ଆଙ୍କରା,୧୧।୮: ତୁର୍କୀର ଦକ୍ଷିଣ ଅଞ୍ଚଳରେ ଏକ ବଡ଼ଧରଣର ଭୂକମ୍ପ ଘଟିଛି। ରିକ୍ଟର ସ୍କେଲରେ ଏହାର ତୀବ୍ରତା ୫.୩ ରହିଛି। ଭୂକମ୍ପ ଯୋଗୁ ଅନେକ ଅଟ୍ଟାଳିକା ନଷ୍ଟ ହୋଇଯାଇଥିଲା ଏବଂ ୨୩ ଜଣ ଆହତ ହୋଇଥିଲେ। ଖବର ଅନୁଯାୟୀ, ଏହି ଭୂକମ୍ପର କେନ୍ଦ୍ରସ୍ଥଳ ମାଲତ୍ୟା ପ୍ରଦେଶର ୟିଶିଲର୍ଟ ସହରରେ ଥିଲା। ଆଦିଆମାନରେ ଭୂକମ୍ପରେ କମ୍ପନ ଅନୁଭୂତ ହୋଇଥିଲା। ଗତ ଫେବୃଆରୀରେ ହୋଇଥିବା ଭୟଙ୍କର ଭୂକମ୍ପରେ ଉଭୟ ପ୍ରଦେଶ ପ୍ରଭାବିତ ହୋଇଥିଲା। ଏଥିରେ ୫୦,୦୦୦ରୁ ଅଧିକ ଲୋକ ପ୍ରାଣ ହରାଇଥିଲେ।
ତୁର୍କୀର ସ୍ବାସ୍ଥ୍ୟମନ୍ତ୍ରୀ ଫାରେଟିନ କୋକା ଏକ ସୋସିଆଲ ମିଡିଆ ପୋଷ୍ଟରେ କହିଛନ୍ତି, ମାଲତ୍ୟା ଏବଂ ଆଦିଆମାନରେ କୋଠା ଭୁଶୁଡ଼ିବା ପରେ ଲୋକମାନେ ଆହତ ହୋଇଛନ୍ତି। ଭୂକମ୍ପରୁ ରକ୍ଷା ପାଇବା ପାଇଁ ଲୋକମାନେ ବିଲ୍ଡିଂରୁ ଡେଇଁପଡିଥିଲେ, କିଛି ଲୋକ ମଧ୍ୟ ଆହତ ହୋଇଛନ୍ତି। ଏଥିସହିତ ଟିଭିରେ ପ୍ରସାରିତ ଭିଡିଓରେ ଭୂକମ୍ପ ହେତୁ କୋଠାଘର ନଷ୍ଟ ହୋଇଥିବା ଦେଖିବାକୁ ମିଳିଥିଲା।