ରାଇକିଆ,୨୭।୩(ଡି.ଏନ୍.ଏ.): ରାସ୍ତା ନାହିଁ। ୫ କି.ମି ଦୁର୍ଗମ ଜଙ୍ଗଲ ମଧ୍ୟରେ ଘାଟି ପାହାଡ଼ ଚଢ଼ି ଗଲେ ପହଞ୍ଚିହୁଏ କନ୍ଧମାଳ ଜିଲା ରାଇକିଆ ବ୍ଲକର ମାଣିକେଶ୍ୱର ପଞ୍ଚାୟତର ଡାଙ୍ଗିସି ଗ୍ରାମରେ। କନ୍ଧମାଳ-ଗଞ୍ଜାମ ଜିଲା ସୀମାନ୍ତ ଏହି ଗ୍ରାମରେ ସରକାରଙ୍କ ସବୁ ଯୋଜନା ଅପହଞ୍ଚ। ରାସ୍ତାଠାରୁ ଆରମ୍ଭ କରି ଶିକ୍ଷା, ସ୍ବାସ୍ଥ୍ୟ ଭଳି ଜରୁରୀ ସେବାରୁ ବଞ୍ଚିତ ହେଉଛନ୍ତି ଗ୍ରାମବାସୀ। ସେହି ଗାଁରେ ପ୍ରାଥମିକ ବିଦ୍ୟାଳୟ କି ଅଙ୍ଗନଓ୍ବାଡି କେନ୍ଦ୍ର ନାହିଁ। ସେଥିପାଇଁ ଗାଁର ଅଧିକାଂଶ ପିଲା ବିଦ୍ୟାଳୟରେ ନାଁ ଲେଖାଇ ପାରୁନାହାନ୍ତି। ସର୍ବନିମ୍ନ ସାସ୍ଥ୍ୟସେବା ପାଇବାକୁ ୨୫ କି.ମି. ଦୂର ରାଇକିଆ ଯିବାକୁ ପଡ଼ୁଛି। ଏ ସବୁ ଭିତରେ ସବୁଠୁ ବଡ଼ ସମସ୍ୟା ଭାବେ ଦେଖାଦେଇଛି ରାସ୍ତା। ଅଧାପନ୍ତରିଆ ଅବସ୍ଥାରେ ରାସ୍ତାକାମ ଛାଡ଼ି ଦିଆଯାଇଥିବାରୁ ଗାଁକୁ ଦୁଇଚକିଆ ଗାଡ଼ିଟିଏ ମଧ୍ୟ ଯାଇପାରୁନାହିଁ। କାମ ଶେଷ କରିବା ପାଇଁ ଗ୍ରାମବାସୀ ଅନେକଥର ବିଡିଓଙ୍କ ଦୃଷ୍ଟି ଆକର୍ଷଣ କରିଛନ୍ତି। ଏପରି କି ଜିଲାପାଳଙ୍କ ଅଭିଯୋଗ ଶୁଣାଣି କାର୍ଯ୍ୟକ୍ରମରେ ଦୁଇଥର ଅଭିଯୋଗ ହୋଇଛି।
୧୪ ପରିବାର ବସବାସ କରୁଥିବା ଏହି ଗ୍ରାମରେ ସବୁ ଘର ମାଟି କଚ୍ଚାଘର। ଆବାସ ଯୋଜନା ପାଇବା ପାଇଁ ଗ୍ରାମବାସୀଙ୍କ ନାଁ ତାଲିକାରେ ଥିଲେ ମଧ୍ୟ ରାସ୍ତା ନ ଥିବାରୁ ଘର ତିଆରି ସରଞ୍ଜାମ ଆଣିବାରେ ଅସୁବିଧା ଯୋଗୁ ଘର ତିଆରି ହୋଇପାରୁନାହିଁ।
ପଞ୍ଚାୟତ କାର୍ଯ୍ୟାଳୟକୁ ଆସି ନ ପାରି ଭତ୍ତାରୁ ବଞ୍ଚତ୍ତ ହେଉଛନ୍ତି ବୃଦ୍ଧାବୃଦ୍ଧ। ଗାଁରେ ଥିବା ଏକମାତ୍ର ଚୁଆ ଓ ଝରଣା ପାଣି ବ୍ୟବହାର କରୁଛନ୍ତି ଗ୍ରାମବାସୀ। ଖରାଦିନେ ଝରଣା ଶୁଖିଗଲେ ୨କି.ମି. ପାହାଡ଼ ଚଢ଼ି ପାଣି ଆଣିବାକୁ ପଡୁଛି। ଏସବୁ ସମସ୍ୟା ଭିତରେ ସାଧାରଣ ଜୀବନ ବିତାଇବା ପାଇଁ ସଙ୍ଘର୍ଷ କରୁଛନ୍ତି ଗ୍ରାମବାସୀ।
ଏ ନେଇ ଗ୍ରାମର ମଞ୍ଜୁଳା ପ୍ରଧାନ କୁହନ୍ତି, ଗାଁକୁ ରାସ୍ତା ନାହିଁ । ଫଳରେ ଦେହ ଖରାପ ହେଲେ ସ୍ବାସ୍ଥ୍ୟକେନ୍ଦ୍ରକୁ ଯାଇପାରୁନାହୁଁ । ଏପରି କି ଗାଁରେ ବିଦ୍ୟାଳୟଟିଏ ମଧ୍ୟ ନାହିଁ। ଏଥିଯୋଗୁ ପିଲାମାନେ ପାଠ ପଢ଼ିପାରୁ ନ ଥିବା ସେ କହିଛନ୍ତି। ସେହିପରି ଗ୍ରାମର ସାବିତ୍ରୀ ମଲ୍ଲିକ କୁହନ୍ତି, ପିଇବା ପାଣି ପାଇଁ ଗ୍ରାମବାସୀ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଝରଣା ପାଣି ଉପରେ ନିର୍ଭର କରୁଛନ୍ତି। ରାସ୍ତା ସମସ୍ୟା ଲାଗି ଗ୍ରାମରେ ନଳକୂପଟିଏ ମଧ୍ୟ ହୋଇପାରୁନାହିଁ।