ବ୍ରାସିଲିଆ,୩।୪: କରୋନା ଆତଙ୍କ ଥମିବାର ନା ଧରୁନି। ଦକ୍ଷିଣ ଆମେରିକାର ବ୍ରାଜିଲରେ କରୋନାରେ ଆକ୍ରାନ୍ତ ହୋଇ ମୃତ୍ୟୁ ଘଟୁଥିବା ଲୋକଙ୍କୁ କବର ଦେବାକୁ ସ୍ଥାନର ଅଭାବ ଦେଖାଦେଇଛି। ସ୍ଥାନୀୟ ସାଓ ପାଉଲୋ ସହରରେ ଏଭଳି ସ୍ଥିତି ସୃଷ୍ଟି ହୋଇଛି। ତେଣୁ ପ୍ରଶାସନ ପକ୍ଷରୁ ନୋଓ୍ବା କୈକୋଇରିହ୍ନାରେ ଥିବା ପୁରୁଣା କବରସ୍ତାନର କବରଗୁଡ଼ିକୁ ଖୋଳି କଙ୍କାଳ ବାହାର କରିବାକୁ ନିର୍ଦ୍ଦେଶ ଜାରି ହୋଇଛି। ସେସବୁ କବରରେ କରୋନା ମୃତକଙ୍କୁ କବର ଦିଆଯାଉଛି। କଙ୍କାଳଗୁଡ଼ିକୁ ଏକ କଣ୍ଟେନରରେ ରଖାଯାଉଛି। ପରେ ଏସବୁକୁ ଅନ୍ୟ କବରସ୍ତାନରରେ କବର ଦିଆଯିବ ବୋଲି ସାଓ ପାଉଲୋ ସହରର ମ୍ୟୁନିସପାଲିଟି ପକ୍ଷରୁ ସୂଚନା ଦିଆଯାଇଛି। ଗତ ଏକ ସପ୍ତାହ ମଧ୍ୟରେ ଦେଶରେ ୬୦ ହଜାରରୁ ଅଧିକ ଲୋକଙ୍କ ମୃତ୍ୟୁ କରୋନା ଘଟିଛି। କରୋନା ଥମୁ ନ ଥିବାରୁ ଦେଶରେ ସ୍ବାସ୍ଥ୍ୟସେବା ବିପର୍ଯ୍ୟସ୍ତ ହୋଇପଡ଼ିଛି। ବିଭିନ୍ନ ହସ୍ପିଟାଲରେ ଆଇସିୟୁରେ ଅକ୍ସିଜେନ୍ ସିଲିଣ୍ଡର ପର୍ଯ୍ୟାପ୍ତ ପରିମାଣରେ ମିଳୁ ନ ଥିବା ଅଭିଯୋଗ ହେଉଛି।