କଟକ ଅଫିସ,୨୯ା୮: ହାଇକୋର୍ଟରେ ଶୁକ୍ରବାର ପୁରୀ ବଗଲା ଧର୍ମଶାଳା ଜମିର ଦସ୍ତାବିଜ ଦାଖଲ କରାଯାଇଛି। ପୁରୀ ତହସିଲ କାର୍ଯ୍ୟାଳୟର ଏକ କେସ୍ ରେକର୍ଡରେ ବଗଲା ଧର୍ମଶାଳା ଦାନରେ ମିଳିଥିବା ନେଇ ଏଥିରେ ଉଲ୍ଲେଖ ରହିଛି। ଆବେଦନକାରୀ ଜଗନ୍ନାଥ ବସ୍ତିଆ ଇ-ଫାଇଲିଂ ମାଧ୍ୟମରେ ଓଇଏ କେସ୍ ରେକର୍ଡ ନମ୍ବର ୩୯/୧୯୯୯ର ନକଲ ହାଇକୋର୍ଟରେ ଦାଖଲ କରିଛନ୍ତି।
ବାବୁ କହ୍ନେୟାଲାଲ ବଗଲା ୧୯୦୦ ମସିହାରେ ବଙ୍ଗଳା ସରକାରଙ୍କଠାରୁ ଏହି ଜମି ନେଇ ପୁରୀ ବଡ଼ଦାଣ୍ଡରେ ଧର୍ମଶାଳା ନିର୍ମାଣ କରିଥିଲେ। ୧୯୦୫ରେ ତାହାକୁ ସେ ପୁରୀ ଜିଲା ମାଜିଷ୍ଟ୍ରେଟ ତଥା ଲଜିଂ ହାଉସ ଫଣ୍ଡ କମିଟି ସଭାପତିଙ୍କୁ ହସ୍ତାନ୍ତର କରିଥିବା ଓଇଏ କେସ୍ ରେକର୍ଡରେ ସ୍ପଷ୍ଟ ଭାବେ ତହସିଲଦାର ଉଲ୍ଲେଖ କରିଛନ୍ତି। ପୁରୀ ତହସିଲଦାରଙ୍କ ଏହି ନିର୍ଦ୍ଦେଶକୁ ତତ୍କାଳୀନ ଉପଜିଲାପାଳ ୩୧ ଅଗଷ୍ଟ ୨୦୦୦ରେ ଅନୁମୋଦନ କରିଥିଲେ। ଏହା ପରେ ପୁରୀ ବଳଗଣ୍ଡି ରାଜସ୍ବ ମୌଜାର ଖାତା ନମ୍ବର ୨୪୨ରେ ଥିବା ଏ ୨.୫୭୪ ଡେସିମିଲ ଜମି ଲଜିଂ ହାଉସ୍ ଫଣ୍ଡ କମିଟି ନାମରେ ରେକର୍ଡ କରାଯାଇଥିଲା। ଜମିର ସଲାମି ଏବଂ ବକେୟା ରେଣ୍ଟ ଭାବେ ରାଜସ୍ବ ନିରୀକ୍ଷକ ସେତେବେଳେ ଲଜିଂ ହାଉସ ଫଣ୍ଡ କମିଟିଠାରୁ ୧,୦୪,୧୧୮ ଟଙ୍କା ଆଦାୟ କରିଥିଲେ। ବଗଲା ଧର୍ମଶାଳା ଜମି ୧୮୮୮-୮୯ ମସିହା ସାବକ ରେକର୍ଡରେ ଶ୍ରୀଜଗନ୍ନାଥ ମହାପ୍ରଭୁଙ୍କ ନାମରେ ରହିଥିବା କେସ୍ ରେକର୍ଡରେ ତହସିଲଦାର ଉଲ୍ଲେଖ କରିଛନ୍ତି। ତେଣୁ ଲଜିଂ ହାଉସ ଫଣ୍ଡ କମିଟିଠାରୁ ସଲାମି ନେଇ ତାଙ୍କ ନାମରେ ଜମି ମାଲିକାନା ରେକର୍ଡ କରିଥିବା ରାଜସ୍ବ ବିଭାଗ ପୁଣି ଥରେ ବଗଲା ଧର୍ମଶାଳା ଜମି ନିଜ ନାମରେ ରେକର୍ଡ କରିବା ସମ୍ପୂର୍ଣ୍ଣ ବେଆଇନ ବୋଲି ସାମାଜିକ କର୍ମୀ ଜଗନ୍ନାଥ ବସ୍ତିଆ କହିଛନ୍ତି। କହ୍ନେୟାଲାଲ ବଗଲାଙ୍କଠାରୁ ଦାନରେ ପାଇଥିବା ଜମିକୁ ପୁରୀ ଜିଲାପାଳ ୬ ଜଣ ଲଜିଂ ମାଲିକଙ୍କୁ ବିକ୍ରି କରିବା ଆଇନ ବହିର୍ଭୂତ କାର୍ଯ୍ୟ ବୋଲି ସେ ଉଲ୍ଲେଖ କରିଛନ୍ତି। ପୁରୀ ତହସିଲଦାରଙ୍କ କାର୍ଯ୍ୟାଳୟର ଏହି ପୁରୁଣା କେସ୍ ରେକର୍ଡରେ ବଗଲା ଧର୍ମଶାଳା ନିର୍ମାଣ ଓ ହସ୍ତାନ୍ତର ସମ୍ପର୍କରେ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ପ୍ରମାଣ ରହିଛି। ୧୯୪୬ରେ ବଗଲା ଧର୍ମଶାଳା ଜମି ଏକ ସଂସ୍ଥାକୁ ହସ୍ତାନ୍ତର ପାଇଁ ଉଦ୍ୟମ ହୋଇଥିଲା। ତତ୍କାଳୀନ ରାଜ୍ୟପାଳ କୈଳାସନାଥ କାଟ୍ଜୁଙ୍କ ହସ୍ତକ୍ଷେପ ପରେ ଏହି ଉଦ୍ୟମ ବିଫଳ ହୋଇଥିଲା। ଧର୍ମଶାଳା ଜମି ଅନ୍ୟ କୌଣସି ଉଦ୍ଦେଶ୍ୟରେ ବ୍ୟବହାର କରାଯାଇପାରିବ ନାହିଁ କିମ୍ବା ଅନ୍ୟ କାହାକୁ ହସ୍ତାନ୍ତର କରାଯିବ ନାହିଁ ବୋଲି ତତ୍କାଳୀନ ରାଜ୍ୟପାଳ ନିର୍ଦ୍ଦେଶ ଦେଇଥିଲେ ବୋଲି ଆବେଦନକାରୀ ଉଲ୍ଲେଖ କରିଛନ୍ତି।