ଖଣ୍ଡପଡ଼ା,୨ା୬(ସ୍ବ.ପ୍ର.): ଖଣ୍ଡପଡ଼ାରୁ ଭୁବନେଶ୍ୱର ଭାୟା ଭାପୁରକୁ ସଂଯୋଗ କରୁଥିବା ମୁଖ୍ୟ ପୂର୍ତ୍ତ ବିଭାଗ ରାସ୍ତାରେ ୧୯୬୨ରୁ ନିର୍ମିତ କୁସୁମୀ ସେତୁଟି ସମୟାନୁକ୍ରମେ ରକ୍ଷଣାବେକ୍ଷଣ ଅଭାବରୁ ଦୁର୍ବଳ ହେବାରେ ଲାଗିଛି। ସେତୁର ଉପର ଅଂଶର ବିଭିନ୍ନ ସ୍ଥାନରେ ଫାଟ ସୃଷ୍ଟି ହୋଇଥିବାବେଳେ ୨ ପାର୍ଶ୍ୱ ସୁରକ୍ଷା ପ୍ରାଚୀରର କିଛି ଅଂଶରୁ ସିମେଣ୍ଟ କଂକ୍ରିଟ ଛାଡି ଗଲାଣି। ସେହିପରି ସେତୁର ତଳପାର୍ଶ୍ୱ ବିଭିନ୍ନ ସ୍ଥାନରୁ ସିମେଣ୍ଟ କଂକ୍ରିଟ ଛାଡ଼ି ଯାଇଥିବା ପରିଲକ୍ଷିତ ହେଉଛି। ଦୀର୍ଘ ୬୦ବର୍ଷ ଧରି ଅଞ୍ଚଳବାସୀଙ୍କ ସେବାରେ ଆସୁଥିବା ଏହି ସେତୁ ଉପର ଦେଇ ଦୈନିକ ଶତାଧିକ ସଂଖ୍ୟା ଯାତ୍ରୀବାହୀ ବସ୍ ସାଙ୍ଗକୁ ଭାରିଯାନଗୁଡିକ ଚଳାଚଳ କରୁଛି। ଏହି ସେତୁର ଆବଶ୍ୟକ ମରାମତି ଦିଗରେ ପୂର୍ତ୍ତ ବିଭାଗ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି। ଏକଦା ଉକ୍ତ ସେତୁର ୨ ଖମ୍ବ (ପିଲାର) ମଧ୍ୟସ୍ଥ ଯୋଡ଼େଇ ସ୍ଥାନରେ ଲାଗିଥିବା ଲୁହା ପ୍ଲେଟଗୁଡ଼ିକ ଦୁର୍ବୃତ୍ତ ଓ ଅସାମାଜିକ ବ୍ୟକ୍ତିମାନେ ଦୀର୍ଘବର୍ଷ ତଳୁ ଚୋରି କରି ନେଇଥିବା ଜଣାପଡିଛି। ପ୍ରତିବର୍ଷ ବନ୍ୟା ସମୟରେ କୁସୁମୀ ନଦୀର ଉଭୟପାର୍ଶ୍ୱ ପଠା ନଦୀ ଗର୍ଭରେ ଲୀନ ହେବାରେ ଲାଗିଛି। ତେବେ ସେତୁର ପାର୍ଶ୍ୱବର୍ତ୍ତୀ ଅଞ୍ଚଳରୁ ଅବାଧରେ ଶତାଧିକ ଟ୍ରିପ ବାଲି ଚାଲାଣ ହେଉଥିବାରୁ କୁସୁମୀ ସେତୁ ପ୍ରତି ବିପଦର କାରଣ ପାଲଟିଛି। ଅବାଧ ବାଲି ଉତ୍ତୋଳନ ଉପରେ ତହସିଲ ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି। ସମୟାନୁକ୍ରମେ ଦୁର୍ବଳ ହୋଇ ପଡୁଥିବା କୁସୁମୀ ସେତୁ ପ୍ରତି ଜିଲା ପ୍ରଶାସନ ଓ ପୂର୍ତ୍ତ ବିଭାଗ ମୁଖ୍ୟଯନ୍ତ୍ରୀ, ସଚିବ ଦୃଷ୍ଟି ଦେବାକୁ ଖଣ୍ଡପଡ଼ା ଅଞ୍ଚଳବାସୀ ଦାବି କରିଛନ୍ତି।