କୋରାପୁଟ/ନାରାୟଣପାଟଣା,୧୭ା୮(ସ୍ବ.ପ୍ର./ଡି.ଏନ୍.ଏ.): କୋରାପୁଟ ଜିଲା ବନ୍ଧୁଗାଁ ବ୍ଲକ ଅନ୍ତର୍ଗତ ଆଲମଣ୍ଡା ଲ୍ୟାମ୍ପ୍ସ ପରିଚାଳନା ନିର୍ଦ୍ଦେଶକ ଆର୍ ରାମକୃଷ୍ଣ ଭିଜିଲାନ୍ସ ଜାଲରେ ପଡ଼ିଛନ୍ତି। ସେ ଜଣେ ଚାଷୀଙ୍କଠାରୁ ୩୫ହଜାର ଟଙ୍କା ଲାଞ୍ଚ ନେଉଥିବା ବେଳେ ଜୟପୁର ଭିଜିଲାନ୍ସ ବିଭାଗ କାବୁ କରିଛି। ଏଥିସହ ତାଙ୍କ ନିକଟରୁ ରଙ୍ଗ ବୋଳା ୩୫ହଜାର ଟଙ୍କା ଜବତ ହୋଇଛି।
ସୂଚନାନୁସାରେ, ଲ୍ୟାମ୍ପ୍ସ ପରିଚାଳନା ନିର୍ଦ୍ଦେଶକ ରାମକୃଷ୍ଣ ନୀଲାବାଡି ଗ୍ରାମର ଜଣେ ଚାଷୀଙ୍କଠାରୁ ଗତ ମଣ୍ଡିରେ ଧାନ ବିକ୍ରି ବାବଦକୁ ୩୫ ହଜାର ଟଙ୍କା ଲାଞ୍ଚ ଦାବି କରିଥିଲେ। ନଚେତ ଆଗମୀ ମଣ୍ଡିରେ ନାମ ପଞ୍ଜୀକରଣ ନ କରିବା ପାଇଁ ଧମକ ଦେଇ ଆସୁଥିଲେ। ତେବେ ଚାଷୀ ଏହାକୁ ବିରୋଧ କରିବା ସହ ଏତେ ଟଙ୍କା ଦେଇ ପାରିବେ ନାହିଁ ବୋଲି କହିଥିଲେ। କିନ୍ତୁ ରାମକୃଷ୍ଣ ଟଙ୍କା ନ ଦେଲେ ଆଗାମୀ ମଣ୍ଡିରେ ନାମ ପଞ୍ଜୀକରଣ କରିବେ ନାହିଁ ବୋଲି ରୋକ୍ଠୋକ୍ ମନା କରିଦେଇଥିଲେ। ଶେଷରେ ବାଧ୍ୟ ହୋଇ ଚାଷୀ ଜଣଙ୍କ ଭିଜିଲାନ୍ସ ଦ୍ବାରସ୍ଥ ହୋଇଥିଲେ। ଏହାପରେ ଭିଜିଲାନ୍ସ ବିଭାଗର ପୂର୍ବ ଯୋଜନା ମୁତାବକ ଚାଷୀ ଜଣଙ୍କ ବୁଧବାର ପୂର୍ବାହ୍ନରେ ଆଲମଣ୍ଡା ଲ୍ୟାମ୍ପ୍ସ କାର୍ଯ୍ୟାଳୟକୁ ଯାଇ ଆଗାମୀ ମଣ୍ଡିରେ ନାମ ପଞ୍ଜୀକରଣ ବାବଦକୁ ଲ୍ୟାମ୍ପ୍ସ ପରିଚାଳନା ନିର୍ଦ୍ଦେଶକ ଆର୍ ରାମକୃଷ୍ଣଙ୍କୁ ୩୫ ହଜାର ଟଙ୍କା ଲାଞ୍ଚ ଦେଉଥିବା ବେଳେ ସେଠାରେ ପୂର୍ବରୁ ଲୁଚି ରହିଥିବା ଭିଜିଲାନ୍ସ ଟିମ୍ ରାମକୃଷ୍ଣଙ୍କୁ କାବୁ କରିଥିଲା। ଏଥିସହିତ ଭିଜିଲାନ୍ସ ବିଭାଗର ଏକ ଟିମ୍ ଆଲମଣ୍ଡାସ୍ଥିତ ତାଙ୍କ ଘରେ ଛାନ୍ଭିନ୍ ଚାଲିଥିବା ଭିଜିଲାନ୍ସ ବିଭାଗ ପକ୍ଷରୁ ପ୍ରକାଶ।