ଓ୍ବାଶିଂଟନ: ଚନ୍ଦ୍ର ଓ ଅନ୍ୟ ଗ୍ରହଗୁଡ଼ିକରେ ଏଲିଅନ୍ମାନଙ୍କ ଚିହ୍ନଟ କରିବା ପାଇଁ ଆମେରିକୀୟ ମହାକାଶ ଗବେଷଣା ସଂସ୍ଥା (ନାସା) ଉନ୍ନତ ଜ୍ଞାନକୌଶଳ ପ୍ରୟୋଗ କରି ଏକ ଲେଜର ଲାଇଟ୍ ଉଦ୍ଭାବନ କରିଛି। ଏହି ଲେଜର ଏଲିଅନ୍ମାନଙ୍କ ବିଷୟରେ ଅଧିକ ତଥ୍ୟ ସଂଗ୍ରହ କରିବାରେ ଜ୍ୟୋତିର୍ବିଜ୍ଞାନୀମାନଙ୍କୁ ସହଯୋଗ କରିବ। ମାରିଲାଣ୍ଡ ୟୁନିଭର୍ସିଟିରେ ନାସା ଏ ନେଇ ଗବେଷଣା କରିଛି। ଲେଜର ଟେକ୍ନିକ୍ ଦ୍ୱାରା ଅନ୍ୟ ଗ୍ରହରେ ଥିବା ଅଜଣା ବସ୍ତୁର ଆକାର, ପ୍ରକାର ବିଷୟରେ ଧାରଣା ମିଳିପାରୁଥିବାବେଳେ ଏହି କୌଶଳ ଦ୍ୱାରା ଏଲିଅନ୍ମାନଙ୍କ ବିଷୟରେ ମଧ୍ୟ ଆବଶ୍ୟକ ତଥ୍ୟ ହସ୍ତଗତ ହୋଇପାରିବ ବୋଲି ମାରିଲାଣ୍ଡ ୟୁନିଭର୍ସିଟିର ଅସିଷ୍ଟାଣ୍ଟ ପ୍ରଫେସର ରିକାର୍ଡୋ ଆରେଭାଲୋ କହିଛନ୍ତି। ଲେଜର ବିମ୍କୁ ବରଫରେ ପକାଇ ଏହାର ଗଠନ ସମ୍ପର୍କରେ ସମସ୍ତ ତଥ୍ୟ ମିଳୁପାରୁଛି। ସେହିପରି ଲେଜର ଦ୍ୱାରା ପୃଥିବୀର ନିକଟବର୍ତ୍ତୀ ଗ୍ରହଗୁଡ଼କରେ ଥିବା ଏଲିଅନ୍ଙ୍କ ବିଷୟରେ ଜାଣିହେବ।
ଡିସର୍ପଶନ୍ ମାସ୍ ସ୍ପେକ୍ଟ୍ରୋମିଟ୍ରି (ଏଲ୍ଡିଏମ୍ଏସ୍) ଟେକ୍ନୋଲୋଜି ବ୍ୟବହାର କରି ତିଆରି କରାଯାଇଥିବା ଲେଜର ‘ଅରବିଟ୍ରାପ୍’ ସାଧାରଣ ଲେଜର ବିମ୍ ଠାରୁ ଅଧିକ ପ୍ରଭାବୀ। ଜଟିଳ ବସ୍ତୁ ସମ୍ପର୍କରେ ଏହି ଲେଜର ଅତି ସହଜରେ ତଥ୍ୟ ଖୋଜି ବାହାର କରିବାର କ୍ଷମତା ରଖିଛି। ଏହାର ଓଜନ ୭.୭୧ କେଜି (୧୭ ପାଉଣ୍ଡ)। ଏଲିଅନ୍ଙ୍କ ଚିହ୍ନଟ ସକାଶେ ବ୍ୟବହାର ହେବାକୁ ଥିବା ଏହି ଲେଜର ଠିକ୍ ତଥ୍ୟ ଯୋଗାଇବ ବୋଲି ବୈଜ୍ଞାନିକମାନେ ଆଶା ରଖିଛନ୍ତି। ତେବେ ଏହି ଲେଜର ଏଲିଅନ୍ମାନଙ୍କ ଉପରେ କୌଣସି ନକାରାତ୍ମକ ପ୍ରଭାବ ପକାଇବ ନାହିଁ ବୋଲି ବୈଜ୍ଞାନିକମାନେ ସୂଚନା ଦେଇଛନ୍ତି।
ଏଲିଅନ୍ ବୋଲି କୌଣସି ଜିନିଷର ସତ୍ତା ନ ଥିବା ଗତବର୍ଷ ପେଣ୍ଟାଗନ୍ ପକ୍ଷରୁ କୁହାଯାଇଥିଲା। ଏହାସତ୍ତ୍ୱେ ବିଶେଷଜ୍ଞମାନେ ଏଲିଅନ୍ ସମ୍ପର୍କିତ ଗବେଷଣା ବନ୍ଦ କରିନାହାନ୍ତି। ଆମକୁ ଜଣା ନାହିଁ ଏହି ପଦ୍ଧତି ଗବେଷକଙ୍କୁ କେତେ ସଫଳତା ହେବ। କିନ୍ତୁ ସତ୍ୟର ସନ୍ଧାନରେ ବିଶେଷଜ୍ଞମାନଙ୍କ ତରଫରୁ ପ୍ରୟାସ ଜାରି ରହିବ ବୋଲି କମ୍ପ୍ୟୁଟନର ସାଇଣ୍ଟିଷ୍ଟ ଡା. ଜନ୍ ଏଲିଅଟ୍ ନିଜର ମତ ପ୍ରକାଶ କରିଛନ୍ତି।
