ଜେରୁଜେଲମ୍/ନୂଆଦିଲ୍ଲୀ, ୧।୭ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୟେର ଲାପିଡଙ୍କୁ ଇସ୍ରାଏଲର ୧୪ ତମ ପ୍ରଧାନମନ୍ତ୍ରୀ ଭାବରେ କାର୍ଯ୍ୟଭାର ଗ୍ରହଣ କରିଥିବାରୁ ଅଭିନନ୍ଦନ ଜଣାଇଛନ୍ତି। ଲାପିଡ ଗୁରୁବାର-ଶୁକ୍ରବାର ମଧ୍ୟରାତ୍ରିରେ ଇସ୍ରାଏଲର ପ୍ରଧାନମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିଛନ୍ତି। ଲାପିଡଙ୍କୁ ଅଭିନନ୍ଦନ ଜଣାଇ ପ୍ରଧାନମନ୍ତ୍ରୀ ମୋଦି ଟୁଇଟ କରି କହିଛନ୍ତି ଯେ ଇସ୍ରାଏଲର ପ୍ରଧାନମନ୍ତ୍ରୀ ଦାୟିତ୍ୱ ଗ୍ରହଣ କରିଥିବାରୁ ମୁଁ ହୃଦୟରୁ ଅଭିନନ୍ଦନ ଜଣାଉଛି।
ଚଳିତ ବର୍ଷ ଭାରତ ଇସ୍ରାଏଲ ମଧ୍ୟରେ କୂଟନୈତିକ ସମ୍ପର୍କକୁ ୩୦ବର୍ଷ ପୂରଣ ହୋଇଛି। ଉଭୟ ଦେଶର ରଣନୈତିକ ଭାଗିଦାରୀକୁ ଆଗକୁ ନେବାକୁ ମୁଁ ଆଗ୍ରହୀ ବୋଲି ମୋଦି କହିଛନ୍ତି। ଟାଇମ୍ସ ଅଫ ଇସ୍ରାଏଲ ଅନୁଯାୟୀ, ନଭେମ୍ବରରେ ନିର୍ବାଚନ ପୂର୍ବରୁ ସେ କେୟାରଟେକର ସରକାରର ମୁଖ୍ୟ ଭାବେ ନିଯୁକ୍ତି ପାଇଥିବାରୁ ଲାପିଡଙ୍କ କାର୍ଯ୍ୟକାଳ ଛୋଟ ହୋଇପାରେ ।
ଗୁରୁବାର ଅପରାହ୍ନରେ ଦାୟିତ୍ୱ ହସ୍ତାନ୍ତର ସମାରୋହରେ ର୍ପୂବତନ ପ୍ରଧାନମନ୍ତ୍ରୀ ନାଫ୍ଟାଲୀ ବେନେଟଙ୍କ ସହ ଲାପିଡ କହିଛନ୍ତି ଯେ ଆମେ ଏକ ଇହୁଦୀ, ଗଣତାନ୍ତ୍ରିକ ଦେଶ, ଭଲ, ଶକ୍ତିଶାଳୀ ତଥା ସମୃଦ୍ଧ ଇସ୍ରାଏଲ ପାଇଁ ଚେଷ୍ଟା କରିବୁ। ଏହି କାର୍ଯ୍ୟ ଅନ୍ୟ ପଦକ୍ଷେପ ତୁଳନାରେ ଦେଶ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ପ୍ରଧାନମନ୍ତ୍ରୀ ମୋଦି ମଧ୍ୟ ଭାରତର ପ୍ରକୃତ ବନ୍ଧୁ ହୋଇଥିବାରୁ ବିଦାୟୀ ପ୍ରଧାନମନ୍ତ୍ରୀ ବେନେଟଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି।