ତେଲକୋଇ,୧୪।୩: ପଶୁ ଓ ମଣିଷ ମଧ୍ୟରେ ରହିଛି ଅନାବିଳ ସ୍ନେହ । ମଣିଷ ପାଖରୁ ପଶୁଟିକୁ ବିଚ୍ଛେଦ କରି ଜଙ୍ଗଲରେ ଛାଡିବା ଘଟଣାରେ ଜଣେ ମହିଳା ପାଳିତ ପଶୁଙ୍କୁ ଝୁରି ହେଉଛନ୍ତି। ଏଭଳି ଏକ ଘଟଣା ଦେଖିବାକୁ ମିଳିଛି ତେଲକୋଇ ବନାଞ୍ଚଳ ଅଧୀନ ବିମଳା ଫରେଷ୍ଟ ବିଟ ଅଧୀନରେ। ୨ ବର୍ଷ ତଳେ ପୁରୁଷୋତ୍ତମପୁର ଗ୍ରାମର ମହିଳା କୁନ୍ତଳା କୁମାରୀ ପେଣ୍ଠେଇ ସ୍ଥାନୀୟ ଜଙ୍ଗଲକୁ ଜାଳେଣୀ କାଠ ସଂଗ୍ରହ କରିବାକୁ ଯାଇଥିଲେ। ସେତିକିବେଳେ କୁନ୍ତଳା ଏକ ବାର୍ହା ଶାବକ ମା’ଠାରୁ ଅଲଗା ହୋଇ ଏକୁଟିଆ ଜଙ୍ଗଲ ଏଣେତେଣେ ବୁଲୁଥିବା ଦେଖିବାକୁ ପାଇଥିଲେ। ପରେ ସେ ବାର୍ହା ଶାବକଙ୍କୁ ଉଦ୍ଧାର କରି ଘରକୁ ଆଣି ରଖିଥିଲେ। ବାର୍ହା ଶାବକ ମା’ର ସ୍ନେହ ପାଇ ଘରେ ରହିବା ପରେ ବଡ ହୋଇଥିଲା। ହେଲେ ଲୋକଙ୍କ ଅଭିଯୋଗ କ୍ରମେ ବନବିଭାଗ ବାର୍ହାକୁ ଉଦ୍ଧାର କରି କୁନ୍ତଳାଙ୍କୁ ଗତ ମଙ୍ଗଳବାର ତେଲକୋଇ ମୁଖ୍ୟାଳୟକୁ ଆଣିଥିଲା। ସେଠାରେ କୁନ୍ତଳାଙ୍କୁ ବନ ବିଭାଗ ଅଧିକାରୀମାନେ ଜଙ୍ଗଲ ଆଇନ ଉପରେ ବୁଝାଇବା ସହ ବନ୍ୟଜନ୍ତୁଙ୍କୁ ଘରେ ରଖିବା ନିଷେଧ ବୋଲି ଅବଗତ କରାଇଥିଲେ। ପରେ ବନ କର୍ମଚାରୀ ବାର୍ହାକୁ ତେଲକୋଇ ନିକଟସ୍ଥ କମଳାଙ୍ଗ ଜଙ୍ଗଲରେ ଛାଡି ଦେଇଥିଲେ। ହେଲେ କୁନ୍ତଳା ବାର୍ହା ପାଇଁ ପ୍ରତିଦିନ ଭାତ ଧରି ଜଙ୍ଗଲରେ ବୁଲିବା ସହିତ ବାର୍ହାକୁ ଧୁଡୁ ନାମରେ ଡାକ ଛାଡୁଛନ୍ତି। ମହିଳାଙ୍କ ବିଶାସ କାଳେ ସେ ଭୋକରେ ଥିବ। ଡାକ ଶୁଣିଲେ ଫେରି ଆସିବ। ବନାଞ୍ଚଳ ଅଧିକାରୀ ପ୍ରମୋଦ କୁମାର ସେଠୀ ଜଙ୍ଗଲି ଜନ୍ତୁଙ୍କୁ ଘରେ ପାଳିବା ଅନୁଚିତ ବୋଲି ଜନସାଧାରଣଙ୍କୁ କହିଛନ୍ତି।