ଖଣ୍ଡପଡ଼ା,୧୯।୧(ସ୍ବ.ପ୍ର.) – ସ୍ଥାନୀୟ କୁସୁମୀ ନଦୀ ପଠାରୁ ବନ୍ୟା ସମୟରେ ମାଟି କ୍ଷୟ ରୋକିବାକୁ ଖଣ୍ଡପଡ଼ା ବିଜ୍ଞାପିତ ଅଞ୍ଚଳ ପରିଷଦ ପକ୍ଷରୁ ହଜାରରୁ ଊର୍ଦ୍ଧ୍ୱ କାଜୁ ଚାରା ରୋପଣ କରାଯାଇଥିଲା । ମାତ୍ର ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ସେହି କାଜୁ ବଗିଚା ଏବେ ଉଜୁଡିବାରେ ଲାଗିଛି । ଦୈନିକ କାଠ ମାଫିଆମାନେ ଉକ୍ତ ସ୍ଥାନରୁ ଫଳନ୍ତି କାଜୁ ଗଛଗୁଡ଼ିକ କାଟି ନେଉଛନ୍ତି । ଏନଏସି କର୍ତ୍ତୃପକ୍ଷ ପ୍ରତିବର୍ଷ କାଜୁ ବଗିଚାକୁ ସ୍ଥାନୀୟ ବାସିନ୍ଦାଙ୍କୁ ନିଲାମ ସୁତ୍ରରେ ଦେଇ ରାଜସ୍ବ ଆଦାୟ କରୁଥିଲେ। ମାତ୍ର ଗତ ୨ବର୍ଷ ଧରି ଏନଏସି କର୍ତ୍ତୃପକ୍ଷ ଉକ୍ତ କାଜୁ ବଗିଚା ପ୍ରତି ଧ୍ୟାନ ନ ଦେଇ ନୀରବଦ୍ରଷ୍ଟା ସାଜିଛନ୍ତି । ଏହାର ସୁଯୋଗ ନେଇ କାଠ ମାଫିଆମାନେ କାଜୁଗଛଗୁଡିକ ସ୍ପଷ୍ଟ ଦିବାଲୋକରେ କାଟି ନେଉଥିବା ଦେଖିବାକୁ ମିଳୁଛି । ଏ ସଂକ୍ରାନ୍ତରେ ଏନ୍ଏସି କର୍ତ୍ତୃପକ୍ଷ ସବୁଦେଖି ନ ଦେଖିବା ନ୍ୟାୟରେ ନୀରବ ରହୁଥିବାରୁ ସାଧାରଣରେ ପ୍ରତିକ୍ରିୟା ପ୍ରକାଶ ପାଇଛି। ଏବେ ଉକ୍ତ କାଜୁ ବଗିଚାରୁ ଶତାଧିକ ଗଜା ଗଛଗୁଡ଼ିକ କାଠ ମାଫିଆମାନେ କାଟି ନେଇଥିବା ଅଭିଯୋଗ ହେଉଛି । କାଜୁ ବଗିଚାର ସୁରକ୍ଷା ଦିଗରେ ଏନଏସି କର୍ତ୍ତୃପକ୍ଷ ଦୃଷ୍ଟି ଦେବାକୁ ଦାବି ହୋଇଛି। ଖଣ୍ଡପଡ଼ା ଏନଏସି କାର୍ଯ୍ୟ ନିର୍ବାହୀ ଅଧିକାରୀ ସଞ୍ଜୀବ କୁମାର ମହାପାତ୍ରଙ୍କ ସହ ଏ ନେଇ ଯୋଗାଯୋଗ କରିବାରେ ସେଥିପ୍ରତି ଦୃଷ୍ଟି ଦେବେ ବୋଲି କହିଛନ୍ତି ।