ଭଦ୍ରକ ଅଫିସ,୧।୮-ଜୁନ୍ରେ କମ୍ ବୃଷ୍ଟିପାତ ଯୋଗୁ ଭଦ୍ରକ ଜିଲାରେ ଖରିଫ ଧାନ ଚାଷ ସମ୍ଭବ ହୋଇପାରି ନ ଥିଲା। ଜୁଲାଇ ଶେଷରେ କେନାଲ ଜଳ ଯୋଗାଣ ଏବଂ ଏହାପରେ ସାମୟିକ ବୃଷ୍ଟିପାତ ଫଳରେ ଖରିଫ ଧାନ ଚାଷ ଆରମ୍ଭ ହୋଇଛି। କିନ୍ତୁ ନିଅଣ୍ଟ ବର୍ଷା ଚାଷୀଙ୍କ ମୁଣ୍ଡବ୍ୟଥାର କାରଣ ପାଲଟିଥିବା ବେଳେ ଏବେ ସାର ଅଭାବ ସେମାନଙ୍କୁ ଚିନ୍ତାରେ ପକାଇଛି।
ଜିଲା କୃଷି ବିଭାଗ ସୂଚନା ମୁତାବକ ଚଳିତବର୍ଷ ଜିଲାରେ ୧ ଲକ୍ଷ ୬୧ ହଜାର ୫ ଶହ ହେକ୍ଟର ଜମିରେ କେବଳ ଖରିଫ ଧାନ ଚାଷ ଲାଗି ଲକ୍ଷ୍ୟ ଧାର୍ଯ୍ୟ ରଖାଯାଇଛି। ବର୍ତ୍ତମାନ ସୁଦ୍ଧା ପ୍ରାୟ ୨୦ ହଜାର ହେକ୍ଟର ଜମିରେ ତଳିପକା ଏବଂ ରୁଆ ପୋତା ଆରମ୍ଭ ହୋଇଯାଇଛି। ତେବେ ଖରିଫ ଧାନ ଚାଷ ପାଇଁ ଡିଏପି ଓ ୟୁରିଆର ଆବଶ୍ୟକତା ରହିଥିବା ବେଳେ ଏହି ଦୁଇପ୍ରକାର ସାରର ଅଭାବ ଚାଷୀଙ୍କୁ ହତାଶ କରିଛି। ତେବେ ୟୁରିଆ ସାର ଯୋଗାଣ କ୍ଷେତ୍ରରେ ବିଶେଷ ଅସୁବିଧା ଦେଖା ଦେଇ ନ ଥିବାବେଳେ ଡିଏପିର ଉତ୍କଟ ଅଭାବ। ବର୍ତ୍ତମାନ ପରିସ୍ଥିତିରେ ଜିଲା ପାଇଁ ୧୨ ହଜାର ମେଟ୍ରିକ ଟନ୍ ଡିଏପି ସାରର ଆବଶ୍ୟକତା ରହିଥିବା ବେଳେ ମାତ୍ର ୩ ହଜାର ୨୮୯ ମେଟ୍ରିକ ଟନ୍ ଯୋଗାଣ ହୋଇଛି। ସେହିଭଳି ୧୪ ହଜାର ୫ ଶହ ମେଟ୍ରିକ ଟନ୍ ୟୁରିଆ ଆବଶ୍ୟକ ଥିବାବେଳେ ମାତ୍ର ୬ ହଜାର ୩୩୮ ମେଟ୍ରିକ ଟନ୍ ଆସିଥିବା ଜିଲା କୃଷି ବିଭାଗ ସୂତ୍ରରୁ ଜଣାପଡ଼ିଛି। ଫଳରେ ଚାଷୀମାନେ ବାହାରୁ କଳାବଜାରରେ ସାର କିଣି ଶୋଷଣର ଶିକାର ନେଇ ଅଭିଯୋଗ ହେଉଛି। ଏ ସମ୍ପର୍କରେ ଜିଲା ସହକାରୀ କୃଷି ଉପନିର୍ଦ୍ଦେଶକ ଜଗନ୍ନାଥ ନନ୍ଦଙ୍କୁ ଯୋଗାଯୋଗ କରିବାରୁ ଆବଶ୍ୟକତାକୁ ଦୃଷ୍ଟିରେ ରଖି ଜିଲାକୁ ଅଧିକ ସାର ଯୋଗାଇ ଦେବାକୁ ଉପରିସ୍ଥ ବିଭାଗୀୟ ଅଧିକାରୀଙ୍କୁ ଚିଠି ଲେଖା ଯାଇଥିବା କହିଛନ୍ତି।