ବେଲଗ୍ରେଡ, ୨୫।୬- ବିଶ୍ୱର ନମ୍ବରଓ୍ବାନ ଟେନିସ ତାରକା ନୋଭାକ ଜୋକୋଭିଚ୍ ଏବେ ବିଭିନ୍ନ ମହଲରୁ ସମାଲୋଚନାର ଶିକାର ହେବାରେ ଲାଗିଛନ୍ତି। ସେ ଆଡ୍ରିଆ ଟୁର୍ ଟେନିସ ଟୁର୍ନାମେଣ୍ଟ ଆୟୋଜନ କରିବାରୁ ଅଧିକ ଖେଳାଳି କରୋନା ଭାଇରସରେ ସଂକ୍ରମିତ ହେଲେ ବୋଲି କୁହାଯାଇଛି। ଏକାଧିକ ଟୁଇଟ କରି ଜୋକୋଭିଚ୍ଙ୍କୁ ଦାୟିତ୍ୱହୀନ କହିବା ସହ ତୀବ୍ର ସମାଲୋଚନା କରିଛନ୍ତି ନିକ୍ କିର୍ଗୋସ। ଆଡ୍ରିଆ ଟୁର୍ରେ ଭାଗ ନେଇଥିବା ବିଶ୍ୱର କେତେକ ଖେଳାଳି ଗତ କିଛି ଦିନ ମଧ୍ୟରେ କରୋନାରେ ସଂକ୍ରମିତ ହୋଇଛନ୍ତି। ଭିଡିଓରୁ ଦେଖା ଯାଉଛି ଯେ ଟୁର୍ନାମେଣ୍ଟ ସମୟରେ ସାମାଜିକ ଦୂରତ୍ୱ ରଖାଯାଇ ନ ଥିଲା। ଭେନ୍ୟୁରେ ଦର୍ଶକ ମଧ୍ୟ ଭରପୂର ଥିଲେ। ଖେଳାଳିମାନେ ନାଇଟକ୍ଲବ ଏବଂ ବାସ୍କେଟବଲ୍ କୋର୍ଟକୁ ମଧ୍ୟ ଯାଇଥିଲେ। ବ୍ରିଟେନ ଟେନିସ ତାରକା ଆଣ୍ଡି ମୁରେ ମଧ୍ୟ ଜୋକୋଭିଚ୍ଙ୍କୁ ସମାଲୋଚନା ତାଲିକାରେ ସାମିଲ ହୋଇଛନ୍ତି। ଏହା ଟେନିସର ଭାବମୂର୍ତ୍ତିରେ ଆଞ୍ଚ ଆଣିଛି ବୋଲି ସେ କହିଛନ୍ତି। ମୁରେ ଗତ ମଙ୍ଗଳବାର ଲଣ୍ଡନରେ ଏକ ପ୍ରଦର୍ଶନ ଟୁର୍ନାମେଣ୍ଟ ଖେଳିବା ସହ ଟେନିସ କୋର୍ଟକୁ ଓହ୍ଲାଇଛନ୍ତି। ସେଠାରେ ସରକାରଙ୍କ ସମସ୍ତ ନୀତିନିୟମ ପାଳନ କରାଯାଉଛି। ”କେତେ ଲୋକ ପଜିଟିଭ୍ ଆସିଲେ ସେଥିରେ ମୁଁ ବିସ୍ମିତ ନୁହେଁ, ଖେଳାଳିମାନେ ଯେପରି ପାର୍ଟିରେ ଯୋଗଦେଲେ ଏବଂ ସାମାଜିକ ଦୂରତ୍ୱ ନିୟମକୁ ଉଲଂଘନ କରାଗଲା ତାହା ଠିକ୍ ନୁହେଁ“ ବୋଲି ମୁରେ କହିଛନ୍ତି। ନାଓମି ଓସାକା, ଟେନିସ କିମ୍ବଦନ୍ତୀ ମାର୍ଟିନା ନାଭ୍ରାତିଲୋଭା ମଧ୍ୟ ଖେଳାଳିଙ୍କ ସ୍ବାସ୍ଥ୍ୟାବସ୍ଥାକୁ ନେଇ ଚିନ୍ତା ପ୍ରକଟ କରିଛନ୍ତି। ପ୍ରକାଶ ଯୋଗ୍ୟ ଯେ, ଜୋକୋଭିଚ୍, ତାଙ୍କ ସ୍ତ୍ରୀ ଏବଂ ଅନ୍ୟ ୩ ଖେଳାଳି କରୋନା ଭାଇରସରେ ସଂକ୍ରମିତ ହୋଇଛନ୍ତି।
ଦୁଃଖ ପ୍ରକାଶ କଲେ ନୋଭାକ୍
ଘଟଣାରେ ଗଭୀର ଦୁଃଖ ପ୍ରକାଶ କରିଛନ୍ତି ଜୋକୋଭିଚ୍। ମୁଁ ଏବଂ ଆୟୋଜକମାନେ ମିଶି ଯାହା କରିଛୁ ତାହା ଭୁଲ ଥିଲା ବୋଲି ସେ କହିଛନ୍ତି। ବେଲଗ୍ରେଡ ଓ ଚଦାରରେ ଅନୁଷ୍ଠିତ ଟୁର୍ନାମେଣ୍ଟର ମ୍ୟାଚ ସମୟରେ ପ୍ରତିଦିନ ୪୦୦୦ ଦର୍ଶକ ଭେନ୍ୟୁରେ ଉପସ୍ଥିତ ହେଉଥିଲେ। ଆଡ୍ରିଆ ଟୁର୍ ଟେନିସ ଟୁର୍ନାମେଣ୍ଟକୁ ଉପଭୋଗ କରିଥିବା ଦର୍ଶକମାନଙ୍କୁ ସେ କରୋନା ଟେଷ୍ଟ କରାଇବା ପାଇଁ ଅନୁରୋଧ କରିଛନ୍ତି।