ଶ୍ରୀନଗର,୧୯।୭: ଜମ୍ମୁ-କଶ୍ମୀରରେ ଅତଙ୍କବାଦ ବିରୋଧୀ ଅପରେଶନ୍ରେ ମିଳିତ ସୁରକ୍ଷା କର୍ମୀଙ୍କୁ ବଡ଼ ସଫଳତା ମିଳିଛି। ଦକ୍ଷିଣ କଶ୍ମୀରର ଶୋପିଆନ୍ରେ ହୋଇଥିବା ଏନ୍କାଉଣ୍ଟରରେ ୨ ଜଣ ଆତଙ୍କବାଦୀଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଲଶ୍କର-ଇ-ତୋଏବା ଆତଙ୍କବାଦୀ ସଂଗଠନ ଶୀର୍ଷ କମାଣ୍ଡର ଇଶଫାକ୍ ଡାର ରହିଛନ୍ତିି। ଇଶଫାକ୍ ପୂର୍ବରେ ପୋଲିସ ବାହିନୀରେ କାର୍ଯ୍ୟ କରୁଥିଲେ। ସେ ୨୦୧୦ରେ ପୋଲିସ ବାହିନୀରେ ଯୋଗ ଦେଇଥିଲେ। ତେବେ ୨୦୧୭ରେ ଆତଙ୍କବାଦୀ ସଂଗଠନ ଲଶ୍କର-ଇ-ତୋଏବାରେ ସାମିଲ୍ ହୋଇଥିଲେ। ଅନ୍ୟ ଜଣେ ମୃତ ଆତଙ୍କବାଦୀଙ୍କୁ ମାଜିଦ୍ ଇକବାଲ ଭାବେ ଚିହ୍ନଟ କରାଯାଇଛି। ଚେକ୍ ସାଦିକ୍ ଖାଁ ଅଞ୍ଚଳରେ କିଛି ଆତଙ୍କବାଦୀ ଲୁଚିଥିବା ଖବର ମିଳିବା ପରେ ପୋଲିସ, ସିଆର୍ପିଏଫ୍ ଏବଂ ସେନାବାହିନୀ ଯବାନଙ୍କ ପକ୍ଷରୁ ଏହି ଅଞ୍ଚଳରେ ଘେରାବନ୍ଦୀ କରାଯାଇ ସର୍ଚ୍ଚ ଅପରେଶନ୍ ଆରମ୍ଭ କରାଯାଇଥିବା କଶ୍ମୀର ଜୋନ୍ ପୋଲିସ ପକ୍ଷରୁ ସୂଚନା ପ୍ରଦାନ କରାଯାଇଛି।
