ଲକ୍ଷ୍ନୌ,୧୬।୧୧: ଚାଇନାର ମୁକାବିଲା କରିବା ପାଇଁ ଉତ୍ତରପ୍ରଦେଶର କୁରେଭର ଏୟାରଷ୍ଟ୍ରିପ ଭାରତୀୟ ବାୟୁସେନା ପାଇଁ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବ। ଯୋଜନାବଦ୍ଧ ଭାବେ ବାୟୁସେନା ଏଭଳି କରିଛି। ଜରୁରୀକାଳୀନ ସ୍ଥିତିରେ ଏହାରେ ଯୁଦ୍ଧ ବିମାନ ଅବତରଣ କରିପାରିବ। ଏଠାରେ ଅବତରଣ କରିଥିବା ଯୁଦ୍ଧବିମାନ କିମ୍ବା ପରିବହନ ବିମାନକୁ ଇନ୍ଧନ ଏବଂ ଅସ୍ତ୍ରଶସ୍ତ୍ର ଯୋଗାଇ ଦିଆଯାଇପାରିବ।
ଚାଇନା ଲାଇନ ଅଫ ଆକ୍ଟୁଆଲ କଣ୍ଟ୍ରୋଲ (ଏଲ୍ଏସି) ଠାରେ ନୂତନ ବିମାନବନ୍ଦର ନିର୍ମାଣ ଜାରି ରଖିଛି। ଫଳରେ ୩.୪୮୮ କିଲୋମିଟର ଏଲ୍ଏସିରେ ଉତ୍ତେଜନା ସୃଷ୍ଟି ହେବାରେ ଲାଗିଛି। ଏପରିସ୍ଥଳେ ପୂର୍ବାଞ୍ଚଳ ଏକ୍ସପ୍ରେସ୍ ଓ୍ବେର ୩.୩ କିଲୋମିଟର ଲମ୍ବା ରନୱେ ଯୁଦ୍ଧ ବିମାନ ପାଇଁ ଏକ ପ୍ରମୁଖ ଭୂମିକା ଗ୍ରହଣ କରିବ। ଏହାକୁ ସ୍ବତନ୍ତ୍ର ଭାବେ ଡିଜାଇନ କରାଯାଇଛି।
ଏ ସମ୍ପର୍କରେ ଅବସରପ୍ରାପ୍ତ ଏୟାର ଚିଫ ମାର୍ଶଲ ଏସ୍. କୃଷ୍ଣସ୍ବାମୀଙ୍କ ଅନୁଯାୟୀ, ଉତ୍ତରପ୍ରଦେଶ ରାଜପଥରେ ନୂତନ ଭାବେ ନିର୍ମାଣ ହୋଇଥିବା ଏୟାରଷ୍ଟ୍ରିପ ଗୁଡିକ ଭାରତୀୟ ବାୟୁସେନା ଯୋଜନାର ଏକ ଅଂଶ । ଯାହାକି ମିରାଜ -୨୦୦ ଏଚ ଭଳି ଯୁଦ୍ଧବିମାନର ଓଜନକୁ ନିୟନ୍ତ୍ରଣ କରିବା ପାଇଁ ଏବଂ ସି-୧୩୦ ଜେ ହରକ୍ୟୁଲେସ ଭଳି ପରିବହନ ବିମାନକୁ ଦୃଷ୍ଟିରେ ରଖି ନିର୍ମିତ ହୋଇଛି।
୧୯୬୫ ଏବଂ ୧୯୭୧ ଯୁଦ୍ଧ ସମୟରେ, ପାକିସ୍ତାନ ବାୟୁସେନା ବିମାନ ଦ୍ୱାରା ଏୟାର ବେସ୍ରେ ବୋମା ବିସ୍ଫୋରଣ ଯୋଗୁ ଯୁଦ୍ଧ ବିମାନ ନଷ୍ଟ ହୋଇଯାଇଥିଲା। ସେହି ଅଭିଜ୍ଞତାରୁ ଶିକ୍ଷା ଗ୍ରହଣ କରି ବାୟୁସେନା ଏହି ନିର୍ଦ୍ଦିଷ୍ଟ ଏୟାରଷ୍ଟ୍ରିପଗୁଡ଼ିକୁ ରାଜପଥରେ ଅସ୍ଥାୟୀ ଲାଇଟ, ମୋବାଇଲ ଏୟାର ଟ୍ରାଫିକ ଯୋଗାଯୋଗ, ଇନ୍ଧନ ଏବଂ ଅସ୍ତ୍ରଶସ୍ତ୍ର ଲୋଡ କରିବା ଲାଗି ବ୍ୟବହୃତ କରି ପାରିବ।
ବାୟୁସେନା ଏହାର କାର୍ଯ୍ୟକ୍ଷମ ଯୋଜନାଗୁଡିକ ଉପରେ କଡ଼ା ଆଭିମୁଖ୍ୟ ରଖିଛି।ଉତ୍ତରପ୍ରଦେଶରେ ନିର୍ମିତ ଦୁଇଟି ଏୟାରଷ୍ଟ୍ରିପ ଏୟାରବେସ ନିକଟରେ ଅଛି ଯାହା ଦ୍ୱାରା ଯୁଦ୍ଧବିମାନ ଅବତରଣ କିମ୍ବା ପରିବହନ ବିମାନକୁ ଇନ୍ଧନ ଏବଂ ଅସ୍ତ୍ରଶସ୍ତ୍ର ଯୋଗାଇ ଦିଆଯାଇପାରିବ। ବହୁ ଭାରତୀୟ ଏୟାରବେସରେ ଗୋଟିଏ ଗୋଟିଏ ଏୟାରଷ୍ଟ୍ରିପ ଥିବାରୁ ରାଜପଥରେ ଥିବା ଏୟାରଷ୍ଟ୍ରିପଗୁଡ଼ିକ ବିମାନବନ୍ଦରର ଭୂମିକା ଗ୍ରହଣ କରିପାରିବ।
ସେହିପରି ଏୟାରବେସ୍ରେ ଶତ୍ରୁ ପକ୍ଷ ବୋମାମାଡ଼ କଲେ ଏହି ଏୟାରଷ୍ଟ୍ରିପ୍ ଗୁଡ଼ିକ ବେଶ୍ ଉପଯୋଗୀ ସାବ୍ୟସ୍ତ ହେବ। କୁରେଭର ଏୟାରଷ୍ଟ୍ରିପ ନିକଟରେ କାନପୁର, ବରେଲି ଏବଂ ଗୋରଖପୁର ଆଦି ଏୟାରବେସ ରହିଛି। ଏସବୁ ଏୟାରବେସ୍ ଉତ୍ତର ପଡୋଶୀ ଦେଶର ନିକଟରେ ରହିଛି।
ଏଲ୍ଏସିର ନିକଟବର୍ତ୍ତୀ କାଶଗର, ହଟାନ, ଦାମକ୍ସଙ୍ଗ, ଲାସା, ଶିଗାଟସେ, ନଗରୀ-ଗାର ଗୁନ୍ସା, ବାଙ୍ଗଡା ଏବଂ ନିଏନମଗଚି ଆଦି ଠାରେ ଚାଇନାର ପିଏଲଏ ପକ୍ଷରୁ ନୂତନ ବିମାନ ବନ୍ଦର ଏବଂ ଯୁଦ୍ଧବିମାନ ପାଇଁ ଭୂତଳ ଆଶ୍ରୟସ୍ଥଳ ନିର୍ମାଣ ଜାରି ରହିଛି। ଏହାକୁ ଦୃଷ୍ଟିରେ ରଖି ଏୟାରଷ୍ଟ୍ରିପ ନିର୍ମାଣ ପାଇଁ ନିଷ୍ପତ୍ତି ନିଆଯାଇଛି। ତାଶିକୋରଗାନ, ପୁରଙ୍ଗ, ଟିଙ୍ଗ୍ରି ଏବଂ ଲୁଣ୍ଟସେରେ ମଧ୍ୟ ପିଏଲଏ ଏଭଳି ବନ୍ଦର ନିର୍ମାଣ କରୁଛି। ତେବେ ଏୟାରଷ୍ଟ୍ରିପ୍ ଭାରତୀୟ ବାୟୁସେନା ପାଇଁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ।