ନବରଙ୍ଗପୁର,୫।୨(ସଦାଶିବ ପ୍ରହରଜ): ୨୦୨୩ ମାର୍ଗଶିର ମାସ ଗୁରୁବାର ପ୍ରଥମ କରି ନବରଙ୍ଗପୁର ଜିଲାରେ ଗଡିଥିଲା ଲକ୍ଷ୍ମୀ ବସ୍। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଯୋଜନା ନବରଙ୍ଗପୁର ଜିଲାବାସୀଙ୍କ ପାଇଁ ଆଶୀର୍ବାଦ ପାଲଟିଛି। ଜିଲାର ୧୮୯ ପଞ୍ଚାୟତରେ ମୋଟ ୩୯ ବସ୍ ଚାଲିଥିବାବେଳେ ଜିଲାର ସମସ୍ତ ମାଆଙ୍କର ମୁଖ୍ୟ ସାରଥି ପାଲଟିଛି ଲକ୍ଷ୍ମୀ ବସ୍ । ପୂର୍ବରୁ ଜିଲାର ସହର ଏବଂ ବ୍ଲକ ସଦର ମହକୁମାଠାରୁ ଗ୍ରାମାଞ୍ଚଳକୁ ଗମନାଗମନରେ ବହୁ ଅସୁବିଧା ରହିଥିଲା। ଲକ୍ଷ୍ମୀ ବସ ମାଧ୍ୟମରେ ଜଣେ ଚାଷୀ ବଜାର ସହିତ ଯୋଡ଼ି ହେଉଛି, ଛୋଟ ବଡ଼ ବ୍ୟବସାୟୀ ଗାଁରୁ ସହରକୁ ଆସିବାର ସୁଗମ ବ୍ୟବସ୍ଥା ପାଇଛନ୍ତି । ଜଣେ ରୋଗୀ କମ୍ ପଇସାରେ ଆରାମରେ ଜିଲା ମୁଖ୍ୟ ଚିକିତ୍ସାଳୟକୁ ଆସିପାରୁଛନ୍ତି। ସେହିପରି ଛତ୍ରୀଛାତ୍ର ଗ୍ରାମାଞ୍ଚଳରୁ ବିଦ୍ୟାଳୟ ଓ ମହାବିଦ୍ୟାଳୟକୁ ମାତ୍ର ୫ଟଙ୍କା ଦେଇ ଯାତାୟାତ କରିପାରୁଛନ୍ତି । ବର୍ତ୍ତମାନ ପ୍ରତ୍ୟେକ ଗାଁ ବ୍ଲକ ସହ ଏବଂ ପ୍ରତ୍ୟେକ ବ୍ଲକ ସହର ସହିତ ଯୋଡିହୋଇଛି । ଫଳରେ ଲୋକଙ୍କ ମଧ୍ୟରେ ସମ୍ପର୍କ ଆହୁରି ମଜବୁତ୍ କରିପାରିଛି ଲକ୍ଷ୍ମୀ ବସ ।
ନବରଙ୍ଗପୁର ଏକ ଆଦିବାସୀ ଅଧ୍ୟୁଷିତ ଜିଲା। ଜିଲାରେ ପୂର୍ବରୁ ଗ୍ରାମାଞ୍ଚଳକୁ ଗମନାଗମର ବହୁତ ଅସୁବିଧା ଥିଲା। ଉମରକୋଟ ବ୍ଲକ ବଡକୁମାରୀ ପଞ୍ଚାୟତର ମୁନା ଡାକୁଆ କୁହନ୍ତି, ପୂର୍ବରୁ ଉମରକୋଟ ବ୍ୟାଙ୍କ ଓ ଉମରକୋଟ ସହରକୁ ଯିବାକୁ ହେଲେ ଅଟୋଭଡା ୫୦ ଟଙ୍କା ଲାଗୁଥିଲା। ବର୍ତ୍ତମାନ ଲକ୍ଷ୍ମୀ ବସ୍ ଯୋଜନା ହେବା ଦ୍ବାରା ସୁବିଧାରେ ବ୍ୟାଙ୍କ ଓ ସହରକୁ ଆମେ ଯାଇପାରୁଛୁ । ସେହିପରି ଉମରକୋଟ ପଡ଼ାଗଡର ଗୀତା ପାଇକ, ବାଉଁଶବେଡାର ଅମ୍ବିକା ପାତ୍ର ଓ ଗୋଟିଗୁଡାର ବିଦ୍ୟୁତପ୍ରଭା ବେହେରା କୁହନ୍ତି, ଲକ୍ଷ୍ମୀ ବସ ଆମକୁ ସହରରେ ଥିବା ଡାକ୍ତରଖାନା ଯିବାରେ ବହୁ ସହାୟକ ହେଇଛି । ଏ ନେଇ ସେମାନେ ମୁଖ୍ୟମନ୍ତ୍ରୀ ଓ ୫-ଟି ତଥା ଆମ ଓଡ଼ିଶା ନବୀନ ଓଡ଼ିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କୁ କୃତଜ୍ଞତା ଜଣାଇଛନ୍ତି। ସେହିପରି କୋଷାଗୁମୁଡା ବ୍ଲକର ୨୬ଟି ପଞ୍ଚାୟତକୁ ଲକ୍ଷ୍ମୀ ବସ୍ ସଂଯୋଗ କରିଥିବାବେଳେ ଛତିଶଗଡ ସୀମାନ୍ତବର୍ତ୍ତି ତଥା ଅପହଞ୍ଚ ଗ୍ରାମ ମୋତିଗାଁ, ବଡଗୁମୁଡା, ଉକିଆ ପାଲି, ବାଙ୍କୁଲୀ, ଆଟିଗାଁ ଓ ଏମକେରା ଗାଁକୁ ଲକ୍ଷ୍ମୀ ବସ୍ ଚଳାଚଳ କରୁଥିବାରୁ ଲୋକେ ବହୁତ ଉପକୃତ ହେଉଛନ୍ତି। ଲକ୍ଷ୍ମୀ ବସ୍ ସେବା ଦ୍ୱାରା ବ୍ୟବସାୟରେ ଉନ୍ନତି ଘଟୁଥିବା ବାଙ୍କୁଲିର ଜଣେ ମହିଳା ବ୍ୟବସାୟୀ ସାହେବ ଯାନୀ କହିଛନ୍ତି। କୋଷାଗୁମୁଡା ବ୍ଲକ୍ରେ ୬ଟି ଲକ୍ଷ୍ମୀ ବସ୍ ଚଳାଚଳ କରୁଥିବାରୁ ଜିଲା ସଦର ମହକୁମାଠାରୁ ପ୍ରାୟ ୮୦କିଲୋମିଟର ଦୂର ଗ୍ରାମାଞ୍ଚଳରେ ଗମନାଗମନ ସୁବିଧା ହୋଇପାରିଥିବା ଉକିଆପାଲିର ଦେବରାଜ ମାଝୀ ଓ ଏକରିର ମାଧବ ମିର୍ଗାନ, ଆଟିଗାଁର ଚିତ୍ତରଞ୍ଜନ ଗୌଡ଼ ଏବଂ ବଡ ଗୁମୁରୁ ମୋତିରାମ ଭତ୍ରା କହିଛନ୍ତି। ଜିଲାର ସୀମାନ୍ତବର୍ତ୍ତି ବ୍ଲକ ଚନ୍ଦାହାଣ୍ଡିର ୧୪ଟି ପଞ୍ଚାୟତକୁ ଲକ୍ଷ୍ମୀ ବସ ସେବା ସଂଯୋଗ କରୁଥିବାରୁ ଉପାନ୍ତ ଅଞ୍ଚଳ ଭାବେ ପରିଚିତ କୁହୁଡି, ଫଟକି, ଗମ୍ଭାରୀ ଗୁଡା, ଦଲବେଢା, ପାଟ ଖୋଲିଆ ଓ ଜମାଦାର ପଡ଼ା ଭଳି ବହୁ ଅଞ୍ଚଳର ଲୋକେ ଉପକୃତ ହେଉଥିବା ପାଟଖଲିଆ ଗ୍ରାମ ପଞ୍ଚାୟତର ଦ୍ରୌପଦୀ ସୋରି କହିଛନ୍ତି । ରାଇଘର ବ୍ଲକରେ ମଧ୍ୟ ୨୬ଟି ପଞ୍ଚାୟତ ରହିଥିବା ବେଳେ ବର୍ତ୍ତମାନ ସମସ୍ତ ପଞ୍ଚାୟତକୁ ଲକ୍ଷ୍ମୀ ବସ୍ ସୁବିଧା ହୋଇପାରିଛି। ଏହି ବ୍ଲକର କିଛି ପଞ୍ଚାୟତ ବ୍ଲକ ସଦର ମହକୁମାର ନିକଟ ବର୍ତ୍ତି ରହିଥିବା ବେଳେ ଆଉ କିଛି ପଞ୍ଚାୟତ ବ୍ଲକ ସଦର ମହକୁମାଠାରୁ ବହୁ ଅପହଞ୍ଚରେ । ବ୍ଲକ୍ର ମୁଣ୍ଡିବେଢା, ବୋବେଇ, ହଳଦୀ, ଜଳନ ପାରା, ଗୋନା, ଖୁଡୁପୁ ଓ ପରଚି ପାରା, ଟିମନ ପୁରକୁ ବର୍ତ୍ତମାନ ବସ୍ ସୁବିଧା ହୋଇଥିବାରୁ ବବେଇ ପଞ୍ଚାୟତର ହେମବାଇ ଗଣ୍ଡ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି।