼ିଆକଥା ବସ୍ତାରେ ଗଞ୍ଜେଇ ଥିବା ଜଣାପଡିଥିଲା।
