କୁଏଟ୍ ସିଟି, ୧୪ା୬: ପ୍ରଫେଟ ମହମ୍ମଦଙ୍କ ଉପରେ ବିବାଦୀୟ ମନ୍ତବ୍ୟକୁ କେନ୍ଦ୍ରକରି କୁଏଟ୍ରେ ବିକ୍ଷୋଭ ପ୍ରଦର୍ଶନ କରିଥିବା ବିଦେଶୀ ନାଗରିକଙ୍କୁ ବିଦା କରିବାକୁ ସେଠାକାର ସରକାର ନିଷ୍ପତ୍ତି ନେଇଛନ୍ତି। ଭାଜପା ପୂର୍ବତନ ନେତ୍ରୀ ନୂପୁର ଶର୍ମା ଓ ନବୀନ କୁମାର ଜିନ୍ଦଲଙ୍କ ମନ୍ତବ୍ୟ ଉପରେ କୁଏଟ୍ରେ ବେଆଇନ ଭାବେ ବିକ୍ଷୋଭ କରାଯାଇଥିବା କୁହାଯାଇଛି। ଏଥିରେ ଭାରତ, ବାଂଲାଦେଶ, ପାକିସ୍ତାନ ସମେତ ଅନ୍ୟ ଦେଶର ନାଗରିକ ସାମିଲ ହୋଇଥିଲେ। ଏବେ ସେମାନଙ୍କୁ ନିଜ ଦେଶକୁ ପଠାଇବାକୁ ପ୍ରକ୍ରିୟା ଆରମ୍ଭ ହୋଇଛି। ଏଥିସହ ସେମାନେ ପୁନର୍ବାର କୁଏଟ୍କୁ ଫେରିବା ଉପରେ ମଧ୍ୟ କଟକଣା ଲଗାଯାଇଛି। କୁଏଟ୍ରେ ପ୍ରଚଳିତ ଆଇନ ଅନୁସାରେ, ସେଠାରେ ପ୍ରବାସୀମାନେ କୌଣସି ପ୍ରକାର ବିକ୍ଷୋଭ କିମ୍ବା ଆନ୍ଦୋଳନ କରିପାରିବେ ନାହିଁ। ଏହା ସତ୍ତ୍ୱେ ସେମାନେ ବିକ୍ଷୋଭ ପ୍ରଦର୍ଶନ କରିଥିଲେ। ଯଦି ଏବେ ଏହି ଆନ୍ଦୋଳନକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆ ନ ଯାଏ ତେବେ ଆଗକୁ ଅନ୍ୟ ଦେଶର ନାଗରିକ ସେଠାରେ ଆଇନକୁ ହାତକୁ ନେବାର ଆଶଙ୍କା ରହିଥିବା କୁଏଟ ସରକାରଙ୍କ ପକ୍ଷରୁ କୁହାଯାଇଛି। ଦେଶର ଆଇନକାନୁନ୍କୁ ସମସ୍ତ ବିଦେଶୀ ନାଗରିକ ମାନି କୌଣସି ପ୍ରକାର ଆନ୍ଦୋଳନ କିମ୍ବା ବିକ୍ଷୋଭରେ ସାମିଲ ନ ହେବା ଉଚିତ ବୋଲି କୁଏଟ କର୍ତ୍ତୃପକ୍ଷ କହିଛନ୍ତି।
