ତେନ୍ତୁଳିଖୁଣ୍ଟି ୨୪।୭ (ଚିଦାନନ୍ଦ ସାହୁ ): ଚଳିତ ବର୍ଷ ବର୍ଷା ଅଭାବରୁ ବିଳମ୍ବରେ ଆରମ୍ଭ ହୋଇଛି ଚାଷକାମ। ଏବେ ଆବଶ୍ୟକ ଅନୁସାରେ ବର୍ଷା ହେବା ପରେ ଚାଷୀ ତରବରିଆ ଭାବେ ଚାଷକାମରେ ଲାଗି ପଡ଼ିଛନ୍ତି। ସେପଟେ ତେନ୍ତୁଳିଖୁଣ୍ଟି ବ୍ଲକ ଦିଗି ଗ୍ରାମ ପଞ୍ଚାୟତରେ ଧାନ ରୋଇବା ପାଇଁ ଶ୍ରମିକ ମିଳୁ ନ ଥିବାରୁ ଆନ୍ଧ୍ରପ୍ରଦେଶରୁ ଶ୍ରମିକ ଆଣି ଚାଷକାର୍ଯ୍ୟରେ ନିୟୋଜିତ କରୁଥିବା ଦେଖିବାକୁ ମିଳୁଛି।
ତେନ୍ତୁଳିଖୁଣ୍ଟି ବ୍ଲକ ଦିଗି ଗ୍ରାମ ପଞ୍ଚାୟତ ପ୍ରତ୍ୟେକ ଗ୍ରାମରେ ଏବେ ଚାଷକାମ ଜୋରଦାର ଆରମ୍ଭ ହୋଇଛି। ତଳି ଓପାଡିବା, ରୋଇବା ପାଇଁ ଶ୍ରମିକ ମିଳୁ ନ ଥିବାରୁ ଚିନ୍ତାରେ ଚାଷୀ। ତେବେ ନିଜ ଗ୍ରାମରେ ଧାନ ରୁଆ ସରିଲେ ଅନ୍ୟ ଗ୍ରାମକୁ ଶ୍ରମିକ ଯିବାକୁ ଶ୍ରମିକଙ୍କ ନିମନ୍ତେ ଏକ ଅଘୋଷିତ ନିର୍ଦ୍ଦେଶ ଜାରି ହୋଇଛି । ସେପଟେ ତଳି ୩୦ ରୁ ୪୦ ଦିନ ହୋଇଗଲାଣି। ପିଲ ଦେଲାଣି ତଳି । କେବେ ମିଳିବେ ଶ୍ରମିକ, କେବେ ରୁଆ କାମ ସରିବ ସେ ନେଇ ଚାଷୀ ମୁଣ୍ଡରେ ହାତ ଦେଇ ବସିଛି। ଅନ୍ୟପକ୍ଷେ ଆନ୍ଧ୍ରରେ ବର୍ଷା ନ ଥିବା ଯୋଗୁଁ ଆରମ୍ଭ ହୋଇପାରିନି ଚାଷକାମ। ଫଳରେ ଖାଲିରେ ବସିଛନ୍ତି ଚାଷୀ ଓ ଶ୍ରମିକ। ତେନ୍ତୁଳିଖୁଣ୍ଟି ବ୍ଲକ ଦିଗି ଗ୍ରାମ ପଞ୍ଚାୟତ ଚରାମୂଳା ଗ୍ରାମର ଜଣେ ଚାଷୀ ଜି ଜଗନ୍ନାଥ କହିଛନ୍ତି, ଶ୍ରମିକ ଅଭାବ ସମ୍ପର୍କରେ ଆନ୍ଧ୍ରରେ ଥିବା ତାଙ୍କ ସମ୍ପର୍କୀୟଙ୍କ ସହ କଥା ହୋଇଥିଲେ। ତେବେ ମୋର ଚାଷକାମ ନ ହେଲା ନାହିଁ, ଆନ୍ଧ୍ରରୁ ଶ୍ରମିକ ନେଇକି ଯିବି ଏବଂ ଗୋଟିଏ ପର୍ଯ୍ୟାୟରେ କାମ ସରିଯିବ ବୋଲି କହିଥିଲେ। ରବିବାର ସେ ୧୬ ଜଣ ଶ୍ରମିକଙ୍କୁ ଆଣି ୭ ଏକର ଜମିରେ ରୁଆ କାର୍ଯ୍ୟ କରିଥିଲେ। ଆନ୍ଧ୍ର ଶ୍ରମିକ କାମ କରିବାକୁ ନେଇ ସାଧାରଣରେ ମିଶ୍ରିତ ପ୍ରତିକ୍ରିୟା ଦେଖିବାକୁ ମିଳିଛି। କିଏ କହୁଛି ଜଗନ୍ନାଥକୁ ଠିକ୍ ସମୟରେ ଶ୍ରମିକ ତ ମିଳିଲା, ଆଉ କିଏ କହୁଛି ଆମ ଅଞ୍ଚଳ ଶ୍ରମିକଙ୍କ ହକ ମାରିଦେଲା। ଆନ୍ଧ୍ର କୃଷି ଶ୍ରମିକଙ୍କ ରୋପଣ ଶୈଳୀ ଟିକିଏ ଅଲଗା ଏବଂ ଦ୍ରୁତ ବୋଲି ଆଲୋଚନା ହେଉଛି।
