ଦାରିଙ୍ଗବାଡି,୧।୧୦(ଡି.ଏନ.ଏ.): କନ୍ଧମାଳ ଜିଲା ଦାରିଙ୍ଗବାଡିକୁ ସଂଯୋଗ କରୁଥିବା ୫୯ନଂ ଜାତୀୟ ରାଜପଥର ଗାଜଲବାଡ଼ି ଘାଟି ବର୍ଷାରେ ଗତ ୧୧ଦିନ ତଳେ ଭୂସ୍ଖଳନ ହୋଇଥିଲା। ହେଲେ ଏବେ ସୁଦ୍ଧା ତାହା ସ୍ବାଭାବିକ ହୋଇପାରିନାହିଁ। ଯାହାକୁ ନେଇ ଅସନ୍ତୋଷ ଦେଖାଦେଇଛି। ଉକ୍ତ ରାଜପଥଟି ଗୋପାଳପୁରଠାରୁ ରାଇପୁରକୁ ସଂଯୋଗ ହେଉଥିବା ବେଳେ ଏହି ରାଜପଥ ଉପରେ କନ୍ଧମାଳ ସମେତ ପଡୋଶୀ ଗଞ୍ଜାମ, ଗଜପତି, କଳାହାଣ୍ଡି, ନୂଆପଡା, ଆଦି ଜିଲାର ଲୋକ ନିର୍ଭର କରୁଛନ୍ତି। ହେଲେ ସେହି ରାଜପଥ ଏବେ ବନ୍ଦ ରହିଥିବାରୁ ଭାରିଯାନ ଯାତାୟାତ ବନ୍ଦ ରହିଛି। ଫଳରେ ପନିପରିବା, ଅତ୍ୟାବଶ୍ୟକୀୟ ସାମଗ୍ରୀ ନେବା ଆଣିବା କରୁଥିବା ଗାଡିଗୁଡିକ ଯାତାୟାତ ବନ୍ଦ ଯୋଗୁଁ ଦରଦାମ ବୃଦ୍ଧିପାଉଛି। କାର୍ଯ୍ୟ ବିଳମ୍ବ ଯୋଗୁ ଏବେ ଦିନକୁ ଦିନ ସମସ୍ୟା ବଢିବାରେ ଲାଗିଛି। ଆହୁରି କିଛିଦିନ ମରାମତି କାର୍ଯ୍ୟରେ ସମୟ ଲାଗିବ ବୋଲି ଜାତୀୟ ରାଜପଥ ବିଭାଗର କନିଷ୍ଠ ଯନ୍ତ୍ରୀ ଜୟଦେବ ଦେ କହିଛନ୍ତି। ଅନ୍ୟପକ୍ଷେ, ବ୍ରହ୍ମପୁର, ଭୁବନେଶ୍ୱର ଯାତାୟାତ କରୁଥିବା ସମସ୍ତ ବସ୍କୁ ପ୍ରଶାସନ ପକ୍ଷରୁ ବନ୍ଦ କରିଦିଆଯାଇଥିବା ବେଳେ ଶୁକ୍ରବାର ଏକ ଘରୋଇ ବସ୍କୁ ସେହିରାସ୍ତାରେ ବିପଦ ପୂର୍ଣ୍ଣଭାବେ ଯିବା ପାଇଁ ସୁଯୋଗ ଦିଆଯାଇଥିବାରୁ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଥିଲା। ଏ ନେଇ ଯନ୍ତ୍ରୀ ଜୟଦେବ ଦେ କହିଛନ୍ତି ଯେ, ସ୍କୁଲ ଛୁଟି ହୋଇଥିବାରୁ ଛାତ୍ରୀଛାତ୍ରଙ୍କ ଯାତାୟାତ ପାଇଁ ଏକ ବସ୍କୁ ଛଡା ଯାଇଥିଲା ଆଉ କାର୍ଯ୍ୟ ଶେଷ ନ ହେବା ପର୍ଯ୍ୟନ୍ତ କୌଣସି ଭାରିଯାନ ଛଡା ନ ଯିବା ସହ ସୁରକ୍ଷାକୁ ଗୁରୁତ୍ୱ ଦିଆଯିବ ବୋଲି ସେ କହିଛନ୍ତି। ତେବେ ଖୁବ୍ଶୀଘ୍ର କାର୍ଯ୍ୟ ଶେଷ କରାଯିବା ପାଇଁ ଦାବି ହୋଇଛି।