ଲହୁଣୀପଡ଼ା,୮।୮(ଡି.ଏନ.ଏ.): ସୁନ୍ଦରଗଡ ଜିଲା ଲହୁଣୀପଡା ବ୍ଲକ ଅଞ୍ଚଳରେ ମରୁଡ଼ି ଆଶଙ୍କା ପ୍ରକାଶ ପାଇିଛି। ଚଳିତ ବର୍ଷ ସ୍ବଳ୍ପ ବୃଷ୍ଟିପାତ ଯୋଗୁ ଧାନଚାଷ ବ୍ୟାହତ ହୋଇଛି। ପାଣି ଅଭାବରୁ ଜମି ଫାଟି ଯାଇ ଆଁ କରିଥିବା ବେଳେ ଚାଷୀକୁଳ ହତାଶ ହୋଇ ବର୍ଷାକୁ ଅପେକ୍ଷା କରିଛନ୍ତି। ଅନ୍ୟପକ୍ଷେ ସ୍ବଳ୍ପ ବୃଷ୍ଟିପାତ ଯୋଗୁ ଧାରା ଶ୍ରାବଣ ମାସରେ ପ୍ରଚଣ୍ଡ ଖରା ତାତି ଜନଜୀବନକୁ ଅସ୍ତବ୍ୟସ୍ତ କରିପକାଇଛି। ଆଗକୁ ବର୍ଷା ନ ହେଲେ ପିଲ ମାରିଥିବା ତଳି ଗୁଡିକ ରୁଆ ଯାଇପାରିବ ନାହିଁ ବୋଲି ଚାଷୀମାନେ କହିଛନ୍ତି।
ଲହୁଣୀପଡ଼ା ବ୍ଲକ ଅଞ୍ଚଳରେ ପ୍ରାୟ ୭୦ରୁ ୮୦ ଭାଗ ଲୋକ ଚାଷ ଉପରେ ନିର୍ଭର କରିଥାନ୍ତି। ଚଳିତବର୍ଷ ବର୍ଷା ଅଭାବରୁ ଚାଷକାମ ବାଧାପ୍ରାପ୍ତ ହୋଇଥିବା ବେଳେ ଏ ଅଞ୍ଚଳ ଦେଇ ଯାଇଥିବା କେତେକ କେନାଲ ମଧ୍ୟ ଶୁଖିଲା ପଡିଛି। କେତେକ ସ୍ଥାନରେ ଡ୍ୟାମ୍ ଓ ଚେକ୍ ଡ୍ୟାମ୍ ନିର୍ମାଣ କରାଯାଇଥିଲେ ମଧ୍ୟ ସେଥିରେ ପାଣି ନାହିଁ । ଲହୁଣୀପଡା ଅଞ୍ଚଳରେ ଗତ ଜାନୁଆରୀ ମାସରେ ମାତ୍ର ୪ ଦିନରେ ୬୫ ମିଲିମିଟର ବର୍ଷା ହୋଇଥିବା ବେଳେ ଫେବୃଆରୀରେ ୪ ଦିନରେ ୨୮ ମିଲିମିଟର, ମାର୍ଚ୍ଚରେ ଗୋଟିଏ ଦିନରେ ୧୨ ମିଲିମିଟର ଓ ଏପ୍ରିଲ ମାସରେ ଗୋଟିଏ ଦିନରେ ୮.୮ ମିଲିମିଟର ବର୍ଷା ହୋଇଛି। ମେ ମାସରେ ୯ ଦିନରେ ୮୨ ମିଲିମିଟର, ଜୁନରେ ୧୭୦ ମିଲିମିଟର ଏବଂ ଜୁଲାଇରେ ୧୮ ଦିନରେ ୨୨୯ ମିଲିମିଟର ବର୍ଷା ହେଇଥିବା ରେକର୍ଡ କରାଯାଇଛି । ଯାହାକି ଧାନ ଚାଷ ପାଇଁ ଯଥେଷ୍ଟ ନୁହେଁ।
ସୂଚନାଥାଉକି, ଉକ୍ତ ଅଞ୍ଚଳରେ ୨୦୨୦ରେ ସମୁଦାୟ ୧୬୦୦. ୭୫ ମିଲିମିଟର ଓ ୨୦୨ରେ ୧୬୬୩.ମିଲିମିଟର ବର୍ଷା ହୋଇଥିବା ବେଳେ ଚଳିତ ବର୍ଷ ଜୁଲାଇ ଶେଷ ସୁଦ୍ଧା ୫୯୬ ମିଲିମିଟର ବର୍ଷା ରେକର୍ଡ କରାଯାଇଛି। ଅନ୍ୟ ୨ବର୍ଷ ତୁଳନାରେ ଚଳିତ ବର୍ଷ ଜୁଲାଇ ଶେଷ ପର୍ଯ୍ୟନ୍ତ ତିନି ଭାଗରୁ ଏକ ଭାଗ ବର୍ଷା ହୋଇଥିବାରୁ ମରୁଡି ସୁନିଶ୍ଚିତ ବୋଲି ଚାଷୀମାନେ ଆଶଙ୍କା କରୁଛନ୍ତି। ଅନ୍ୟପକ୍ଷେ ଧାନଚାଷ ପାଇଁ ଚାଷୀମାନେ ବିଭିନ୍ନ ବ୍ୟାଙ୍କ, ଲ୍ୟାମ୍ପ୍ସ ଓ ଘରୋଇ ସଂସ୍ଥାରୁ ଋଣ ନେଇ ଚାଷ କରିଥିବାରୁ ତାର ପରିଶୋଧ କରିବା ଚିନ୍ତା ସେମାନଙ୍କୁ ଘାରିଛି।
