ଆମେରିକାରେ ଭେଣ୍ଟିଲେଟର ଅଭାବ, ସ୍ବିଜରଲାଣ୍ଡରେ ଲକ୍ଡାଉନ୍ ସ୍ଥିତି…
01 ଓ୍ବାଶିଂଟନ, ୧୨।୧୨: କରୋନା ମହାମାରୀର ନୂଆ ଭାରିଆଣ୍ଟ୍ ଓମିକ୍ରନ୍ ଯୋଗୁ ଆତଙ୍କ ସୃଷ୍ଟି ହୋଇଛି। ଦୈନିକ ସଂକ୍ରମଣ ଏବଂ ମୃତ୍ୟୁ ସଂଖ୍ୟା ବଢ଼ିବାରେ ଲାଗିଛି। ଏବେ ଓମିକ୍ରନ୍ ଅଣାୟତ୍ତ ହୋଇ ତାଣ୍ଡବ ଆରମ୍ଭ କରିଛି। ଆମେରିକା ଏବଂ ୟୁରୋପରେ କରୋନା ଭାଇରସ ସଙ୍କଟ ସୃଷ୍ଟି କରିଛି। ପ୍ରକାଶିକ ଏକ ରିପୋର୍ଟରେ ଉଲ୍ଲେଖ କରାଯାଇଛି ଯେ କରୋନା ମହାମାରୀର ନୂଆ ଭାରିଆଣ୍ଟ ଓମିକ୍ରନ ଯୋଗୁ ଅବସ୍ଥା ବିଗିଡିବାରେ ଲାଗିଛି।
ଆମେରିକାର ମିସିଗାନ ରାଜ୍ୟରେ ଡାକ୍ତରଖାନାଗୁଡ଼ିକରେ ଆକ୍ରାନ୍ତଙ୍କ ଭର୍ତ୍ତି ହେବା ସଂଖ୍ୟା ବଢ଼ିବାରେ ଲାଗିଛି। ଫଳରେ ଡାକ୍ତରଖାନାରେ ଭେଣ୍ଟିଲେଟରର ଅଭାବ ଦେଖାଦେଇଛି। ଗତ ୨୪ ଘଣ୍ଟା ମଧ୍ୟରେ ମିସିଗାନରେ ୧୧,୭୮୩ ନୂଆ ଆକ୍ରାନ୍ତ ଚିହ୍ନଟ ହୋଇଥିବାବେଳେ ୨୩୫ ଜଣଙ୍କର ମୃତ୍ୟୁ ଘଟିଛି।
ଏଥି ସହିତ, ଗତ ଦୁଇ ସପ୍ତାହ ମଧ୍ୟରେ ଇଣ୍ଡିଆନାରେ ୪୯ ପ୍ରତିଶତ ଅଧିକ ମାମଲା ଦେଖିବାକୁ ମିଳିଛି। ଡାକ୍ତରଖାନାଗୁଡ଼ିକରେ ଶୃଙ୍ଖଳା ବଜାୟ ରଖିବା ପାଇଁ ନ୍ୟାଶନାଲ ଗାର୍ଡମାନଙ୍କୁ ଡକାଯାଇଛି। ଇତିମଧ୍ୟରେ ଆମେରିକାରେ ଓମିକ୍ରନର ୪୩ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି।
ଶୀତ ବୃଦ୍ଧି ଯୋଗୁ ଏଭଳି ହେଉଥିବା ସ୍ବାସ୍ଥ୍ୟ ବିଶେଷଜ୍ଞ କହିଛନ୍ତି। ଖ୍ରୀଷ୍ଟମାସ ପାଇଁ ବଜାରରେ ବହୁ ସଂଖ୍ୟାରେ ଲୋକ ଭିଡ଼ ଜମାଉଛନ୍ତି। ଫଳରେ ସଂକ୍ରମଣ ଶୀଘ୍ର ବ୍ୟାପିବାରେ ଲାଗିଛି।
ଅପରପକ୍ଷରେ ସ୍ବଜରଲାଣ୍ଡରେ ପୁଣି ଥରେ ଲକ୍ଡାଉନ୍ ଭଳି ପରିସ୍ଥିତି ଉପୁଜିଛି। ବ୍ରିଟେନରେ କରୋନା ମାମଲା ମଧ୍ୟ ଦ୍ରୁତ ଗତିରେ ବୃଦ୍ଧି ପାଉଛି।
ୟୁରୋପୀୟ ଦେଶ ଜର୍ମାନୀର ଡାକ୍ତରମାନେ କହିଛନ୍ତି ଯେ ଦେଶର ନାଗରିକମାନଙ୍କୁ ଆଣ୍ଟି-କୋଭିଡ ଟିକାକରଣର ଚତୁର୍ଥ ଡୋଜ୍ ଦିଆଯିବା ଉଚିତ। ଏପର୍ଯ୍ୟନ୍ତ ଜର୍ମାନୀରେ ୧୧ ଲକ୍ଷ ଲୋକଙ୍କୁ ଆଣ୍ଟି-କୋଭିଡ ଟିକାର ତୃତୀୟ ଡୋଜ୍ ଦିଆଯାଇଛି।
ବ୍ରିଟେନର ଏକ ବୈଜ୍ଞାନିକ ବିଶ୍ଳେଷଣ ଚେତାବନୀ ଦେଇଛି ଯେ ଯଦି ସାମାଜିକ ସମାବେଶ ନିଷେଧ ନ ହୁଏ ତେବେ ଆସନ୍ତା ବର୍ଷ ଜାନୁୟାରୀରୁ କରୋନା ଭାଇରସର ନୂତନ ଭାରିଆଣ୍ଟ୍ ଯୋଗୁ ଦେଶ ସଂକ୍ରମଣର ଏକ ’ବଡ଼ ଲହର’ର ସମ୍ମୁଖୀନ ହୋଇପାରେ।
ଲଣ୍ଡନ ସ୍କୁଲ ଅଫ ହାଇଜିନ ଆଣ୍ଡ ଟ୍ରପିକାଲ ମେଡିସିନ ଦ୍ୱାରା ହୋଇଥିବା ଏକ ସର୍ଭେରେ କୁହାଯାଇଛି ଯେ ବର୍ତ୍ତମାନ ଇଂଲଣ୍ଡରେ ସଂକ୍ରମଣର ହାର ବଢୁଛି। ପରବର୍ତ୍ତୀ ସମୟରେ ଡାକ୍ତରଖାନାରେ ଭର୍ତ୍ତି ହେବା ଲୋକଙ୍କ ସଂଖ୍ୟାରେ ବୃଦ୍ଧି ଘଟିବ।
ଅଧ୍ୟୟନ ସୂଚାଇ ଦେଇଛି ଯେ ’ଓମିକ୍ରନ’ ଆକ୍ରାନ୍ତଙ୍କ ସଂଖ୍ୟା ’ଡେଲ୍ଟା’ ଆକ୍ରାନ୍ତଙ୍କୁ ଅତିକ୍ରମ କରିପାରେ। ଆମେରିକା ସମେତ ୟୁରୋପର ଦେଶଗୁଡିକରେ ବର୍ତ୍ତମାନ ଡେଲ୍ଟା ଭାରିଆଣ୍ଟ ସଂକ୍ରମଣ ରହିଛି। କିନ୍ତୁ ଓମିକ୍ରନ ସଂକ୍ରମଣ ମଧ୍ୟ ଦ୍ରୁତ ଗତିରେ ବଢୁଥିବାରୁ ସରକାରଙ୍କ ଚିନ୍ତା ବୃଦ୍ଧି ପାଇଛି।