ଇଣ୍ଡିଆନ ପ୍ରିମିୟର ଲିଗ(ଆଇପିଏଲ୍) କିଙ୍ଗସ ଏକାଦଶ ପଞ୍ଜାବର ବ୍ୟାଟିଂ କୋଚ ୱାସିମ ଜାଫର୍ ମଜାଳିଆ ଟୁଇଟ୍ କରିଛନ୍ତି। ରବିବାର ସିଡନୀ କ୍ରିକେଟ ଗ୍ରାଉଣ୍ଡରେ ଖେଳାଯାଇଥିବା ଭାରତ-ଅଷ୍ଟ୍ରେଲିଆ ମଧ୍ୟରେ ଦ୍ୱିତୀୟ ଦିନିକିଆ ମ୍ୟାଚ୍ ପରେ ୱାସିମ ଜାଫର୍ ଏକ ମଜାଦାର ବଲିଉଡ ମେମ ଶେୟାର କରି ଅଷ୍ଟ୍ରେଲୀୟ ଅଲରାଉଣ୍ଡର ଗ୍ଲେନ ମ୍ୟାକ୍ସୱେଲଙ୍କୁ ଟ୍ରୋଲ କରିଛନ୍ତି। ଏହି ବଲିଉଡ ମେମ ମାଧ୍ୟମରେ ଜାଫର ଆଇପିଏଲରେ ମ୍ୟାକ୍ସୱେଲଙ୍କ ଫ୍ଲପ ଶୋ’କୁ ପୁଣି ମନେ ପକାଇଦେଇଛନ୍ତି। ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଦ୍ୱିତୀୟ ଏକଦିବସୀୟରେ ଗ୍ଲେନ ମ୍ୟାକ୍ସୱେଲ ଅର୍ଦ୍ଧଶତକ ହାସଲ କରିଥିଲେ। ଆଇପିଏଲ ୧୩ରେ ବିଫଳ ହେବା ପରେ ମ୍ୟାକ୍ସୱେଲ ଅଷ୍ଟ୍ରେଲିଆ ପାଇଁ ଖେଳି ସଫଳତା ହାସଲ କରୁଛନ୍ତି। ତିନି ମ୍ୟାଚ ବିଶିଷ୍ଟ ଏକଦିବସୀୟ ସିରିଜର ପ୍ରଥମ ଦୁଇଟି ମ୍ୟାଚରେ ସେ ୪୫ ଏବଂ ୬୩ ରନ ସଂଗ୍ରହ କରିଥିଲେ। ଭାରତୀୟ କ୍ରିକେଟ ଦଳ ବିପକ୍ଷରେ ଗ୍ଲେନ ମ୍ୟାକ୍ସୱେଲଙ୍କ ଏହି ରୂପ ଦେଖିବା ପରେ ପ୍ରଶଂସକ ଏବଂ ଓ୍ବାଶିମ୍ ଜାଫରଙ୍କ ମନରେ ଆଇପିଏଲର ସ୍ମୃତି ମଧ୍ୟ ସତେଜ ହୋଇଛି। ୱାସିମ ଜାଫର ଟୁଇଟରରେ ନାସିରୁଦ୍ଦିନ ଶାହାଙ୍କ ଏକ ଫିଲ୍ମ ଚରିତ୍ରର ଫଟୋ ଶେୟାର କରି ଏହା ଏକ ଅପରାଧ ବୋଲି ଲେଖିଛନ୍ତି। ଏବେ ସୋସିଆଲ ମିଡିଆରେ ଏହି ଟୁଇଟ୍ ଭାଇରାଲ ହେବାରେ ଲାଗିଛି।
