ନୂଆପଡ଼ା ଅଫିସ,୧୦।୨: ନୂଆପଡା ଜିଲା କୋମନା ବ୍ଲକ ଅନ୍ତର୍ଗତ କୁରେଶ୍ୱର ପଞ୍ଚାୟତ ଘୋଟସର ଉଚ୍ଚ ପ୍ରାଥମିକ ବିିଦ୍ୟାଳୟ ଅବ୍ୟବସ୍ଥାରେ ଗତି କରୁଛନ୍ତି। ବିିଦ୍ୟାଳୟ ଶ୍ରେଣୀ କୋଠରି ବିପଦ ସଙ୍କୁଳ ଅବସ୍ଥାରେ ରହିଥିବା ଅଭିଯୋଗ ହୋଇଛି। ୧୯୬୯ ଅଗଷ୍ଟ ୭ରେ ସ୍ଥାପିତ ଉକ୍ତ ବିଦ୍ୟାଳୟରେ ଶ୍ରେଣୀ ଗୃହ ଅଭାବ ଯୋଗୁ ପାଠପଢ଼ା ବ୍ୟାଘତ ହେବା ସହ ଛାତ୍ରୀଛାତ୍ରଙ୍କ ପାଇଁ କୌଣସି ସୁବ୍ୟବସ୍ଥା ନାହିଁ। ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଏହି ବିଦ୍ୟାଲୟରେ ୭୩ଜଣ ଛାତ୍ରୀଛାତ୍ର ଅଧ୍ୟୟନ କରୁଥିବା ବେଳେ ୪ଶିକ୍ଷକ ଶିକ୍ଷାଦାନ କରୁଛନ୍ତି। ବିଦ୍ୟାଳୟରେ ମୋଟ ୩ କୋଠରି ରହିଥିବା ବେଳେ ୨ଟି କୋଠରି ସମ୍ପୂର୍ଣ୍ଣ ଡ୍ୟାମେଜ ହୋଇଯାଇଛି। ଗୋଟିଏ କୋଠରିରେ ୭ଟି ଶ୍ରେଣୀ ଚାଲିଛି। ଶ୍ରେଣୀଗୃହ ଅଭାବ ଯୋଗୁ ଅଷ୍ଟମ ଶ୍ରେଣୀକୁ ବନ୍ଦ କରି ସପ୍ତମ ପର୍ଯ୍ୟନ୍ତ ପାଠପଢା ଚାଲିଛି। ୭ ଶ୍ରେଣୀକୁ ଗୋଟିଏ କୋଠରି ୪ ଶିକ୍ଷକ କେମିତି ଶିକ୍ଷାଦାନ କରୁଥିବେ ତାହା ସହଜେ ଅନୁମେୟ। ଡେମେଜ ଦୁଇ ଶ୍ରେଣୀ କୋଠରିରୁ ଉପର ଛାତରୁ ସିମେଣ୍ଟ ଅତଡା ଖସିବାରେ ଲାଗିଛି। ବର୍ଷା ଦିନରେ ଛାତରୁ ପାଣି ଗଳିବା ସହ ଛାତ ତଳକୁ ଦବି ଆସୁଛି। କେତେବେଳେ ଛାତ ପଡିଯିବ କାହାରି ମଧ୍ୟ ଅଜଣା। ରୋଷେଇ ଘର ଅବସ୍ଥା ମଧ୍ୟ ଯଥାପୂବଂ ତଥା ପରଂ। ପାଣି ସମସ୍ୟା ଦ୍ୱିଗୁଣିତ କରି ଦେଇଛି। ଦୁଇଟି ଅତିରିକ୍ତ ଶ୍ରେଣୀ ଗୃହ ୧୦ ବର୍ଷରୁ ଊର୍ଦ୍ଧ୍ୱ ହେବ ଫାଉଣ୍ଡେସନ କରି ଛାଡି ଦିଆଯାଇଛି। ସେହି ଦୁଇ ଅତିରିକ୍ତ ଶ୍ରେଣୀ ଗୃହ ନିର୍ମାଣ ହୋଇଗଲେ, ପାଢପଢା ପ୍ରତି ସୁବିଧା ହୁଅନ୍ତା ବୋଲି ଗ୍ରାମବାସୀ ବାରମ୍ବାର ଅଭିଯୋଗ କରି ଆସୁଛନ୍ତି। ହେଲେ ବିଭାଗୀୟ ଅଧିକାରୀ ଓ କର୍ମଚାରୀଙ୍କ ଉଦାସୀନତା ଯୋଗୁ ଦୀର୍ଘ ଦିନ ହେଲା ଫାଉଣ୍ଡେସନ ହୋଇ ଅଧାପନ୍ତରିଆ ଭାବେ ପଡି ରହିଛି ବୋଲି ଅଭିଭାବକମାନେ ଅଭିଯୋଗ କରିଛନ୍ତି। ଏହି ଦୁଇ ଶ୍ରେଣୀଗୃହକୁ ସମ୍ପୂର୍ଣ୍ଣ କରିବା ପାଇଁ ଗ୍ରାମବାସୀ ଅନେକ ଥର ସରପଞ୍ଚଙ୍କଠାରୁ ଆରମ୍ଭ କରି ବିଡିଓ, ଡିଇଓ, ଡିଇଓ, ଜିଲାପାଳଙ୍କ ପର୍ଯ୍ୟନ୍ତ ଯାଇ ଗୁହାରି କରି ସାରିଲୁଣି। ହେଲେ କୌଣସି ଅଧିକାରୀ କର୍ଣ୍ଣପାତ କରୁନାହାନ୍ତି। ଏଠାରେ ଶିକ୍ଷାର ବିକାଶ କେମିତି ହେବ ବୋଲି ଭାଜପା ପାତାଲେଶ୍ୱର ମଣ୍ଢଳ ସଭାପତି ଚନ୍ଦନ ଠାକୁର ପ୍ରକାଶ କରିଛନ୍ତି। ଏ ସଂକ୍ରାନ୍ତରେ କୋମନା ବିଡିଓ ସୁଶାନ୍ତ ରଣାଙ୍କୁ ପଚାରିବାରୁ ମୁଁ ତଦନ୍ତ କରି ଆସିଛି। ସରପଞ୍ଚଙ୍କ ସହିତ କଥା ହୋଇ ଗୋଟିଏ ମାସ ଭିତରେ ରିପାରିଂ କାମ ଆରମ୍ଭ କରିବୁ ବୋଲି କହିଥିଲେ।