ଭୁବନେଶ୍ୱର,୧୮।୯(ବ୍ୟୁରୋ): ଚନ୍ଦକା ବନଖଣ୍ଡ ଅଞ୍ଚଳରେ ଉତ୍ପାତ କରୁଥିବା ତଥା ଜନବସତି ଆସି ଆତଙ୍କ ସୃଷ୍ଟି କରୁଥିବା ହାତୀଙ୍କ ଉପରେ ନଜର ରଖିବାକୁ ଲାଗିବ ରେଡିଓ କୋଲାର। ଏଥିପାଇଁ ବାଙ୍ଗାଲୋରସ୍ଥିତ ଏସିଆନ ଏଲିଫ୍ୟାଣ୍ଟ୍ ରିସର୍ଚ୍ଚ ସେଣ୍ଟରରୁ ୬ଜଣିଆ ବିଶେଷଜ୍ଞ ଟିମ୍ ମଧ୍ୟ ଆସିଛନ୍ତି। ଏଥିସହ କୋଲକାତାରୁ ମଧ୍ୟ ଜଣେ ବିଶେଷଜ୍ଞଙ୍କୁ ଡକାଯାଇଛି। ହାତୀ ବେକରେ ରେଡିଓ କୋଲାରିଂ ପାଇଁ ୩ ଦିନ ହେବ ଉଦ୍ୟମ ଚାଲିଥିଲେ ମଧ୍ୟ ବନ ବିଭାଗ ସଫଳ ହୋଇପାରୁନି। ପ୍ରଥମେ ବଡ଼ ଦନ୍ତା ହାତୀ ରାମୁକୁ ଟାର୍ଗେଟ କରାଯାଇଛି। ବୁଧବାରଠାରୁ ରାମୁ ପଛରେ ପଡ଼ିଛି ଟ୍ରାଙ୍କୁଲାଇଜ୍ ଟିମ୍। ଗୁରୁବାର ଟ୍ରାଙ୍କୁଲାଇଜ ପାଇଁ ୨ଥର ଫାୟାରିଂ ସତ୍ତ୍ୱେ ଲକ୍ଷ୍ୟ ଭ୍ରଷ୍ଟ ହୋଇଥିଲା। ତେବେ ବିଶ୍ୱସ୍ତ ସୂଚନା ଅନୁଯାୟୀ, ଦୁଇ ଦିନ ହେବ ଡ୍ରାଇଭିଂ ଟିମ୍ ଓ ଟ୍ରାଙ୍କୁଲାଇଜ ଟିମ୍ ପିଛା କରୁଥିବାରୁ ରାମ ମଧ୍ୟ ଆହୁରି ଆକ୍ରମଣାତ୍ମକ ହୋଇପଡିଛି। ଟ୍ରାଙ୍କୁଲାଇଜ୍ ଉଦ୍ୟମବେଳେ ଆକ୍ରମଣ କରିବାକୁ ଗୋଡାଇ ଆସୁଛି। ଶୁକ୍ରବାର ସକାଳେ ନନ୍ଦନକାନନରୁ ଯାଇଥିବା ଟିମ୍ ଆଡ଼କୁ ରାମୁ ପ୍ରାୟ ୫୦ ମିଟର ବାଟ ଗୋଡ଼େଇ ଆସିଥିଲା। ନିଆଁ ହୁଳା ଦେଖାଇବା ପରେ ରାମୁ ପଳାଇଥିଲା। ତେବେ ସନ୍ଧ୍ୟା ସାଢ଼େ ୫ଟାରେ ଡ୍ରାଇଭିଂ ଟିମ୍ ଭରତପୁର କୂଅ ସଉରା ଜଳାଶୟ ନିକଟ ଜଙ୍ଗଲ ଭିତରେ ରାମୁକୁ ଠାବ କରିଥିଲେ। ସେହି ସ୍ଥାନରେ ପ୍ରଥମେ ୩ ମିଲି ଲିଟର ମେଡ଼ିସିନାଲ ଟ୍ରାଙ୍କୁଲାଇଜର ମାଡ଼ କରିଥିଲେ। ପରେ ନନ୍ଦନକାନନ ଡାକ୍ତର ମଧ୍ୟ ଡବଲ ବ୍ୟାରେଲ ବାଲା ଗନ୍ରୁ ପ୍ରଥମେ ୫ ଓ ତା’ପରେ ୩ ଏମିତି ୮ ମିଲି ଲିଟର ମେଡ଼ିସିନ ମାଡ଼ କରିଥିଲେ। ହେଲେ ହାତୀ ସେଠାରୁ ଦୌଡ଼ି ଜଙ୍ଗଲ ଭିତରକୁ ପଳାଇଯାଇଥିଲା। ଅନ୍ଧାର ହୋଇଯିବାରୁ ଜଙ୍ଗଲ ଭିତରେ ରାମୁକୁ ଖୋଜିବା ଆଉ ସମ୍ଭବ ହୋଇ ନ ଥିଲା। କାରଣ ରାମୁଙ୍କ ସହ ଆଉଏକ ହାତୀ ଓ ମାଖନା ମଧ୍ୟ ରହୁଛନ୍ତି। ଏହାଛଡ଼ା ଏକ ୧୧ ଟିକିଆ ହାତୀ ପଲ ମଧ୍ୟ ଭରତପୁର ଜଙ୍ଗଲରେ ଏବେ ଅଛନ୍ତି। ତେଣୁ ରାତିରେ ହାତୀକୁ ଖୋଜିବା ଅତ୍ୟନ୍ତ ବିପଦପୂର୍ଣ୍ଣ ହୋଇଥିବାରୁ ଶେଷରେ ଟ୍ରାଙ୍କୁଲାଇନ୍ କାର୍ଯ୍ୟକୁ ବନ୍ଦ ରଖି ଦୁଇ ଟିମ୍ ଫେରିଥିଲା।
