କଲମ୍ବୋ,୨୨।୧୦: ଲଙ୍କା ପ୍ରିମିୟର ଲିଗ୍ (ଏଲ୍ପିଏଲ୍)ରେ ବଲିଉଡ୍ର ଏଣ୍ଟ୍ରି ହୋଇଛି। ବଲିଉଡ୍ ଅଭିନେତା, ପ୍ରଯୋଜକ, ଲେଖକ ତଥା ଫିଲ୍ମ ନିର୍ମାତା ସୋହେଲ ଖାନ୍ କାଣ୍ଡି ଫ୍ରାଞ୍ଚାଇଜ୍ର ମାଲିକ ହେବାର ଗୌରବ ଅର୍ଜନ କରିଛନ୍ତି। ଏହି ଟି୨୦ ଲିଗ୍ ନଭେମ୍ବର ୨୧ରୁ ଆରମ୍ଭ ହୋଇ ଡିସେମ୍ବର ୧୩ ତାରିଖରେ ଶେଷ ହେବ। ପାଲିକେଲ ଓ ହାମ୍ବାନଟୋଟାରେ ଲିଗ୍ର ମ୍ୟାଚ୍ ସବୁ ଆୟୋଜନ ହେବ।
ସୋମବାର କାଣ୍ଡି ଫ୍ରାଞ୍ଚାଇଜ୍ ଓ୍ବେଷ୍ଟଇଣ୍ଡିଜ କିମ୍ବଦନ୍ତୀ ଖେଳାଳି କ୍ରିସ୍ ଗେଲ୍ଙ୍କୁ ପ୍ଲେୟର୍ସ ଡ୍ରାଫ୍ଟରେ ସାମିଲ କରିଛି। ସ୍ଥାନୀୟ ଖେଳାଳି କୁଶଲ ପେରେରାଙ୍କ ସମେତ ଟି୨୦ ସ୍ପେଶାଲିଷ୍ଟ କୁଶଲ ମେଣ୍ଡିସ୍, ନୂଆନ ପ୍ରଦୀପ ଓ ଇଂଲଣ୍ଡ ଡାହାଣହାତୀ ଦ୍ରୁତ ବୋଲର ଲିଅମ ପ୍ଲଙ୍କେଟ୍ଙ୍କୁ ମଧ୍ୟ ଏହି ଡ୍ରାଫ୍ଟରେ ସାମିଲ କରାଯାଇଛି। କାଣ୍ଡି କୋଚିଂ ଷ୍ଟାଫ୍ରେ ପୂର୍ବତନ ଶ୍ରୀଲଙ୍କା ଅଧିନାୟକ ହାଶନ ତିଳକରତ୍ନେ ସାମିଲ ହୋଇଛନ୍ତି। ଏଲ୍ପିଏଲ୍ ଲିଗ୍ରେ ସାମିଲ ହୋଇ ଆମେ ବହୁତ ଖୁସି ଅଛୁ। ଏହି ଲିଗ୍ର ଯଥେଷ୍ଟ କ୍ଷମତା ଓ ଗୁରୁତ୍ୱ ରହିଛି ବୋଲି ସୋହେଲ କହିଛନ୍ତି। କ୍ରିକେଟକୁ ନେଇ ଶ୍ରୀଲଙ୍କା ଖେଳାଳିମାନେ ବେଶ୍ ଉତ୍ସାହିତ ରହି ଆସିଛନ୍ତି। ତେଣୁ ଲିଗ୍ରେ ଆମ ଦଳ ସହ ବହୁ ପ୍ରଶଂସକ ସାମିଲ ହେବେ। ଗେଲ୍ଙ୍କ ସହ ଦଳର ଏକାଧିକ ଖେଳାଳି ବିଶ୍ୱସ୍ତରୀୟ । ଆମ ଦଳ ବେଶ୍ ସନ୍ତୁଳିତ। ଅତିକମ୍ରେ ଦଳ ଫାଇନାଲରେ ପ୍ରବେଶ କରିବ ବୋଲି ସୋହେଲ ଆଶା ପ୍ରକାଶ କରିଛନ୍ତି। ଅନ୍ୟପଟେ ସୋହେଲ ଖାନ୍ଙ୍କ ଭଳି ଜଣେ ବଲିଉଡ୍ ସୁପରଷ୍ଟାର ଏଲ୍ପିଏଲ୍ରେ ସାମିଲ ହେବା ଏକ ବଡ଼ କଥା। କ୍ରିକେଟ ଓ ମନୋରଞ୍ଜନର ଅପୂର୍ବ ମିଳନ ହେବାକୁ ଯାଉଥିବାରୁ ଲିଗ୍ ଲୋକପ୍ରିୟ ହେବ। ସୋହେଲଙ୍କ ଉପସ୍ଥିତିକୁ ଶ୍ରୀଲଙ୍କା ପ୍ରଶଂସକ ବେଶ୍ ଉପଭୋଗ କରିବେ ବୋଲି ଶ୍ରୀଲଙ୍କା କ୍ରିକେଟ ଉପ ସଭାପତି ତଥା ଏଲ୍ପିଏଲ୍ ଟୁର୍ନାମେଣ୍ଟ ନିର୍ଦ୍ଦେଶକ ରବିନ ବିକ୍ରମାରତ୍ନେ କହିଛନ୍ତି।