ଭୁବନେଶ୍ୱର: ଶ୍ରମିକ ଧର୍ମଘଟ ପ୍ରଭାବ ଯୋଗୁ ରାଜ୍ୟର ପ୍ରମୁଖ ସ୍ଥାନଗୁଡ଼ିକରେ ଦୋକାନ ବଜାର ବନ୍ଦ ରହିଥିବା ବେଳେ ଅନ୍ୟ ସବୁ ସ୍ଥାନରେ ଆଂଶିକ ବନ୍ଦ ରହିଥିବା ଦେଖିବାକୁ ମିଳିଛି। ବନ୍ଦ କାରଣରୁ ରାଜ୍ୟରେ ପ୍ରାୟ ୧୦୦ କୋଟି ଟଙ୍କାର କାରବାର କ୍ଷତିଗ୍ରସ୍ତ ହୋଇଥିବା ଶିଳ୍ପ ସୂତ୍ରରୁ ସୂଚନା ମିଳିଛି। ରାଜ୍ୟ ବ୍ୟବସାୟୀ ମହାସଂଘ ସଭାପତି ସୁଧାକର ପଣ୍ଡା କହିଛନ୍ତି, ରାଜ୍ୟର ଯେଉଁ ସ୍ଥାନଗୁଡିକରେ ଶ୍ରମିକ ସଙ୍ଗଠନଗୁଡିକ ସକ୍ରିୟ ଅଛନ୍ତି ସେହି ସ୍ଥାନଗୁଡିକରେ ବିଶେଷକରି ବନ୍ଦ ପ୍ରଭାବ ଅଧିକ ରହିଛି। ରାଜ୍ୟର ଅନ୍ୟ ସ୍ଥାନରେ ବନ୍ଦ ପ୍ରଭାବ ଏତେଟା ଦେଖାଯାଇନାହିଁ। ଫଳରେ ବ୍ୟବସାୟ ଉପରେ ସେଭଳି କିଛି ପ୍ରଭାବ ପଡିନାହିଁ। ରାଜପଥରେ ଶ୍ରମିକ ସଙ୍ଗଠନଗୁଡିକ ଧାରଣା ଦେଇ ଥିବାରୁ ପରିବହନ ହେବା ବ୍ୟାପକ ବାଧାପ୍ରାପ୍ତ ହୋଇଥିବା ବିଭିନ୍ନ ସଙ୍ଗଠନ ପକ୍ଷରୁ ସୂଚନା ମିଳିଛି।
ଗୁରୁବାର ଶ୍ରମିକ ସଙ୍ଗଠନଗୁଡିକର ଦେଶବ୍ୟାପୀ ଧର୍ମଘଟ ଯୋଗୁ ରାଷ୍ଟ୍ରାୟତ୍ତ ବ୍ୟାଙ୍କରେ କାରବାର ଆଂଶିକ ପ୍ରଭାବିତ ହୋଇଛି। କିଛି ବ୍ୟାଙ୍କ କର୍ମଚାରୀ ସଙ୍ଗଠନ ଏହି ଧର୍ମଘଟରେ ସାମିଲ ହୋଇଥିଲେ। ବ୍ୟାଙ୍କରେ ଜମା ସହ ନଗଦ କାରବାର ପ୍ରଭାବିତ ହୋଇଥିବା ସୂଚନା ମିଳିଛି। ଏହାର ପ୍ରଭାବ ବିଦେଶୀ ମୁଦ୍ରା ଏବଂ ସରକାରୀ ନେଣଦେଣ ଉପରେ ମଧ୍ୟ ପଡିଛି। ଭାରତୀୟ ଷ୍ଟେଟ ବ୍ୟାଙ୍କ ଘରୋଇ କ୍ଷେତ୍ର ବ୍ୟାଙ୍କଗୁଡିକରେ କାର୍ଯ୍ୟ ବାଧାପ୍ରାପ୍ତ ହୋଇ ନ ଥିବା ଶିଳ୍ପ ସୂତ୍ରରୁ କୁହାଯାଇଛି। ସରକାରଙ୍କ ନୀତିକୁ ବିରୋଧକରି ଦେଶର ୧୦ ଶ୍ରମିକ ସଙ୍ଗଠନ ଧର୍ମଘଟକୁ ଓହ୍ଲାଇଛନ୍ତି। ଏଥିରେ ଭାରତୀୟ ମଜଦୁର ସଂଘ ଯୋଗଦେଇନାହିଁ।
ବନ୍ଦ ପ୍ରଭାବ ରାଜ୍ୟର ବ୍ୟାଙ୍କ ସେବା ଉପରେ ସେଭଳି ପ୍ରଭାବ ପକାଇନାହିଁ। ରାଜ୍ୟର ପ୍ରାୟ ସମସ୍ତ ରାଷ୍ଟ୍ରାୟତ୍ତ ଏବଂ ଘରୋଇ ବ୍ୟାଙ୍କ ଖୋଲା ରହିଥିବା ବେଳେ ଗ୍ରାହକ ମଧ୍ୟ ଆଶା ଅନୁଯାୟୀ କାରବାର କରିଛନ୍ତି। ପ୍ରାୟ ୭୫% ଗ୍ରାହକ ବ୍ୟାଙ୍କକୁ ଆସି ସେବା ଲାଭ କରିଥିବା ଏଆଇବିଓସି ରାଜ୍ୟ ସଭାପତି ଦାମୋଦର ନନ୍ଦ ସୂଚନା ଦେଇଛନ୍ତି। ବ୍ୟାଙ୍କିଙ୍ଗ୍ ସମ୍ପର୍କିତ ନେଣଦେଣ ଏବଂ ଅନ୍ୟ ସେବା ଯଥା ଇଣ୍ଟରନେଟ,ମୋବାଇଲ ବ୍ୟାଙ୍କିଙ୍ଗ୍ ଓ ଏଟିଏମ୍ ଭଳି ଡିଜିଟାଲ ମାଧ୍ୟମରେ ଟ୍ରାଞ୍ଜାକଶନ କରିବା ଲାଗି ବ୍ୟାଙ୍କଗୁଡିକ ଗ୍ରାହକଙ୍କୁ ପୂର୍ବରୁ ଗ୍ରାହକଙ୍କୁ କହିଥିଲେ। ବନ୍ଦ ଯୋଗୁ ଅର୍ଥ ବ୍ୟବସ୍ଥାକୁ ୨୫ ହଜାର କୋଟି ଟଙ୍କାର କ୍ଷତି ପହଞ୍ଚିଛି। ସେହିଭଳି ବ୍ୟାଙ୍କ କର୍ମଚାରୀ ଧର୍ମଘଟରେ ସାମିଲ ହେବା ଯୋଗୁ ପ୍ରାୟ ୧୮ ହଜାର କୋଟି ଟଙ୍କାର ଚେକ୍ କ୍ଲିୟରାନ୍ସରେ ବାଧା ଆସଥିବା ଶ୍ରମିକ ସଙ୍ଗଠନଗୁଡିକ ପକ୍ଷରୁ ସୂଚନା ଦିଆଯାଇଛି।