ବ୍ରହ୍ମପୁର ଅଫିସ,୧ା୪: ବ୍ରହ୍ମପୁରର ଅଧିଷ୍ଠାତ୍ରୀ ଦେବୀ ମା’ ବୁଢୀ ଠାକୁରାଣୀ ଯାତ୍ରା ଆସନ୍ତା ୪ ତାରିଖରୁ ଆରମ୍ଭ ହେବ। ଏବେ ଠାରୁ ବ୍ରହ୍ମପୁର ସହରବାସୀଙ୍କ ମହଲରେ ଆନନ୍ଦ ଉଲାସ ଦେଖିବାକୁ ମିଳିଲାଣି। ମା’ ବୁଢୀ ଠାକୁରାଣୀଙ୍କ ନିମନ୍ତେ ଦେଶୀ ବେହେରା ସାହିରେ ନିର୍ମିତ ହେଉଥିବା ଅସ୍ଥାୟୀ ମଣ୍ଡପ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚଛି। ଅସ୍ଥାୟୀ ମଣ୍ଡପରେ ମା’ଙ୍କ ଆସ୍ଥାନ ନିମନ୍ତେ ବ୍ରହ୍ମପୁର ମହାନଗର ନିଗମ ପକ୍ଷରୁ ପିଣ୍ଡି କାର୍ଯ୍ୟ ସମ୍ପୂର୍ଣ୍ଣ ହୋଇଛି। ପିଣ୍ଡିରେ ଟାଇଲ ପକାଯାଇ ସୌନ୍ଦର୍ଯ୍ୟକରଣ କରାଯାଇଛି। ଏଥିସହ ଅସ୍ଥାୟୀ ମଣ୍ଡପରେ ଲୁହାର ଫାଟକ କାର୍ଯ୍ୟ ବି ସରିଛି। ତତସହିତ ଚାବୁକ କାଠ ଓ ବାଉଁଶରେ ଅସ୍ଥାୟୀ ମଣ୍ଡପର ଛାମୁଣ୍ଡିଆ କାର୍ଯ୍ୟ ମଧ୍ୟ ସରିଛି। କୃପାସିନ୍ଧୁପୁରରୁ ପାଳ ଅଣାଯାଇ ବାଉଁଶ ନିର୍ମିତ ଛାମୁଣ୍ଡିଆରେ ଛପର କାର୍ଯ୍ୟ କରାଯିବ। ଏଥିସହ ମଣ୍ଡପ ଚର୍ତୁପାର୍ଶ୍ୱରେ ବାଉଁଶରେ ପାଚେରୀ କାର୍ଯ୍ୟ ବି ଶେଷ ପର୍ଯ୍ୟାୟରେ ପହଞ୍ଚତ୍ଛି। ଫୁଲସୁନ୍ଦରିସାହିର ମେଦିରିଙ୍କ ଦ୍ୱାରା ମଣ୍ଡପର ସୌନ୍ଦର୍ଯ୍ୟକରଣ ପାଇଁ ବାଉଁଶରେ ବିଭିନ୍ନ ଛାଞ୍ଚ ପ୍ରସ୍ତୁତ କରିବେ ବୋଲି ଯାତ୍ରା ପରିଚାଳକ ପି. ଦୁର୍ଗା ପ୍ରସାଦ ଦେଶୀ ବେହେରା ସୂଚନା ଦେଇଛନ୍ତି। ବର୍ତ୍ତମାନ ନିର୍ମିତ ହେଉଥିବା ଅସ୍ଥାୟୀ ମଣ୍ଡପର ଉଚ୍ଚତା ୨୧ ଫୁଟ ଥିବା ବେଳେ ଓସାର ୧୬ ଫୁଟ ରହିଛି। ନରେନ୍ଦ୍ରପୁରରୁ ବାଉଁଶ ଆସିଛି। ଅସ୍ଥାୟୀ ମଣ୍ଡପର ଛପର ନିମନ୍ତେ କୃପାସିନ୍ଧୁପୁର ଅଞ୍ଚଳରୁ ଛଣ ଆସିବ ବୋଲି ଯାତ୍ରା ପରିଚାଳକ କହିଛନ୍ତି। ଆସନ୍ତା ୨ ତାରିଖ ସୁଦ୍ଧା ମଣ୍ଡପର ସମସ୍ତ କାର୍ଯ୍ୟ ଶେଷ ହେବ ବୋଲି ଦୁର୍ଗା ପ୍ରସାଦ କହିଛନ୍ତି। ଏହାପରେ ଏପ୍ରିଲ ୪ ତାରିଖ ରାତ୍ରିରେ ଯାତ୍ରା ପାଇଁ ମା’ ଠାକୁରାଣୀଙ୍କ ଆଜ୍ଞାମାଳ ନିମନ୍ତେ ଦେଶୀ ବେହେରା ଠାକୁରାଣୀ ମନ୍ଦିରକୁ ଯିବେ। ସେଠାରେ ବିଶେଷ ପୂଜାର୍ଚ୍ଚନା ପରେ ମା’ଙ୍କ ଆଜ୍ଞାମାଳ ପାଇବା ପରେ ଦେଶୀ ବେହେରା ଅସ୍ଥାୟୀ ମଣ୍ଡପକୁ ଯିବେ। ଏହାପରଠାରୁ ୨୮ ଦିନ ଅର୍ଥାତ ମେ’ ୧ ତାରିଖ ଯାଏଁ ଠାକୁରାଣୀ ଯାତ୍ରା ହେବ। ଅସ୍ଥାୟୀ ମଣ୍ଡପରେ ବ୍ରହ୍ମପୁର ସମେତ ସମଗ୍ର ଗଞ୍ଜାମ ଜିଲା ମା’ ଠାକୁରାଣୀଙ୍କ ଦର୍ଶନ କରିବେ।
