ରାୟଗଡ଼ା,୮।୮(ଆଶିଷ ରଞ୍ଜନ ପଣ୍ଡା): ରାୟଗଡ଼ା ଜିଲା ଶିକରପାଇ ଓ କେଉଟଗୁଡ଼ା ରେଳ ଷ୍ଟେଶନ ମଝିରେ ଥିବା ୩୫ ନମ୍ବର ଟନେଲ ନିକଟରେ ଗୁରୁବାର ଭୂସ୍ଖଳନ ଘଟିଛି। ନିକଟସ୍ଥ ପାହାଡ଼ରୁ ମାଟି ଅତଡ଼ା ଓ ପଥର ଖସି ରେଳ ଧାରଣା ଉପରେ ପଡ଼ିବାରୁ କୋରାପୁଟ- ରାୟଗଡା (କେ-ଆର୍) ରେଳପଥରେ ଦିନ ତମାମ ରେଳ ଚଳାଚଳ ବାଧାପ୍ରାପ୍ତ ହୋଇଛି। ଦୁର୍ଘଟଣାରୁ ଜଗଦଲପୁର- ହାଓଡା ସମଲେଶ୍ୱରୀ ଏକ୍ସପ୍ରେସ୍ ଅଳ୍ପକେ ବର୍ତ୍ତିଯାଇଥିବା ସୂଚନା ମିଳିଛି।
ଗୁରୁବାର ପୂର୍ବାହ୍ନରେ ସେହି ବାଟେ ସମଲେଶ୍ୱରୀ ଏକ୍ସପ୍ରେସ୍ ଯିବାର ଥିଲା। ହେଲେ ଭୂସ୍ଖଳନ ସମ୍ପର୍କରେ ଉଭୟ ଶିକରପାଇ ଓ କେଉଟଗୁଡା ରେଳଷ୍ଟେଶନ କର୍ତ୍ତୃପକ୍ଷ ସୂଚନା ପାଇ ସମଲେଶ୍ୱଶରୀ ଏକ୍ସପ୍ରେସ୍ ଟ୍ରେନ୍କୁ ଶିକରପାଇ ଷ୍ଟେଶନରେ ଅଟକ ରଖାଯାଇଥିଲା।
ସୂଚନା ପାଇ ରାୟଗଡ଼ା ରେଲଓ୍ବେ ରିଲିଫ ଟିମ୍ ସରଞ୍ଜାମ ସହ ଘଟଣାସ୍ଥଳରେ ପହଞ୍ଚତ୍ ରେଳଧାରଣା ଉପରେ ପଡ଼ିଥିବା ପଥର ଓ ମାଟି ଅତଡ଼ା ହଟାଇ ସଫାକରିଥିଲେ। ଏହାପରେ ସମଲେଶ୍ୱରୀ ଏକ୍ସପ୍ରେସ୍ ରାୟଗଡ଼ା ଅଭିମୁଖେ ଯାତ୍ରା କରିଥିଲା। ପ୍ରାୟ ୩ ଘଣ୍ଟାରୁ ଊଦ୍ଧର୍ବ ସମୟ ସମଲେଶ୍ୱରୀ ଏକ୍ସପ୍ରେସ୍ ଅଟକି ରହିଥିଲା। ଫଳରେ ଯାତ୍ରୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ।
ସମଲେଶ୍ୱରୀ ଏକ୍ସପ୍ରେସ୍ ଯିବା ପରେ ରେଲଓ୍ବେ ବୈଷୟିକ ଟିମ୍ ପୁଣି ରେଳ ଚଳାଚଳ ବନ୍ଦ ରଖି ପାହାଡ଼ ଉପର ଭାଗ ଏକ୍ସକାଭେଟର ଜରିଆରେ ସଫା କରିଥିଲେ। ଫଳରେ ଏହି ରେଳପଥରେ ଦିନ ତମାମ ରେଳ ଚଳାଚଳ ବାଧାପ୍ରାପ୍ତ ହୋଇଥିଲା। ଏଠାରେ ପୁଣି ଭୂସ୍ଖଳନ ହେବାର ସମ୍ଭାବନା ଥିବାରୁ ସମସ୍ତ ଟ୍ରେନ ୨୦ କି.ମି. ଗତିରେ ଟିକିରିଠାରୁ ରାୟଗଡ଼ା ମଧ୍ୟରେ ଚଳାଚଳ କରିବା ପାଇଁ ରେଲଓ୍ବେ ପକ୍ଷରୁ ନିର୍ଦ୍ଦେଶ ଜାରି କରାଯାଇଛି।
