କାଠମାଣ୍ଡୁ,୧୧ା୧(ପି.ଟି): ନେପାଳ ସ୍ପିନର ସନ୍ଦୀପ ଲାମିଚାନେଙ୍କୁ ବୁଧବାର କାଠମାଣ୍ଡୁର ଏକ କୋର୍ଟ ୮ ବର୍ଷ ଜେଲ ଦଣ୍ଡାଦେଶ ଦେଇଛନ୍ତି। ପୂର୍ବରୁ ଏକ ବଳାତ୍କାର ମାମଲାରେ ଲାମିଚାନେ ଦୋଷୀ ସାବ୍ୟସ୍ତ ହୋଇଥିଲେ। ଜଣେ ୧୮ ବର୍ଷୀୟା ମହିଳାଙ୍କୁ ଲାମିଚାନେ ବଳାତ୍କାର କରିଥିଲେ। ସିଙ୍ଗଲ ଜଜ୍ ଖଣ୍ଡପୀଠ ମାମଲାର ରାୟ ଶୁଣାଇବା ସହ ୨୩ ବର୍ଷୀୟ ଲାମିଚାନେଙ୍କୁ ୩ ଲକ୍ଷ ଟଙ୍କାର ଫାଇନ୍ ଓ ପୀଡ଼ିତାଙ୍କୁ ୨ ଲକ୍ଷ ଟଙ୍କା କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛନ୍ତି। ଉଚ୍ଚ ନ୍ୟାୟାଳୟରେ ମାମଲାର ପୁନଃ ଆବେଦନ କରିବା ନେଇ ଲାମିଚାନେଙ୍କ ଓକିଲ ସରୋଜ ଘିମିରେ ସୂଚନା ଦେଇଛନ୍ତି। ସେପ୍ଟେମ୍ବର ୨୦୨୩ରେ ପ୍ରଥମ ଲାମିଚାନେଙ୍କ ନାମରେ ଏକ ଆରେଷ୍ଟ ଓ୍ବାରେଣ୍ଟ ଜାରି ହୋଇଥିଲା। ସେ ସମୟରେ ନେପାଳର ଅଧିନାୟକ ରହିଥିବା ବେଳେ ତାଙ୍କୁ ଅଧିନାୟକ ପଦରୁ ସସ୍ପେଣ୍ଡ କରିଥିଲା କ୍ରିକେଟ ଆସୋସିଏଶନ୍ ଅଫ୍ ନେପାଳ। ସେ କାରିବିଆନ୍ ପ୍ରିମିୟର୍ ଲିଗ୍ରେ ଜାମାଇକା ତଲାଓ୍ବାସ ପକ୍ଷରୁ ଖେଳୁଥିବା ବେଳେ ଫ୍ରାଞ୍ଚାଇଜ ତାଙ୍କୁ ତୁରନ୍ତ ରିଲିଜ୍ କରିଥିଲା। ସେ ନେପାଳ ଫେରିବା ପରେ ତାଙ୍କୁ ତୁରନ୍ତ ଗିରଫ କରାଯାଇଥିଲା।
ଏକ ପେସବୁକ୍ ପୋଷ୍ଟ ଜରିଆରେ ନିଜକୁ ନିର୍ଦ୍ଦୋଷ ବୋଲି ଦାବି କରିବା ସହ ସମସ୍ତ ପ୍ରକାର ତଦନ୍ତରେ ସହଯୋଗ କରିବେ ବୋଲି ମଧ୍ୟ ସେ ଲେଖିଥିଲେ। ଏହାପରେ ନେପାଳ ପାଇଁ ବିଶ୍ୱକପ ଯୋଗ୍ୟତା ପର୍ଯ୍ୟାୟରେ ମଧ୍ୟ ଖେଳିଥିଲେ। ସେ ନେପାଳ ପାଇଁ ୧୦୦ ଦିନିକିଆ ମ୍ୟାଚ୍ ଖେଳି ୧୦୦ ଉଇକେଟ ନେଇଛନ୍ତି। ଏହା ବାଦ୍ ସେ ଆଇପିଏଲ୍ରେ ଦିଲ୍ଲୀ ଡେୟାର ଡେଭିଲ୍ସ ପାଇଁ ଦୁଇଟି ସିଜନ ଖେଳିଛନ୍ତି। ୨୦୧୮-୨୦ ମଧ୍ୟରେ ସେ ୧୩ ଉଇକେଟ ଅକ୍ତିଆର କରିଛନ୍ତି।