ଡେରାଡୁନ୍: ଚାଇନା ସୀମାକୁ ଲାଗିଥିବା ଏକ ଦୋକାନର ନାଁ ହେଉଛି ଭାରତର ଶେଷ ଦୋକାନ।
ଉତ୍ତରାଖଣ୍ଡର ଚାମେଲି ଜିଲାରେ ରହିଛି ଏହି ଦୋକାନ। ଏହିଠାରେ ଭାରତର ଶେଷ ଗାଁ ରହିଛି, ଯାହାର ନାଁ ମାଣା। ଏହିଠାରୁ ହିଁ ଭାରତର ସୀମା ଶେଷ ହେଉଛି। ଏହି ଶେଷ ଦୋକାନକୁ ବ୍ୟବସାୟୀ ଆନନ୍ଦ ମହିନ୍ଦ୍ରା ସୋସିଆଲ ମିଡିଆରେ ଶେୟାର କରିବା ପରେ ଏହାକୁ ନେଇ ଚର୍ଚ୍ଚା ହେଉଛି। ଦୋକାନଟିକୁ ପ୍ରଥମେ ମାଣା ଗାଁର ଚନ୍ଦ୍ର ସିଂହ ବଡୱାଲ୍ ନାମକ ଜଣେ ବ୍ୟକ୍ତି ଖୋଲିଥିଲେ। ୨୫ ବର୍ଷ ତଳେ ଏହି ଦୋକାନ ଆରମ୍ଭ ହୋଇଥିଲା କିନ୍ତୁ ଆଜି ବି ଏହାକୁ ଦେଖିବା ପାଇଁ ଲୋକଙ୍କର ଆକର୍ଷଣ ବଢିବାରେ ଲାଗିଛି। ଏହି ଗାଁର ଏକ ସ୍ବତନ୍ତ୍ର ମାନ୍ୟତା ମଧ୍ୟ ରହିଛି। କୁହାଯାଏ ମହାଭାରତ କାବ୍ୟ ଅନୁସାରେ ଏହି ଠାରୁ ହିଁ ପାଣ୍ଡବମାନେ ସ୍ବର୍ଗାରୋହଣ କରିଥିଲେ। ତେଣୁ ଏହି ଗାଁ ସ୍ବର୍ଗକୁ ଯିବା ପାଇଁ ରାସ୍ତା ବୋଲି କୁହାଯାଏ।