ହିଞ୍ଜିଳିକାଟୁ,୧।୬(ଡି.ଏନ.ଏ): ପାର୍ଟ ଟାଇମ କାମ କରିବା ପଡିଲା ମହଙ୍ଗା। ହିଞ୍ଜିଳି ଥାନା ଦୁର୍ବନ୍ଧ ଗ୍ରାମର ଦାମୋଦର ମହାନ୍ତି ଅନ୍ଲାଇନରେ ପାର୍ଟ ଟାଇମ କାମ କରିବା ଲୋଭରେ ୨ ଲକ୍ଷ ଟଙ୍କ ହରାଇଛନ୍ତି। ଏଥି ନେଇ ଦାମୋଦର ବୁଧବାର ଥାନାରେ ଅଭିଯୋଗ କରିଛନ୍ତି। ଅଭିଯୋଗ କ୍ରମେ କେସ୍ ନଂ- ୩୭୨/୨୩ରେ ପୋଲିସ ଡକାମି ଓ ପ୍ରତାରଣା ମାମଲା ରୁଜୁ କରି ଘଟଣାର ତଦନ୍ତ କରୁଛି।
ପ୍ରକାଶ ଯେ, ଗତ ମାସ ୨୬ ତାରିଖରେ ଦାମୋଦର ମୋବାଇଲକୁ ଏକ ଅଜଣା ମୋବାଇଲରୁ ମେସେଜ ଆସିଥିଲା। ଯେଉଁଥିରେ ଘରେ ବସି ଅନଲାଇନରେ ପାର୍ଟ ଟାଇମ କାମ କରିବା ଅଫର ରହିଥିଲା। ସେହି ଲୋଭରେ ଦାମୋଦର ଉକ୍ତ ନମ୍ବର ସହ ଯୋଗାଯୋଗ କରି ଉକ୍ତ ଅଜଣା ବ୍ୟକ୍ତିଙ୍କ କହିବା ପ୍ରକାରେ ଆମାଜନ ପେ ମାଧ୍ୟମରେ ୩୭ ହଜାର ୫ ଶହ ଟଙ୍କା ଓ ପେଟିଏମ୍ ୟୁପିଆଇଡ଼ି ମାଧ୍ୟମରେ ୯୫ହଜାର ଟଙ୍କା ଟ୍ରାନ୍ସଫର କରିଥିଲେ। ପୁଣି ଗତ ମାସ ୨୭ରେ ଉକ୍ତ ଫୋନ ନମ୍ବରରୁ ଦାମୋଦରଙ୍କୁ ମେସେଜ ଆସିଥିଲା ଯେ, ୬୩ହଜାର ୩୧୩ଟଙ୍କା ଏକ ବ୍ୟାଙ୍କ ଆକାଉଣ୍ଟକୁ ପଠାଇଲେ ପୂର୍ବରୁ ପ୍ରଦାନ କରିଥିବା ଟଙ୍କା ସହ ସମସ୍ତ ଟଙ୍କା ଫେରସ୍ତ ହେବ। ସନ୍ଧ୍ୟାରେ ଦାମୋଦର ଉକ୍ତ ମେସେଜ ଅନୁସାରେ ପୁଣି ୬୩ହଜାର ୩୧୩ ଟଙ୍କା ଉକ୍ତ ବ୍ୟାଙ୍କ ଆକାଉଣ୍ଟକୁ ପଠାଇଥିଲେ। ତେବେ କୌଣସି ଟଙ୍କା ଫେରସ୍ତ ନ ହେବାରୁ ଦାମୋଦର ଠକାମି ଶିକାର ହେବା ନେଇ ବୁଧବାର ହିଞ୍ଜିଳଥାନାରେ ଅଭିଯୋଗ କରିଛନ୍ତି।