ଉଡାଣ ପୂର୍ବରୁ ବିମାନର ଡେଣା ଉପରେ ଚଢ଼ିଗଲେ ଜଣେ ବ୍ୟକ୍ତି। ଲସ୍ ଭେଗାସର ମେକ୍କେରନ୍ ଅନ୍ତରାଷ୍ଟ୍ରୀୟ ବିମାନବନ୍ଦରରେ ଏଭଳି ଏକ ଘଟଣା ସାମ୍ନାକୁ ଆସିଛି। ଶେଷରେ ଉକ୍ତ ବ୍ୟକ୍ତି ଆଲେଜାନ୍ଦ୍ରୋ କାର୍ଲସନଙ୍କୁ ଗିରଫ କରାଯାଇଛି।
ଓରେଗନ ଯିବା ଲାଗି ବିମାନ ପ୍ରସ୍ତୁତ ଥିଲା। ଯାତ୍ରୀମାନେ ମଧ୍ୟ ପ୍ରସ୍ତୁତ ଥିଲେ। ହେଲେ ହଠାତ୍ ଆଲେଜାନ୍ଦ୍ରୋ ବିମାନର ଡେଣା ଉପରେ ଚଢ଼ିଯାଇଥିଲେ। ସେଠାରେ ଗୋଡ଼ରୁ ନିଜ ଚପଲ ଓ ମୋଜା ବାହାର କରି ବସି ରହିଥିଲେ। ଏଭଳି ଅଜବ କାମ ଦେଖି ବିମାନରେ ଥିବା ଜଣେ ଯାତ୍ରୀ ଭିଡିଓ ଉତ୍ତୋଳନ କରିଥିଲେ। ଏବେ ତାହା ଭାଇରାଲ ହେବାରେ ଲାଗିଛି।
ଅପରପକ୍ଷେ ବିମାନର ପାଇଲଟ୍ ବ୍ୟକ୍ତିଙ୍କୁ ଦେଖିବା ପରେ ପୋଲିସକୁ ଖବର ଦେଇଥିଲେ। ପୋଲିସ ପହଞ୍ଚି ତାଙ୍କୁ ଗିରଫ କରିଥିଲା। ତାଙ୍କ ଦେହରେ ସାମାନ୍ୟ କ୍ଷତ ହୋଇଥିବା ଜଣାପଡ଼ିବା ପରେ ସ୍ବାସ୍ଥ୍ୟାବସ୍ଥା ଯାଞ୍ଚ କରାଯାଇଥିଲା। ଏବେ ତାଙ୍କୁ ଜେଲକୁ ପଠାଇ ଦିଆଯାଇଛି। ଏଥିସହ ପୋଲିସ ମାମଲାର ଯାଞ୍ଚ ମଧ୍ୟ କରୁଛି।