ଆମେ ପ୍ରତିଦିନ ବିଭିନ୍ନ ପ୍ରକାରର ପ୍ରାଣୀଙ୍କୁ ଦେଖୁ। ସେମାନଙ୍କ ଆକାର ଏବଂ ପ୍ରକାରକୁ ନେଇ ମନ ଭିତରେ ଏକ ନିର୍ଦ୍ଦିଷ୍ଟ ଛବି ମଧ୍ୟ ରହିଯାଇଥାଏ। ହେଲେ ପୃଥିବୀରେ ସେଭଳି ପ୍ରାଣୀମାନଙ୍କର ସର୍ବବୃହତ୍ ପ୍ରଜାତି ରହିଛି, ଯାହା ବିଷୟରେ ଜାଣିଲେ ଯେକେହି ଆଶ୍ଚର୍ଯ୍ୟ ହେବା ସ୍ବାଭାବିକ। ଜାଣିବା ସେଭଳି କେତେକ ବୃହତ୍ ପ୍ରାଣୀଙ୍କ ସମ୍ପର୍କରେ…
ସବୁଠୁ ବଡ଼ ସାପ; ଗ୍ରୀନ୍ ଆନାକୋଣ୍ଡା: ଏହା ହେଉଛି ପୃଥିବୀର ସବୁଠୁ ବଡ଼ ସାପ, ଯାହାର ଲମ୍ବ ୩୦ ଫୁଟ୍ ହୋଇଥିବା ବେଳେ ଓଜନ ପ୍ରାୟ ୫୫୦ ପାଉଣ୍ଡ ପର୍ଯ୍ୟନ୍ତ ବୃଦ୍ଧି ପାଇଥାଏ। ତେବେ ଅଣ୍ଡିରା ସାପ ତୁଳନାରେ ମାଈ ସାପର ଲମ୍ବ ଅଧିକ ହୋଇଥାଏ। ଏହି ସାପ ବ୍ରାଜିଲର ସନ୍ତସନ୍ତିଆ ସ୍ଥାନରେ ଏବଂ ଆମାଜନ୍ ରେନ୍ଫରେମଷ୍ଟରେ ଦେଖାଯାଆନ୍ତି। ସେମାନେ ବନ୍ୟ ଜୀବଜନ୍ତୁଙ୍କୁ ନିଜ ଖାଦ୍ୟ ଭାବେ ଗ୍ରହଣ କରିଥାନ୍ତି।
ବଡ଼ ଗାଈ; ଚିଆନିନା: ଇଟାଲୀର ଟସ୍କାନିରେ ଦେଖିବାକୁ ମିଳୁଥିବା ଏହି ଗାଈ ୨ ମିଟର ପର୍ଯ୍ୟନ୍ତ ଉଚ୍ଚ ହୋଇଥିବା ବେଳେ ଓଜନ ୧୭୦୦ କିଲୋଗ୍ରାମ୍ରୁ ଊର୍ଦ୍ଧ୍ୱ, ଯେଉଁଥିପାଇଁ ଏହା ଉଭୟ ଓଜନ ଏବଂ ଉଚ୍ଚତାରେ ପୃଥିବୀର ସବୁଠୁ ଗାଈ ପ୍ରଜାତି। ଏହାକୁ ମୁଖ୍ୟତଃ ମାଂସ ପାଇଁ ପାଳନ କରାଯାଏ।
ବଡ଼ ବେଙ୍ଗ; ଗୋଲିଆଥ୍ ବୁଲ୍ଫ୍ରଗ୍: ବର୍ଷାଦିନେ ନଈ, ପୋଖରୀ, ବିଲ କିମ୍ବା ରାସ୍ତାକଡ଼ରେ ଛୋଟରୁ ବଡ଼ ଅନେକ ଆକାରର ବେଙ୍ଗ ଦେଖିଥିବେ। ହେଲେ ଭାବିଛନ୍ତି କି ବେଙ୍ଗ କେବେ ୩୨ ସେଣ୍ଟିମିଟର ଲମ୍ବର ବି ହୋଇପାରେ। ଆଶ୍ଚର୍ଯ ଲାଗୁଥିଲେ ବି ଏହା ସତ। ପୃଥିବୀର ସବୁଠୁ ବଡ଼ ପ୍ରଜାତିର ଏହି ବେଙ୍ଗର ନାମ ହେଉଛି ଗୋଲିଆଥ୍ ବୁଲ୍ଫ୍ରଗ୍। ଏହାର ଓଜନ ପାଖାପାଖି ୩.୩ କିଲୋଗ୍ରାମ୍। ଏହି ବେଙ୍ଗ ପଶ୍ଚିମ ଆଫ୍ରିକାରେ ଦେଖାଯାଆନ୍ତି। ସେଠାରେ ଏହାକୁ ଖାଦ୍ୟ ଭାବେ ଗ୍ରହଣ କରାଯାଇଥାଏ।
ବିଶାଳ ମାଛ; ହ୍ବେଲ୍ ଶାର୍କ: ଏହା ହେଉଛି ପୃଥିବୀର ସବୁଠୁ ବଡ଼ ମାଛ, ଯାହାର ଲମ୍ବ ପ୍ରାୟ ୧୨ ଫୁଟ୍। ସେମାନଙ୍କ ଦାନ୍ତ ଖୁବ୍ ଛୋଟ ହୋଇଥିବାରୁ ସେମାନେ କାମୁଡ଼ି କିମ୍ବା ଚୋବାଇ ଖାଇପାରନ୍ତି ନାହିଁ। ତେଣୁ ସେମାନେ ଛୋଟ ମାଛ ଏବଂ ଜଳଚର ଜୀବ ଗିଳିଥା’ନ୍ତି। ଏହି ମାଛର ବୟସସୀମା ପ୍ରାୟ ୧୫୦ ବର୍ଷ। ତେବେ ମାତ୍ର ୧୦ ପ୍ରତିଶତ ମାଛ ହିଁ ଏତେ ବଡ଼ ହେବା ପର୍ଯ୍ୟନ୍ତ ବଞ୍ଚତ୍ଥାନ୍ତି।