କାଏମା,୨୩ା୭(ଶିବପ୍ରସାଦ ମହାନ୍ତି): ଧର୍ମଶାଳା ବ୍ଲକ ବଡ଼କାଏମା ପଞ୍ଚାୟତରେ ପାଣି ଅଭାବ ଯୋଗୁ ଚାଷକାର୍ଯ୍ୟା ବାଧାପ୍ରାପ୍ତ ହୋଇଛି। ବ୍ଲକ ଅଞ୍ଚଳରେ ଅନେକ ଚାଷ ଜମି ପଡ଼ିଆ ପଡ଼ିଥିବା ଚିତ୍ର ସାମ୍ନାକୁ ଆସିଛି। ଅଞ୍ଚଳରେ ଲଗାଣ ବର୍ଷା କୌଣସି ଦିନ ହୋଇନାହିଁ। ଲଘୁଚାପଜନିତ ବର୍ଷାରେ ଖାଲୁଆ ଜମିରେ ପାଣି ରହିବାରୁ କିଛି ଚାଷୀ କାର୍ଯ୍ୟ ଆରମ୍ଭ କରିଛନ୍ତି। କିନ୍ତୁ ଯେଉଁମାନେ ଧାନ ତଳି ପକାଇଥିଲେ ପାଣି ଅଭାବରୁ ସେଗୁଡିକ ଜଳିଯିବାକୁ ବସିଲାଣି। ବଡ଼ କାଏମା ପଞ୍ଚାୟତ ଅରଖପଦା କିଛିଚାଷୀ ବର୍ଷାକୁ ଅପେକ୍ଷା ନ କରି ମୋଟର ସହାୟତାରେ ପାଣି ମଡ଼ାଇ ଧାନ ତଳି ପକାଇଛନ୍ତି। ଏଥିପାଇଁ ଅଧିକ ଖର୍ଚ୍ଚାନ୍ତ ହେବାକୁ ପଡୁଛି। ଚାଷ କାମରେ ବିଳମ୍ବ ସହ ଗଜା ମରୁଡ଼ି ଏଡାଇବା ଲାଗି ଏଭଳି ବିକଳ୍ପ ପନ୍ଥା ଆପଣାଇଥିବା ଚାଷୀ ଚିତ୍ତରଞ୍ଜନ ସାହୁ, ପ୍ରଶାନ୍ତ କୁମାର ବିଶ୍ବାଳ କହିଛନ୍ତି। ବ୍ଲକରେ ଚାଷଜମିଗୁଡ଼ିକ କେନାଲ ଦ୍ୱାରା ଜଳ ସେଚିତ ହୋଇଥାଏ। ଜଳ ସମ୍ପଦ ବିଭାଗ ପକ୍ଷରୁ କେନାଲକୁ କେବଳ ସଫା କରି ରଖାଯାଇଛି। କିନ୍ତୁ କେନାଲରେ ପାଣି ଏବେ ଯାଏ ଆସିନାହିଁ। ଫଳରେ କେନାଲ ପାଣି ଉପରେ ନିର୍ଭର କରୁଥିବା ଚାଷୀ ଏବେ ନିରାଶ ହୋଇଛନ୍ତି। ଏ ସମ୍ପର୍କରେ ଜଳ ସମ୍ପଦ ବିଭାଗ ଅଧିକାରୀ ଚକ୍ରଧର ଜେନା କହିଛନ୍ତି, ଆସନ୍ତା ୨୫ ତାରିଖରେ କେନାଲରେ ପାଣି ଛଡ଼ାଯିବ। କେନାଲ ବନ୍ଧ ମରାମତି କାର୍ଯ୍ୟ ଚାଲୁଥିବାରୁ ଏବେ ଯାଏ ପାଣି ଛଡ଼ା ଯାଇପାରିନାହିଁ।