ମୁମ୍ବାଇ,୨୨।୮: ସାରା ଦେଶରେ ଶନିବାର ଉତ୍ସବର ମାହୋଲ ଦେଖାଦେଇଛି। ଚଳିତ ଥର କରୋନା କାଳ ଯୋଗୁ ସାର୍ବଜନୀନ ସ୍ଥାନରେ ଗଣେଶ ପୂଜା ଉପରେ କଟକଣା ଲଗାଯାଇଥିବା ବେଳେ ନିଜ ନିଜ ଘରେ ସମସ୍ତେ ପୂଜାର୍ଚ୍ଚନା କରିଛନ୍ତି। ପ୍ରତିବର୍ଷ ମାୟାନଗରୀ ମୁମ୍ବାଇରେ ବେଶ୍ ଆଡ଼ମ୍ବରରେ ଗଣପତି ବାପ୍ପାଙ୍କ ଉତ୍ସବ ପାଳନ କରାଯାଇଥାଏ। ବିଶେଷ କରି ସବୁଠାରୁୁ ପ୍ରସିଦ୍ଧ ଲାଲବାଗ ରାଜାରେ ବେଶ୍ ଧୁମ୍ଧାମରେ ଏହି ଉତ୍ସବ ପାଳିତ ହୋଇଥାଏ। ପ୍ରତିବର୍ଷ ଏଠାରେ ସ୍ବଉଚ୍ଚ ତୋରଣ ସହ ବିଭିନ୍ନ କିସମର ପେଣ୍ଡାଲ ଓ ଭିନ୍ନ ଭିନ୍ନ ଥିମ୍କୁ ନେଇ ତିଆରି କରାଯାଇଥାଏ। ଯାହା ଭକ୍ତଙ୍କୁ ବେଶ୍ ଆକର୍ଷଣୀୟ କରିଥାଏ। ହେଲେ ଚଳିତ ଥର ଏଠାରେ ଫିକା ଗଣେଶ ପୂଜା ପାଳନ କରାଯିବା ସହ ଏକ ନିଆରା ଉଦ୍ୟମ କରାଯାଇଛି। ଲାଲବାଗ ରାଜା ପେଣ୍ଡାଲରେ ଏଥର ଆରୋଗ୍ୟ ଉତ୍ସବ ପାଳନ କରାଯାଇଛି। ସରକାରଙ୍କ ନିର୍ଦ୍ଦେଶ ଅନୁସାରେ ବିଶାଳ ପ୍ରତିମା ବଦଳରେ ଏଠାରେ ୪ ଫୁଟର ପ୍ରତିମା ସ୍ଥାପନା କରାଯାଇ ପୂଜାର୍ଚ୍ଚନା କରାଯାଇଛି। ଏଥିସହ ବ୍ଲଡ ଓ ପ୍ଲାଜମା ଡୋନେସନ କ୍ୟାମ୍ପ ଲଗାଯାଇଥିବା ଜଣାପଡ଼ିଛି। ଲୋକମାନେ ସ୍ବେଚ୍ଛାକୃତ ଭାବେ ରକ୍ତ ଦାନ କରିବା ସହ ପ୍ଲାଜମା ମଧ୍ୟ ଦାନ କରିଥିବା ଦେଖିବାକୁ ମିଳିଛି।