ପରିକ୍ଷିତ ସାହୁ
ବଇଣ୍ଡା,୧୦ା୨ – ପ୍ରତି ଘରେ ପହଞ୍ଚିବ ବିଶୁଦ୍ଧ ପାଇପ୍ ପାଣି। ଏଥିପାଇଁ ରାଜ୍ୟ ସରକାରଙ୍କ ପକ୍ଷରୁ ଏକାଧିକ ଯୋଜନା କାର୍ଯ୍ୟକାରୀ ହେଉଛି। ବିଶେଷକରି ‘ବସୁଧା’ ଯୋଜନାରେ ଗ୍ରାମାଞ୍ଚଳରେ ପାନୀୟ ଜଳ ପ୍ରକଳ୍ପମାନ ନିର୍ମାଣ କରାଯାଉଛି। କିନ୍ତୁ ଅନୁଗୋଳ ଜିଲା ଆଠମଲ୍ଲିକ ବ୍ଲକର କୁରୁମଟାପ ପଞ୍ଚାୟତ ଏବେ ବି ଏହି ଯୋଜନାରୁ ବଞ୍ଚିତ ରହିଛି। ଏହି ପଞ୍ଚାୟତର ୭ଟି ଗାଁ ମଧ୍ୟରୁ ୬ ଗ୍ରାମବାସୀ ଜଳ ସଙ୍କଟର ସମ୍ମୁଖୀନ ହେଉଛନ୍ତି। ଗ୍ରୀଷ୍ମଋତୁରେ ନିକଟସ୍ଥ ନାଳରେ ଚୁଆ ଖୋଳି ଲୋକେ ପାଣି ସଂଗ୍ରହ କରୁଛନ୍ତି। ପଞ୍ଚାୟତର ସବୁ ଗ୍ରାମକୁ ବିଶୁଦ୍ଧ ପାଇପ୍ ପାଣି ଯୋଗାଇ ଦେବାକୁ ୨୦୧୫ରୁ ଅଭିଯୋଗ କରାଯାଉଥିଲେ ମଧ୍ୟ ଏଯାଏ ପ୍ରଶାସନ ପକ୍ଷରୁ ସରକାରଙ୍କୁ ପ୍ରସ୍ତାବ ଦିଆଯାଇ ନାହିଁ।
୭ଟି ଗ୍ରାମକୁ ନେଇ ଗଠିତ କୁରୁମଟାପ ପଞ୍ଚାୟତର ଗୁଣ୍ଡୁରୀଖଳିରେ ୧୩୦ରୁ ଅଧିକ ପରିବାର ରହୁଛନ୍ତି। ସେହିପରି କୁରୁମଟାପରେ ୧୨୦ରୁ ଊର୍ଦ୍ଧ୍ୱ, ବରପଦାରେ ୫୦ରୁ ଅଧିକ, ବାଲିପଟାରେ ୬୫ରୁ ଊର୍ଦ୍ଧ୍ୱ, ଦାମଦରପୁରରେ ୬୦ରୁ ଅଧିକ, ବରପାଲିରେ ୮୦ରୁ ଊର୍ଦ୍ଧ୍ୱ ପରିବାର ବସବାସ କରୁଛନ୍ତି। ମନ୍ଦରବାହାଳ ଗ୍ରାମରେ ୧୩୦ ପରିବାର ରହୁଥିବାବେଳେ ସେଠାରେ ଦୀର୍ଘବର୍ଷ ତଳେ ନିର୍ମିତ ଛୋଟ ପାନୀୟ ଜଳ ପ୍ରକଳ୍ପ ଲୋକଙ୍କ ପାଣି ଅଭାବ ପୂରଣ କରିପାରୁ ନାହିଁ। ପଞ୍ଚାୟତରେ ମୋଟ୍ ୪୮ଟି ନଳକୂଅ ଥିବାବେଳେ ସେଥିରୁ ୧୦ଟି ଅଚଳ ରହିଛି। ବାକି ୩୮ଟି ମଧ୍ୟରୁ ଅନେକରୁ ଲୁହାଗୁଣ୍ଡମିଶା ପାଣି ବାହାରୁଛି। ଫଳରେ ଏହା ବ୍ୟବହାରଯୋଗ୍ୟ ହୋଇପାରୁ ନାହିଁ। ଗ୍ରୀଷ୍ମଋତୁରେ ପଞ୍ଚାୟତବାସୀ ଉତ୍କଟ ଜଳାଭାବର ଶିକାର ହୋଇ ନାଳରେ ଚୁଆ ଖୋଳିବାକୁ ବାଧ୍ୟ ହେଉଛନ୍ତି। ତେଣୁ ବସୁଧା ଯୋଜନାରେ ପଞ୍ଚାୟତର ୭ଟି ଗ୍ରାମକୁ ପାଇପ୍ ପାଣି ଯୋଗାଇ ଦେବାକୁ ୧୨ ଫେବୃୟାରୀ ୨୦୧୫, ୨୦୧୭ ଓ ୨୦୧୮ରେ ପ୍ରଶାସନକୁ ଅଭିଯୋଗପତ୍ର ପ୍ରଦାନ କରାଯାଇଥିଲେ ମଧ୍ୟ ଏଯାଏ ସୁଫଳ ମିଳିନାହିଁ। ଏ ସମ୍ପର୍କରେ ଆଠମଲ୍ଲିକ ଜଳଯୋଗାଣ ବିଭାଗ କନିଷ୍ଠ ଯନ୍ତ୍ରୀ ଉମାକାନ୍ତ ବେହେରା କହିଛନ୍ତି, କୁରୁମଟାପ ପଞ୍ଚାୟତକୁ ବସୁଧା ଯୋଜନାରେ ସାମିଲ କରିବାକୁ ସରକାରଙ୍କୁ ପ୍ରସ୍ତାବ ଦିଆଯିବ। ଏଥିସହ ଅଚଳ ନଳକୂଅଗୁଡ଼ିକୁ ସଚଳ କରାଯିବ।
ଦାବି ପ୍ରତି ଗୁରୁତ୍ୱ ଦିଆଯାଉ ନାହିଁ
ପଞ୍ଚାୟତର କୌଣସି ଗ୍ରାମରେ ବସୁଧା ଯୋଜନାରେ ଜଳଯୋଗାଣ ପ୍ରକଳ୍ପ ନିର୍ମାଣ କରାଯାଇ ନାହିଁ। ଏ ନେଇ ବହୁବାର ପ୍ରଶାସନର ଦୃଷ୍ଟି ଆକର୍ଷଣ କରାଯାଇଛି। କିନ୍ତୁ ଲୋକଙ୍କ ଦାବିପ୍ରତି ଗୁରୁତ୍ୱ ଦିଆଯାଉ ନାହିଁ। ଗ୍ରୀଷ୍ମ ଆସିବା ପୂର୍ବରୁ ଏ ନେଇ ପଦକ୍ଷେପ ନିଆଗଲେ ଲୋକେ ଉପକୃତ ହେବେ।
-ସୁମନ୍ତ ବେହେରା, ସରପଞ୍ଚ
ନଳକୂଅ ପାଣି ବ୍ୟବହାର ଅନୁପଯୁକ୍ତ
ଗୁଣ୍ଡୁରୀଖଳି ଗ୍ରାମରେ ୧୩୦ରୁ ଅଧିକ ପରିବାର ପାଇଁ ୪ଟି ନଳକୂଅ ରହିଛି। ସେଥିରୁ ୨ଟି ନଳକୂଅ ପାଣି ବ୍ୟବହାର କରିହେଉ ନାହିଁ। ଲୁହାଗୁଣ୍ଡ ମିଶା ଜଳ ବାହାରୁଥିବାରୁ ତାହାକୁ କେହି ପାନୀୟ ଭାବେ ବ୍ୟବହାର କରୁନାହାନ୍ତି। ନଳକୂଅ ମରାମତି ସହ ନୂଆ ପ୍ରକଳ୍ପ ନିିର୍ମାଣର ବ୍ୟବସ୍ଥା କରାଯାଉ।
-ଅରୁଣ କୁମାର ସାହୁ, ଗ୍ରାମବାସୀ
ସବୁ ପରିବାର ପାଉନାହାନ୍ତି
ମନ୍ଦରବାହାଳ ଗ୍ରାମରେ ଏକ ଜଳ ପ୍ରକଳ୍ପ ରହିଛି। ବହୁ ବର୍ଷ ତଳେ ଏହା ନିର୍ମାଣ ହୋଇଥିବାରୁ ବର୍ତ୍ତମାନର ଆବଶ୍ୟକତା ଅନୁଯାୟୀ ପାଣି ଯୋଗାଇ ପାରୁ ନାହିଁ। କେତେକ ସ୍ଥାନରେ ପାଇପ୍ ଫାଟି ଯାଇଥିବାରୁ ବହୁ ସାହିବାସୀ ବିଶୁଦ୍ଧ ଜଳରୁ ବଞ୍ଚିତ ରହିଛନ୍ତି। ସମସ୍ୟାର ସମାଧାନ ଲାଗି ପଦକ୍ଷେପ ନିଆଯାଉ।
– ଅନନ୍ତ ଚରଣ ସାହୁ, ଗ୍ରାମବାସୀ
ବର୍ଷ ବର୍ଷ ଧରି ଅସୁବିଧା ଭୋଗୁଛୁ
ବରପଦା ଗ୍ରାମକୁ ବିଶୁଦ୍ଧ ପାଇପ୍ ପାଣି ଯୋଗାଇ ଦେବା ନିମନ୍ତେ ବହୁବାର ଅଭିଯୋଗପତ୍ର ପ୍ରଦାନ କରାଯାଇଛି। କିନ୍ତୁ ପ୍ରଶାସନ ଜଳକଷ୍ଟ ଦୂର କରିବା ଦିଗରେ ଆଗ୍ରହ ପ୍ରକାଶ କରୁନାହିଁ। ନଳକୂଅଗୁଡ଼ିକର ପାଇପ୍ ମଧ୍ୟ ବଦଳାଯାଉ ନାହିଁ। ଯଥାଶୀଘ୍ର ପଞ୍ଚାୟତକୁ ପାଇପ୍ ପାଣି ଯୋଗାଣର ବ୍ୟବସ୍ଥା କରାଯାଉ।
– ଜଗବନ୍ଧୁ ସାହୁ, ଗ୍ରାମବାସୀ